ଅନୁଗୋଳରେ ମାତିଛି ଦନ୍ତା; ଘରଦ୍ବାର ଭାଙ୍ଗିବା ସହ ଖାଇଲା ଚାଉଳ

ଅନୁଗୋଳ: ଥମୁନି ହାତୀ ଆତଙ୍କ । ଜଙ୍ଗଲୀ ଦନ୍ତା ହାତୀ ଉପଦ୍ରବରେ ଭୟଭୀତ ଗ୍ରାମବାସୀ  । ହାତୀ ଗ୍ରାମକୁ ପଶିବା ସହ ଘରଦ୍ବାର ଓ ଫସଲ ନଷ୍ଟ କରୁଛି । ଅନୁଗୋଳ ଜିଲ୍ଲାର ବନ୍ତଳା ବନାଞ୍ଚଳର ହିଡିସିଙ୍ଗ ଓ କରତପଟା ଗାଁରେ ବ୍ୟାପକ କ୍ଷୟକ୍ଷତି ଘଟାଇଛି ହାତୀ । ସୂଚନା ମୁତାବକ, ଗତକାଲି ରାତିରେ ଏକ ଦନ୍ତା ହାତୀ ଗାଁରେ ପଶି ବହୁ ଘର ଭାଙ୍ଗିବା ସହ ଘର ଭିତରେ ଥିବା ଧାନ, ଚାଉଳ ଓ ରନ୍ଧା ଖାଦ୍ୟ ଖାଇଦେଇଛି । ସେହିପରି ବହୁ ସଂଖ୍ୟାରେ କଦଳୀ ଗଛ ଭାଙ୍ଗି ନଷ୍ଟ କରିଛି । ରାତିରେ ବର୍ଷା ହେଉଥିବାରୁ ଲୋକେ କବାଟ ବନ୍ଦ କରି ନିଜ ନିଜ ଘରେ ଶୋଇଥିଲେ । ହାତୀଟି କବାଟ ଭାଙ୍ଗି ଘର ଭିତରେ ପଶିଥିବା ବେଳେ ଲୋକେ ଜୀବନ ବିକଳରେ ପିଲା ଛୁଆଙ୍କୁ ନେଇ କିଏ ଛାତ ଉପରକୁ ଚଢି ଯାଇଥିଲା ତ ଆଉ କିଏ ଦୌଡ଼ି ପଳାଇଥିଲେ । ଏନେଇ ବନ ବିଭାଗକୁ ଖବର ଦିଆଯାଇଥିଲେ ସୁଦ୍ଧା କୌଣସି କର୍ମଚାରୀ ଗାଁରେ ପହଞ୍ଚି ନଥିଲେ । ଫଳରେ ରାତିସାରା ହାତୀଟି ଗାଁ ଭିତରେ ତାଣ୍ଡବ ରଚିଥିଲା । ଏହାର ପ୍ରତିବାଦରେ ଗ୍ରାମବାସୀ କରତପଟା ନିକଟରେ ଟିକରପଡା ରାସ୍ତା ଅବରୋଧ କରିଛନ୍ତି ।

ଇଚିଭି ଭାରତ, ଅନୁଗୋଳ