Viral Video: ଜୋତା ଭିତରେ ଲୁଚିଥିଲା ନାଗସାପ

ଚେନ୍ନାଇ: ସୋସିଆଲ ମିଡିଆରେ ସାପର ଅନେକ ଭିଡିଓ ଦେଖିବାକୁ ମିଳେ । କେତେବେଳେ ସାପ ଜୋତା ଭିତରେ ଲୁଚିଥାଏ ତ ଆଉ କେତେବେଳେ ଶୋଚାଳୟରୁ ବାହାରେ । ସେହିପରି ସ୍କୁଲ ଜୋତା ଭିତରେ ନାଗସାପ ଲୁଚିଥିବାର ଏକ ଭିଡିଓ ସୋସିଆଲ ମିଡିଆରେ ଏବେ ଖୁବ୍ ଭାଇରାଲ ହେବାରେ ଲାଗିଛି । ଭିଡିଓଟି ତାମିଲନାଡୁ କୋଏମ୍ବାଟୁର ଜିଲ୍ଲା ଭେଙ୍କଟେଶ୍ବର ନଗରର  । ଏଠାରେ ରହୁଥିବା ପ୍ରଦୀପ ନାମକ ଜଣେ ଅଷ୍ଟମ ଶ୍ରେଣୀର ଛାତ୍ର ସ୍କୁଲ ଯିବା ପାଇଁ ଜୋତା ପିନ୍ଧିବା ସମୟରେ ସାପକୁ ଦେଖିଥିଲେ  ।

ସୂଚନା ଅନୁସାରେ, ପ୍ରଦୀପଙ୍କ ଘର ଭିତରେ ଥିବା ଏକ ଜୋତାଷ୍ଟାଣ୍ଡରେ ତାଙ୍କର ସ୍କୁଲ ଜୋତା ରଖାଯାଇଥିଲା  । ପିଲାଟି ଜୋତା ପିନ୍ଧିବାକୁ ଯିବାବେଳେ ସାପ ଉପରେ ନଜର ପଡିଥିଲା  । ଏହାଦେଖି ପ୍ରଦୀପ ଦୌଡି ଯାଇ ନିଜ ବାପାମାଆଙ୍କୁ ଜଣାଇଥିଲେ  । ତାଙ୍କର ବାପାମାଆ ସାପ ଧରାଳୀଙ୍କୁ ଡକାଇ ଜୋତା ଭିତରୁ ନାଗସାପକୁ ବାହାର କରିଥିଲେ  । ତେବେ ସାପ ଧରାଳୀ ଉଦ୍ଧାର ସାପକୁ ସୁରକ୍ଷିତ ଭାବେ ଜଙ୍ଗଲରେ ଛାଡି ଦେଇଥିବାର ଜଣାପଡିଛି  । ସାଧାରଣତଃ ବର୍ଷା ଦିନେ ସାପଗୁଡିକ ବାସସ୍ଥଳୀ ସନ୍ଧାନରେ ଏଣେତେଣେ ବୁଲିଥାନ୍ତି  । ଯାହାଫଳରେ ସେମାନେ କେତେବେଳେ ଜୋତା ଭିତରେ ତ ଆଉ କେତେବେଳେ ଘରର କୌଣସି ଛୋଟ ଛୋଟ ସ୍ଥାନରେ ଲୁଚି ଯାଇଥାନ୍ତି  । ତେଣୁ ଚପଲ ପିନ୍ଧିବା ପୂର୍ବରୁ ଏହାକୁ ଭଲ ଭାବେ ଦେଖିବା ଆବଶ୍ୟକ ।