ହାରିଲା ପାକ୍ ଜିତିଲା ଭାରତ, ବିଜୟ ଉତ୍ସବ ମନାଇଲେ ଫ୍ୟାନ୍ସ

ମୁମ୍ବାଇ/କୋଲକାତା: ଏସିଆ କପର ସୁପର 4 ରାଉଣ୍ଡର ତୃତୀୟ ମ୍ୟାଚରେ ଭାରତର ଦମଦାର ପ୍ରଦର୍ଶନ। 228 ରନରେ ପାକିସ୍ତାନକୁ ହରାଇ ବିଜୟୀ ହୋଇଛି ଭାରତ। କୋହଲି ଓ କେଏଲ ରାହୁଲଙ୍କ ଅପରାଜିତ ଶତକ ଭାରତକୁ ବିଜୟ ଭେଟି ଦେଇଛି। ପାକିସ୍ତାନ ବିପକ୍ଷରେ ଭାରତର ବିଜୟ ପରେ ଚାଲିଆଡେ ଖୁସିର ମାହୋଲ। କ୍ରୀଡାପ୍ରେମୀ ମାନେ ବାଣ ଫୁଟାଇ ଭାରତର ବିଜୟକୁ ସେଲିବ୍ରେଟ୍‌ କରୁଛନ୍ତି । ମହାରାଷ୍ଟ୍ରର ନାଗପୁରରେ ଭାରତ ବିଜୟ ଉତ୍ସବ ମନାଇଛନ୍ତି କ୍ରିକେଟ ପ୍ରେମୀ । ଜାତୀୟ ପତାକା ଉଡାଇ ବାଣ ଫୁଟାଇବା ସହ ଖୁସିରେ ନାଚିଛନ୍ତି । ସେହିପରି ନାସିକରେ ମଧ୍ୟ ବାଣ ଫୁଟାଇ ଭାରତର ବିଜୟ ସେଲିବ୍ରେସନ କରାଯାଇଛି । ପଶ୍ଚିମବଙ୍ଗରେ ଡ୍ରମ ବଜାଇ ଖୁସିରେ ନାଚି ଉଠିଛନ୍ତି କ୍ରୀଡ଼ାପ୍ରେମୀ। ରବିବାର ଭାରତଓ ପାକିସ୍ତାନ ମଧ୍ୟରେ ମ୍ୟାଚ ଖେଳାଯାଇଥିଲା । ରୋହିତ ଶର୍ମା ଓ ଶୁବମନ ଗିଲ ଅର୍ଦ୍ଧଶତକ ପାଳି ଖେଳି ଆଉଟ ହୋଇଥିଲେ। ଏହାପରେ କୋହଲି ଓ ରାହୁଲ ବ୍ୟାଟିଂ କରୁଥିବା ବେଳେ ବାଧକ ସାଜିଥିଲା ବର୍ଷା। ଫଳରେ ସୋମବାର ରିଜର୍ଭ ଡେ'ରେ ମ୍ୟାଚ ଆରମ୍ଭ ହୋଇଥିଲା । ବିରାଟ କୋହଲି ଓ କେଏଲ୍‌ ରାହୁଲ ଉଭୟ ଶତକୀୟ ପାଳି ଖେଳି ଭାରତକୁ ୩୫୬ ରନରେ ପହଞ୍ଚାଇଥିଲେ । ପାକିସ୍ତାନ ଏହି ବିଶାଳ ଟାର୍ଗେଟକୁ ପିଛା କରିବାକୁ ଯାଇ ଭାରତୀୟ ବୋଲିଂ ଆଟାକ୍‌ର ସମ୍ମୁଖୀନ ହୋଇପାରିନଥିଲା । ମାତ୍ର ୧୨୮ ରନରେ ସମସ୍ତ ୱିକେଟ୍‌ ହରାଇଥିଲା ପାକିସ୍ତାନ ।