ଭୁବନେଶ୍ବର: ‘ଉତ୍କର୍ଷ ଓଡ଼ିଶା-ମେକ୍ ଇନ୍ ଓଡ଼ିଶା କନକ୍ଲେଭ ୨୦୨୫’ରେ ଓଡ଼ିଶାର ପର୍ଯ୍ୟଟନ କ୍ଷେତ୍ରକୁ ବଡ଼ ପ୍ରୋତ୍ସାହନ । ଓଡିଶାର ପର୍ଯ୍ୟଟନ କ୍ଷେତ୍ରରେ ନିବେଶ ହେବ ୮୧୫୩ କୋଟି ଟଙ୍କା । ୧୨୧ଟି ପ୍ରକଳ୍ପ ପାଇଁ ରାଜ୍ୟକୁ ପୁଞ୍ଜି ନିବେଶର ପ୍ରସ୍ତାବ ମିଳିଛି । ଯାହା ଓଡ଼ିଶାର ପର୍ଯ୍ୟଟନ ଏବଂ ଆତିଥ୍ୟ ସମ୍ଭାବନା ଉପରେ ଦୃଢ଼ ବିଶ୍ୱାସର ସଙ୍କେତ ଦେଉଛି । ଏନେଇ MOU ହୋଇଥିବା କହିଛନ୍ତି ଉପମୁଖ୍ୟମନ୍ତ୍ରୀ ତଥା ରାଜ୍ୟ ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡା ।
ଉତ୍କର୍ଷ ଓଡ଼ିଶାର ଦ୍ୱିତୀୟ ଦିବସ:
ଉତ୍କର୍ଷ ଓଡ଼ିଶାର: ମେକ ଇନ ଓଡ଼ିଶା କନକ୍ଲେଭ ୨୦୨୫ ଦ୍ୱିତୀୟ ଦିବସରେ ପର୍ଯ୍ୟଟନ ବିଭାଗ ଦ୍ୱାରା ମାଇସ ଏବଂ ୱେଡ଼ିଙ୍ଗ ପର୍ଯ୍ୟଟନର ଆର୍ଥିକ ଅଭିବୃଦ୍ଧିର ପଥ ଭାବେ ଉପସ୍ଥାପନ ହୋଇଛି । ବୈଠକ, ପ୍ରୋତ୍ସାହନ, ସମ୍ମିଳନୀ, ପ୍ରଦର୍ଶନୀ ଏବଂ ବିବାହ ପର୍ଯ୍ୟଟନର ବର୍ଦ୍ଧିତ ସମ୍ଭାବନାକୁ ଖୋଜିବା ପାଇଁ ଏହି ଅଧିବେଶନ ଶିଳ୍ପ ଜଗତର ଅଂଶୀଦାର, ନେତା ଏବଂ ସରକାରୀ ଅଧିକାରୀଙ୍କୁ ଏକାଠି କରିଥିଲା । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ମୁଖ୍ୟ ଶାସନ ସଚିବ ମନୋଜ ଆହୁଜା ଏବଂ ପର୍ଯ୍ୟଟନ ବିଭାଗର କମିସନର ତଥା ଶାସନ ସଚିବ ବଲୱନ୍ତ ସିଂହଙ୍କ ଉପସ୍ଥିତିରେ ଅନୁଷ୍ଠିତ ହୋଇଛି ।
ଟୁରିଜିମରେ ପାଇଁ ୮୧୫୩ କୋଟି:
ଏହି ଅଧିବେଶନରେ ୮୧୫୩ କୋଟି ମୂଲ୍ୟର ୧୨୧ଟି ପ୍ରକଳ୍ପ ପାଇଁ ନିବେଶ ଘୋଷଣା ହୋଇଛି । ଯାହା ହୋଟେଲ, ମନୋରଞ୍ଜନ ପାର୍କ, ଜଳକ୍ରୀଡା, କାରାଭାନ କ୍ୟାମ୍ପିଂ ଏବଂ ରିସର୍ଟରେ ଆତିଥ୍ୟ ସମ୍ଭାବନା ଉପରେ ଦୃଢ଼ ବିଶ୍ୱାସକୁ ସୂଚିତ କରିଛି । କୋରାପୁଟ, ଗଜପତି, ମୟୂରଭଞ୍ଜ, ସୁନ୍ଦରଗଡ଼, କେନ୍ଦୁଝର, ପୁରୀ, ଖୋର୍ଦ୍ଧା, ଭଦ୍ରକ, ବାଲେଶ୍ୱର ଭଳି ଅଞ୍ଚଳରେ ୨୩ଟି ରିସର୍ଟ ପ୍ରକଳ୍ପର ବିକାଶ ପାଇଁ ୨୩୮୭ କୋଟି ଟଙ୍କା ନିବେଶ ପାଇଁ ପ୍ରତିଶ୍ରୁତି