ଗଣେଶଙ୍କ ହାତରୁ ଝରୁଛି ମହୁ! ଲୋକେ କରୁଛନ୍ତି ପୂଜାର୍ଚ୍ଚନା

ନବରଙ୍ଗପୁର: ଗଣେଷଙ୍କ ଫଟୋରୁ ଝରୁଛି ମହୁ । କବାଟରେ ଲାଗିଥିବା ଗଣେଶଙ୍କ ଫଟୋରେ ତାଙ୍କ ହାତରୁ ମହୁ ଝରୁଛି । ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ସାନଟେମରା ଗାଁର ରଜନୀକାନ୍ତ ପଟ୍ଟନାୟକଙ୍କ ବାସ ଭବନରେ ଏଭଳି ଅଲୌକିକ ଦୃଶ୍ୟ ଦେଖିବାକୁ ମିଳିଛି । ତାଙ୍କ ଘରେ ଥିବା ପୂଜା ଗୃହର ବାହାର କବାଟରେ ଲାଗିଥିବା ଗଣେଶ ଫୋଟ ଚିତ୍ରରେ ଗଣେଶଙ୍କ ଡାହାଣ ହାତରୁ କିଛି ତରଳ ପଦାର୍ଥ ଭଳି ବହିଯାଉଥିବା ଘରଲୋକ ଦେଖିଥିଲେ । କୌଣସି ତରଳ ପଦାର୍ଥ ହୋଇପାରେ ବୋଲି ଫୋଟ ଚିତ୍ରକୁ ପୋଛିଥିଲେ । କିନ୍ତୁ କିଛି ସମୟ ପରେ ସେହି ସ୍ଥାନରୁ ପୁଣି ତରଳ ପଦାର୍ଥ ଭଳି ବହିଥିଲା । ପରେ ପରିବାରର ସମସ୍ତ ସଦସ୍ୟ ଏହି ଘଟଣା ଦେଖି ଆଶ୍ଚର୍ଯ୍ୟ ହେବା ସହ ସେହି ତରଳ ପଦାର୍ଥକୁ ଚାଖି ଥିଲେ ଯାହାକି ମହୁ ଭଳି ସ୍ବାଦ ଆସିଥିଲା । ଗଣେଶଙ୍କ ଫୋଟରୁ ମହୁ ଝରିବା ଖବର ଗାଁରେ ପ୍ରଚାର ହେବା ପରେ ରଜନୀକାନ୍ତ ପଟ୍ଟନାୟକଙ୍କ ବାସ ଭବନରେ ଲୋକଙ୍କ ଭିଡ଼ ଜମିଥିଲା । ଏହାପରେ ଫଟୋ ଆଗରେ ପୂଜାର୍ଚ୍ଚନା ହୋଇଥିଲା । 

କହି ରଖୁଛୁ କି ‘ଇଟିଭି ଭାରତ’ କୌଣସି ଅନ୍ଧବିଶ୍ୱାସ ସହିତ ଜଡିତ ଖବରକୁ ପ୍ରୋତ୍ସାହନ ଦିଏନାହିଁ, କି ଲୋକଲୋଚନକୁ  ମଧ୍ୟ ଆଣି ନଥାଏ । କିନ୍ତୁ ଆସ୍ଥା ଏବଂ ଲୋକଙ୍କ ବିଶ୍ୱାସ ସହିତ ଜଡିତ ଖବରକୁ ସଠିକ ତଥ୍ୟ ସହିତ ପ୍ରସାରଣ କରିଥାଏ ।

ଇଟିଭି ଭାରତ, ନବରଙ୍ଗପୁର