ଯାଜପୁରରେ ହାତୀ ଆତଙ୍କ, ଘଉଡାଇବାକୁ ଯାଇ ଜଣେ ଆହତ

ଯାଜପୁର: ଦଶରଥପୁର ବ୍ଲକରେ ହାତୀ ଆତଙ୍କ । ବିରଜାପୁର ପଞ୍ଚାୟତରେ ବିଳମ୍ବିତ ରାତିରେ ଧାନ କ୍ଷେତ ଓ ଗାଁ ରେ ପଶି ଉପଦ୍ରବ ରଚିଥିଲା ବଣୁଆ ହାତୀ । ପରେ ଏହି ହାତୀଟି ପାଳଦା ଗ୍ରାମ ଦେଇ ମନ୍ଦାରଖଣ୍ଡ ଅଞ୍ଚଳକୁ ପ୍ରବେଶ କରିଥିବା ଦେଖିବାକୁ ମିଳିଛି । ହାତୀକୁ ନେଇ ଭୟଭୀତ ଅବସ୍ଥାରେ ଅଞ୍ଚଳବାସୀ । ହାତୀ ଘଉଡାଇବାକୁ ଯାଇ ବିରଜାପୁର ଗ୍ରାମର ଜଣେ ବ୍ୟକ୍ତି ଆହତ ହୋଇଥିବା ଜଣାପଡିଛି । 

ଅପରପକ୍ଷେ, ହାତୀଟି ଏଣେତେଣେ ବୁଲୁଥିବାବେଳେ ତାକୁ କାବୁ କରିବାକୁ ବନ ବିଭାଗ କର୍ମଚାରୀଙ୍କ ଉଦ୍ୟମ ଆରମ୍ଭ ହୋଇଛି । ଗାଁ ଲୋକମାନଙ୍କୁ ସତର୍କ ରହିବାକୁ ବନ ବିଭାଗ ପକ୍ଷରୁ ମାଇକ ଯୋଗେ ପ୍ରଚାର ମଧ୍ୟ କରାଯାଉଛି । ହାତୀଟି ହଦଗଡ଼ ଜଙ୍ଗଲରୁ ଭଣ୍ଡାରିପୋଖରୀ ହୋଇ ଯାଜପୁରରେ ପ୍ରବେଶ କରିଥିବା ସୂଚନା ମିଳିଛି। ସେପଟେ ବଣୁଆ ହାତୀକୁ ଦେଖି ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି ।

ଇଟିଭି ଭାରତ, ଯାଜପୁର