ଆଦିବାସୀଙ୍କ ନିଆରା ଜଟ୍ଟି ପରବ: ପ୍ରଥମେ ପିଟାପିଟି, ପରେ ଜମେ ନାଚଗୀତ

କୋରାପୁଟ: ଆଦିବାସୀଙ୍କ ନିଆରା ପର୍ବ, ଜଟ୍ଟି ପରବ । ପୁରୁଷଙ୍କ ମଧ୍ୟରେ ଥିବା ରାଗ, ଦ୍ୱେଷକୁ ଦୂର କରେ ଏହି ପର୍ବ । ଏଭଳି ଏକ ନିଆରା ପର୍ବ ଦେଖିବାକୁ ମିଳିଛି କୋରାପୁଟ ଓ ମାଲକାନଗିରି ଜିଲ୍ଲାର ସୀମାବର୍ତ୍ତୀ ଗ୍ରାମ ଗୁଡିକରେ । ବର୍ତ୍ତମାନର ଆଧୁନିକ ଯୁଗରେ ମଧ୍ୟ ପୂର୍ବ ପୁରୁଷଙ୍କ ନୀତି ନିୟମ, ପରମ୍ପରା ଓ ସଂସ୍କୃତିକୁ ବଜାୟ ରଖି ଏପରି ପର୍ବ ଆଜିର ଯୁଗର ଯୁବକମାନେ ପାଳନ କରୁଛନ୍ତି । ଏହି ଅଞ୍ଚଳର ଆଦିମ ବଣ୍ଡା ଜନଜାତିର ଆଦିବାସୀ ସମ୍ପ୍ରଦାୟର ଲୋକମାନେ ପ୍ରତିବର୍ଷ ପୌଷମାସରେ ଏହି ଜଟ୍ଟି ପର୍ବ ପାଳନ କରିଥାନ୍ତି ।

ମୁଖ୍ୟତଃ ଏହି ପର୍ବରେ ପ୍ରଥମେ ଗ୍ରାମ ପୂଜାରୀ ଗ୍ରାମ ଦେବତାଙ୍କୁ ସ୍ୱତନ୍ତ୍ର ପୂଜା କରିବା ପରେ ଗ୍ରାମରେ ଏହି ଉତ୍ସବ ଆରମ୍ଭ ହୋଇଥାଏ । ଗ୍ରାମରେ ଥିବା ସଲପ ଗଛର ଡାଳ ସହ ଗ୍ରାମର ପୁରୁଷମାନେ ଜଣେ ଜଣଙ୍କୁ ପିଟିବା ଏବଂ କିଛି ସମୟ ପରେ ପରସ୍ପରକୁ କୋଳେଇ ନେବା ଏକ ନିଆରା ପରମ୍ପରା । ଏପରି ଗଛର ଡାଳ ସହ ମାରପିଟ ହେବା ଫଳରେ ତାଙ୍କ ମଧ୍ୟରେ ଥିବା ରାଗ, ଦ୍ୱେଷ ଓ ହିଂସା ଦୂର ହେବ ବୋଲି ସେମାନଙ୍କ ବିଶ୍ୱାସ ରହିଛି । ଜଣେ ଜଣଙ୍କୁ ପିଟିବା ଫଳରେ ପୁରୁଷମାନଙ୍କ ପିଠିରେ ଆଘାତ ସୃଷ୍ଟି ହୋଇଥାଏ । ଏହି ଆଘାତ ଗୁଡିକ ସଙ୍ଗେ ସଙ୍ଗେ ଲାଘବ ପାଇଁ ପୁରୁଷମାନଙ୍କ ବନ୍ଧୁ ବାନ୍ଧବ ଓ ପରିବାର ବର୍ଗ ହଳଦି ଲଗାଇଥାନ୍ତି । ଏହି କାର୍ଯ୍ୟକ୍ରମ କେବଳ ଏକ ଘଣ୍ଟା ହିଁ ହୋଇଥାଏ । ଏହି ଏକ ଘଣ୍ଟା ମାରପିଟକୁ ଜଟ୍ଟି ପର୍ବ ଭାବେ ପାଳନ କରାଯାଏ । ଯିଏ ଯେତେ ଦୂରରେ ଥିଲେ ମଧ୍ୟ ପ୍ରତିବର୍ଷ ଏହି ପର୍ବ ସମୟରେ ସମସ୍ତେ ଏକାଠି ହୋଇଥାନ୍ତି । ପରେ ବଣ୍ଡା ପରମ୍ପରା ଅନୁଯାୟୀ ଢେମସା ନୃତ୍ୟ ପରିବେଷଣ କରି ଏହି ପର୍ବର ଆନନ୍ଦ ନେଇଥାନ୍ତି ।

ଏହା ମଧ୍ୟ ପଢ଼ନ୍ତୁ...ଅସୁରଗଡ ଲୋକ ମହୋତ୍ସବ, ଲୋକକଳା ପୁନରୁଦ୍ଧାର ପାଇଁ ନିଆରା ପ୍ରୟାସ ଏହା ମଧ୍ୟ ପଢ଼ନ୍ତୁ...4 ଜିଲ୍ଲାକୁ ନେଇ ଆୟୋଜିତ ହେବ ‘ଉତ୍ସବ ଉତ୍ତର ଓଡିଶା’

ଇଟିଭି ଭାରତ, କୋରାପୁଟ