ଦିଆଯାଇଛି । ପୁରୀ, ସମ୍ବଲପୁର, ପାରାଦୀପ, ଗୋପାଳପୁର, ଗଞ୍ଜାମ, ଭୁବନେଶ୍ୱରରେ ୪୭ଟି ହୋଟେଲ ପ୍ରକଳ୍ପ ମୋଟ ୩୭୯୨ କୋଟି ଟଙ୍କା ନିବେଶ ପ୍ରତିଶ୍ରୁତି ଦିଆଯାଇଛି । ଏହା ବ୍ୟତୀତ ୩୦ଟି ପଥପ୍ରାନ୍ତ ସୁବିଧା କେନ୍ଦ୍ର ପ୍ରକଳ୍ପ ୨୪୬ କୋଟି ଟଙ୍କା ବିନିଯୋଗକୁ ଆକର୍ଷିତ କରିଛି । ଯାହା ଉନ୍ନତ ପର୍ଯ୍ୟଟନ ସେବା ପାଇଁ ଭିତ୍ତିଭୂମିକୁ ବୃଦ୍ଧି କରିଛି ।
ଜଳକ୍ରୀଡା ଏବଂ କ୍ରୁଜ ପ୍ରକଳ୍ପରେ ୫୫୪ କୋଟି:
ଅଭିନବ ଏବଂ ଦୁଃସାହସିକ ପର୍ଯ୍ୟଟନ କ୍ଷେତ୍ର ମଧ୍ୟ ଆକର୍ଷଣୀୟ ହୋଇଛି । ଯାହା ପୁରୀ, ଖୋର୍ଦ୍ଧା, ଚିଲିକା, ସୁନ୍ଦରଗଡ଼, କଟକରେ ୯ଟି ଜଳକ୍ରୀଡା ଏବଂ କ୍ରୁଜ ପ୍ରକଳ୍ପରେ ୫୫୪ କୋଟି ନିବେଶର ସୁଯୋଗ ମିଳିଛି । ୪ଟି ଦୁଃସାହସିକ କ୍ରୀଡ଼ା ପଦକ୍ଷେପରେ କୋରାପୁଟ ଏବଂ ସୁନ୍ଦରଗଡ଼ରେ ୨୩ କୋଟି ନିବେଶର ଲକ୍ଷ୍ୟ ରହିଛି । ବହୁ-ଉପଯୋଗୀ ଆତିଥ୍ୟ କେନ୍ଦ୍ର ଉପରେ ଅତିରିକ୍ତ ଧ୍ୟାନ ଦେବା ଦ୍ୱାରା ୧୦୬୦ କୋଟି ଟଙ୍କା ପ୍ରତିଶ୍ରୁତି ମିଳିଛି । କାରାଭାନ ଏବଂ କ୍ୟାମ୍ପିଂ ପର୍ଯ୍ୟଟନ ପ୍ରତି ବଢ଼ୁଥିବା ଆଗ୍ରହ ସହିତ ରାଜ୍ୟ ଯଥାକ୍ରମେ ୫୮ କୋଟି ଏବଂ ୨.୯୫ କୋଟି ଟଙ୍କାର ନିବେଶ ହାସଲ କରିଛି । ଏହି ବିବିଧ ନିବେଶ ଯୋଜନାଗୁଡ଼ିକ ଏକ ସ୍ପନ୍ଦନଶୀଳ ଏବଂ ସ୍ଥାୟୀ ପର୍ଯ୍ୟଟନ ପରିଦୃଶ୍ୟକୁ ପ୍ରୋତ୍ସାହିତ କରିବା ପାଇଁ ଓଡ଼ିଶାର ରଣନୈତିକ ଦୃଷ୍ଟିକୋଣକୁ ଉଜ୍ଜ୍ୱଳ କରିଥାଏ ।
ଏନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଛନ୍ତି, "୧୨୧ ପ୍ରୋଜେକ୍ଟ ଉପରେ ୮୧୫୩ କୋଟି ଟଙ୍କାର ନିବେଶ ଆସିଛି । ଏନେଇ MOU ହୋଇଛି । ଆଡଭେଞ୍ଚର, ଖେଳ, ରିସର୍ଟ, ହୋଟେଲ, ମୋଟେଲ ଭଳି ବିଭିନ୍ନ କ୍ଷେତ୍ରରେ ନିବେଶ ହେବ । ରାଜ୍ୟ ସଫଳତାର ସହିତ ଉଭୟ ଘରୋଇ ଏବଂ ଆନ୍ତର୍ଜାତୀୟ ପର୍ଯ୍ୟଟକମାନଙ୍କୁ ଆକର୍ଷିତ କରି ଓଡ଼ିଶାର ସାଂସ୍କୃତିକ ଐତିହ୍ୟ, ପ୍ରାକୃତିକ ସୌନ୍ଦର୍ଯ୍ୟ ଏବଂ ଆଧୁନିକ ସୁବିଧାର ଏକ ଅନନ୍ୟ ମିଶ୍ରଣ ପ୍ରଦାନ କରୁଛି । ଓଡ଼ିଶା କେବଳ ଦେଶ ଭିତରେ ଏକ ପ୍ରମୁଖ ଗନ୍ତବ୍ୟସ୍ଥଳୀ ହୋଇ ରହିନାହିଁ ବରଂ ଏହାର ଉଚ୍ଚମାନର ପର୍ଯ୍ୟଟନ ସୁବିଧା ଏବଂ ଅସାଧାରଣ ଆତିଥ୍ୟ ସେବା ପ୍ରତି ଆକର୍ଷିତ ହୋଇ ବିଶ୍ୱସ୍ତ ଅନ୍ତର୍ଜାତୀୟ ଗ୍ରାହକ ମଣ୍ଡଳୀ ମଧ୍ୟ ନିର୍ମାଣ କରିଛି । ଏହା ରାଜ୍ୟର ପର୍ଯ୍ୟଟନ କ୍ଷେତ୍ରରେ ଅଧିକ ପୁଞ୍ଜିନିବେଶ ପାଇଁ ଉପଯୁକ୍ତ ସମୟ । ପର୍ଯ୍ୟଟନ କ୍ଷେତ୍ରରେ ବୈଶିକ ସମ୍ପର୍କ, ସାଂସ୍କୃତିକ ବିନିମୟ ଏବଂ ପରିବେଶ ସଚେତନ ଅଭ୍ୟାସକୁ ପ୍ରୋତ୍ସାହନ ଦେବା ଉପରେ ଗୁରୁତ୍ୱାରୋପ କରିଯିବ । ଟୁରିଜିମ ବଢ଼ିଲେ ନିଯୁକ୍ତ ବଢ଼ିବ ।"
ମୁଖ୍ୟ ଶାସନ ସଚିବ ମନୋଜ ଆହୁଜା କହିଛନ୍ତି, "ଓଡିଶା ଭିଜନ-୨୦୩୬ ଅନୁସାରେ 'ଇଜ ଅଫ ଡୁଇଙ୍ଗ ବିଜିନେସ' ପାଇଁ ରାଜ୍ୟର ଦୃଢ଼ ପ୍ରତିବଦ୍ଧତା ରହିଛି । ରାଜ୍ୟ ପାଇଁ ପର୍ଯ୍ୟଟନ କ୍ଷେତ୍ର ଏକ ଶୀର୍ଷ ପ୍ରାଥମିକତା । ଯେଉଁଥିରେ ନିଯୁକ୍ତି ସୁଯୋଗ ସୃଷ୍ଟି କରିବାର ଯଥେଷ୍ଟ ସମ୍ଭାବନା ରହିଛି । ଏହି କ୍ଷେତ୍ରକୁ ଅଧିକ ନିବେଶକ ଅଭିବୃଦ୍ଧି ଏବଂ ବିକାଶକୁ ପ୍ରୋତ୍ସାହିତ କରିବା ପାଇଁ ସରକାରଙ୍କ ପ୍ରୟାସ ମଧ୍ୟ ଜାରି ରହିଛି ।" ପର୍ଯ୍ୟଟନ ବିଭାଗର କମିଶନର ତଥା ଶାସନ ସଚିବ ବଳବନ୍ତ ସିଂହ କହିଛନ୍ତି, "ଓଡ଼ିଶାରେ ପର୍ଯ୍ୟଟନର ଅଭିବୃଦ୍ଧି ବାହକ ହେବ ବିବିଧ ପର୍ଯ୍ୟଟନ ଅଭିଜ୍ଞତା, ସକ୍ରିୟ ପର୍ଯ୍ୟଟନ ନୀତି ସୁବିଧା ଏବଂ ନିରନ୍ତର ପ୍ରୋତ୍ସାହନ ଅଭିଯାନ ।"
ଓଡ଼ିଶା ପର୍ଯ୍ୟଟନ ଏବଂ ଜାତୀୟ ବିଜ୍ଞାନ ସଂଗ୍ରହାଳୟ ପରିଷଦ ମଧ୍ୟରେ ଏକ ବୁଝାମଣାପତ୍ର ସ୍ୱାକ୍ଷର ହୋଇଛି । ଏହି ସହଭାଗୀତା ନୂତନ ସଂଗ୍ରହାଳୟ ଏବଂ ବ୍ୟାଖ୍ୟା କେନ୍ଦ୍ର ବିକାଶ କରି ରାଜ୍ୟର ସାଂସ୍କୃତିକ ପର୍ଯ୍ୟଟନକୁ ସମୃଦ୍ଧ କରିବ । ଓଡ଼ିଶାର ସଂଗ୍ରହାଳୟ ପ୍ରଦାନକୁ ଆହୁରି ବୃଦ୍ଧି କରିବ । ଏକ ପ୍ରମୁଖ ସାଂସ୍କୃତିକ ଗନ୍ତବ୍ୟସ୍ଥଳ ଭାବରେ ଏହାର ସ୍ଥିତିକୁ ସୁଦୃଢ଼ କରିବା ଲକ୍ଷ୍ୟ ରଖିଛି ।
ଇଟିଭି ଭାରତ, ଭୁବନେଶ୍ବର
