ଗାଡିରେ ପେଟ୍ରୋଲ ପକାଉଥିବା ବେଳେ ଲାଗିଲା ନିଆଁ; ଝିଅ ମୃତ, ମାଆ ଗୁରୁତର

ବେଙ୍ଗାଲୁରୁ: ପେଟ୍ରୋଲ ଟାଙ୍କିରେ ଗାଡିରେ ପେଟ୍ରୋଲ ପକାଉଥିବା ବେଳେ ଲାଗିଲା ନିଆଁ  । ହୁତୁ ହୁତୁ ହୋଇ ଜଳିଗଲା ଦୁଇ ଚକିଆ ଗାଡି  । ନିଆଁରେ ପୋଡି ହୋଇ ଝିଅର ମୃତ୍ୟୁ ଘଟିଥିବା ବେଳେ ମାଆ ଗୁରୁତର  । କର୍ଣ୍ଣାଟକର ତୁମକୁର ଜିଲ୍ଲା ବାଦଭାନାହଲ୍ଲୀ ଅଞ୍ଚଳରେ ଏହି ଅଘଟଣ ଘଟିଛି  । ଯାହାର ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି  । ଯାହା ସୂଚନା ମିଳିଛି, ଭବ୍ୟା ନାମକ ଜଣେ ୧୮ ବର୍ଷୀୟା ଯୁବତୀ ନିଜ ମାଆ ସହିତ ସ୍ଥାନୀୟ ଅଞ୍ଚଳର ଏକ ପେଟ୍ରୋଲ ପମ୍ପରେ ଗାଡିରେ ପେଟ୍ରୋଲ ପକାଉଥିଲେ  । ଏତିକି ବେଳେ ହଠାତ୍ ତାଙ୍କ ଗାଡିରେ ନିଆଁ ଲାଗି ଯାଇଥିଲା  । ଉଭୟ ମାଆ ଓ ଝିଅ ନିଆଁ ସଂସ୍ପର୍ଶରେ ଆସିବା ଯୋଗୁଁ ଗୁରୁତର ଆହତ ହୋଇଥିଲେ । ଦୁହିଁଙ୍କୁ ଉଦ୍ଧାର କରି ପାଖ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଭବ୍ୟାଙ୍କର ମୃତ୍ୟୁ ହୋଇଥିଲା  । ଏବେ ତାଙ୍କର ମାଆ ହସ୍ପିଟାଲରେ ଚିକିତ୍ସାଧୀନ ଅଛନ୍ତି  । ଗତ ରବିବାର ଦିନ ଏହି ଅଘଟଣ ଘଟିଥିବା ବେଳେ ଏବେ ସୋସିଆଲ ମିଡିଆରେ ନିଆଁ ଲାଗିବା ସମୟର ଭିଡିଓ ବେଶ୍ ଭାଇରାଲ ହେଉଛି  ।