ଢେଙ୍କାନାଳରେ ଆତଙ୍କ ଖେଳାଇଛି ଗୋଠଛଡା ଦନ୍ତା

ଢେଙ୍କାନାଳ: ଜିଲ୍ଲା ପରଜଙ୍ଗ ଥାନା ମହାବିରୋଡ଼ ରେଞ୍ଜର ସାନ୍ଦା ଫାଣ୍ଡି ନିକଟରେ ବୁଲୁଛି ଏକ ଗୋଠଛଡା ଦନ୍ତା ହାତୀ । ଯାହାକୁ ନେଇ ଭୟଭୀତ ଅଛନ୍ତି ଅଞ୍ଚଳବାସୀ । ସୂଚନା ମୁତାବକ ଗତକାଲି(ବୁଧବାର) ସନ୍ଧ୍ୟା ସମୟରେ ସାନ୍ଦା ଫାଣ୍ଡି ନିକଟ ଦେଇ ଏକ ଦନ୍ତା ହାତୀ ହଠାତ୍‌ ପଶି ଆସିଥିଲା । ତେବେ ଏନେଇ ଫାଣ୍ଡି ସମ୍ମୁଖରେ ଥିବା ଲୋକମାନେ ଭୟଭୀତ ହୋଇ  ହୋଇ ଦୌଡ଼ି ପଳାଇ ଥିଲେ । ବର୍ତ୍ତମାନ ହାତୀଟି ଗ୍ରାମ ନିକଟସ୍ଥ ଜଙ୍ଗଲରେ ଥିବାବେଳେ ଭୟଭୀତ ଅବସ୍ଥାରେ ଅଛନ୍ତି ଗ୍ରାମବାସୀ । ଏହି ଘଟଣା ପରେ ଗ୍ରାମବାସୀ  ନ ବିଭାଗକୁ ଖବର ଦେଇଥିଲେ l ଖବର ପାଇ ବନ ବିଭାଗ ଘଟଣା ସ୍ଥଳରେ ପହଞ୍ଚି ହାତୀଟିର ଗତିବିଧି ଉପରେ କଡା ନଜର ରଖିଛି । ଗ୍ରାମ ଭିତରକୁ ହାତୀ ପଶି ଆସିବା ଭୟରେ ଲୋକମାନେ ତାଟି କବାଟ ପକାଇ ଘର ଭିତରେ ରହୁଥିବା ଜଣାପଡୁଛି ।

ସେହିପରି ଗତ ସୋମବାର ଦିନ ଭୁବନ ଅଞ୍ଚଳରେ ଗୋଠଛଡା ଦନ୍ତାର ଉତ୍ପାତ କରୁଥିବାରୁ ଭୟଭୀତ ହୋଇ ରହିଛନ୍ତି ଗ୍ରାମବାସୀ । ଭୁବନ ବ୍ଲକ ଅନ୍ତର୍ଗତ ଭୁଷଳ ପଞ୍ଚାୟତର କିର୍ତ୍ତନପୁର ଓ କଞ୍ଚନବାହାଳୀ ଗ୍ରାମରେ ଗୋଠଛଡା ଦନ୍ତାର ଉତ୍ପାତ । ଗତ ମଙ୍ଗଳବାର ମଧ୍ୟ ରାତିରୁ ଗନ୍ଦିଆ ବ୍ଲକ ଦଲାର ଓ ହରିପୁର ଗ୍ରାମ ନିକଟ ପାହାଡରୁ ବ୍ରାହ୍ମଣୀ ନଦୀ ପାରହୋଇ ପସି ଆସିଛି ଗୋଠଛଡା ଦନ୍ତା । ପ୍ରଥମେ ଦନ୍ତାଟି ନଦୀ ପାର ହୋଇ ଭୁଷଳ ପଞ୍ଚାୟତର କିର୍ତ୍ତନପୁର ଗ୍ରାମରେ ପସି କଦଳୀ ଗଛ ଭାଙ୍ଗିବା ସହିତ ଜଣକ ଘରୁ ଧାନ ବସ୍ତା ଟେକି ନେଇ ଖାଇଥିଲା । ପରେ ସେହି ପଞ୍ଚାୟତର କଞ୍ଚନବାହାଳୀ ଗ୍ରାମରେ ପସି ମୁନି ମୁଣ୍ଡାଙ୍କ ଆମ୍ବଡାଳ ଭାଙ୍ଗିବା ସହିତ ଘରୁ ଭାତ ହାଣ୍ଡି ଟେକିନେଇ ଗୋଡରେ ଦଳି ଦେଇଥିଲା ।

ପରେ ଜଗନ ମୁଣ୍ଡାଙ୍କ ଘର ବାଡକୁ ଭାଙ୍ଗିବା ସହିତ ଦିଲ୍ଲୀପ ମୁଣ୍ଡାଙ୍କ ଘର ଶୁଣ୍ଢରେ ପେଲିବା ଦ୍ବାରା ଘର କାନ୍ଥ ଫାଟିଥିବା ଦେଖିବାକୁ ମିଳିଛି । ତେବେ ଖବର ପାଇ ବନବିଭାଗ ହାତୀଟିର ଗତିବିଧି ଉପରେ ନଜର ରଖିବା ସହିତ ହାତୀଟିକୁ ଘଉଡାଇବାକୁ ଉଦ୍ୟମ ଚଳେଇଛି । ତେବେ ଗୋଠଛଡା ଦନ୍ତା ହାତୀଟି କଞ୍ଚନବାହାଳୀ ସଂରକ୍ଷିତ ଜଙ୍ଗଲ ମଧ୍ୟରେ ଥିବା ଜଣାପଡିଛି । ଭୁବନ ଅଞ୍ଚଳରେ ବହୁ ଦିନ ପରେ ହାତୀ ପସିଥିବାରୁ ଗ୍ରାମବାସୀ ଭୟଭିତଥିବା ଜଣାପଡିଛି ।


ଇଟିଭି ଭାରତ,ଢେଙ୍କାନାଳ