ନବବର୍ଷ ଆରମ୍ଭରେ ମାଆଙ୍କ ଦର୍ଶନ ଆଶା, ମାଣିକେଶ୍ବରୀ ମନ୍ଦିରରେ ଶ୍ରଦ୍ଧାଳୁଙ୍କ ପ୍ରବଳ ଭିଡ

New Year Celebration: ଭବାନୀପାଟଣା: ବିଦାୟ ନେଇଛି ୨୦୨୩, ଆରମ୍ଭ ହୋଇଛି ନବବର୍ଷ ୨୦୨୪ । ଅନେକ ଆଶା ଓ ସମ୍ଭାବନାକୁ ନେଇ ଆସିଛି ନବବର୍ଷ । ଏହି ନବବର୍ଷକୁ ଅନେକ ଲୋକେ ଭଗବାନଙ୍କ ଆଶିଷରୁ ଆରମ୍ଭ କରିଛନ୍ତି । ଆଜି ସକାଳୁ ସକାଳୁ କଳାହାଣ୍ଡିର ଅଧିଷ୍ଠାତ୍ରୀ ଦେବୀ ମାଆ ମାଣିକେଶ୍ଵରୀଙ୍କ ମନ୍ଦିରରେ ପ୍ରବଳ ଭିଡ଼ ଦେଖିବାକୁ ମିଳିଛି । କଳାହାଣ୍ଡି ଜିଲ୍ଲାବାସୀଙ୍କ ସମେତ ବାହାର ଜିଲ୍ଲାରୁ ମଧ୍ୟ ଅନେକ ଶ୍ରଦ୍ଧାଳୁ ମାଆଙ୍କ ସାନ୍ନିଧ୍ୟ ପାଇବା ପାଇଁ ମାଣିକେଶ୍ଵରୀଙ୍କ ପୀଠ ଆସିଥିବା ଦେଖିବାକୁ ମିଳିଛି ।

ଅଧିଷ୍ଠାତ୍ରୀ ଦେବୀଙ୍କୁ ଦର୍ଶନ କରି ପରିବାରର ମଙ୍ଗଳ କାମନା କରିଛନ୍ତି ସଭିଏଁ । ନୂଆ ବର୍ଷ ପାଇଁ ଜିଲ୍ଲାର ବିଭିନ୍ନ ପର୍ଯ୍ୟଟନସ୍ଥଳୀ ମାନଙ୍କରେ ମଧ୍ୟ ଲୋକଙ୍କ ଭିଡ଼ ଜମିଛି । ସାଙ୍ଗସାଥି ପରିବାରଜନଙ୍କ ସହ ନୂଆ ବର୍ଷକୁ ବେଶ ଧୁମଧାମରେ ସ୍ୱାଗତ କରିଛନ୍ତି ଲୋକେ ।

ଇଟିଭି ଭାରତ, କଳାହାଣ୍ଡି