ଲାଗିଗଲା ଡ୍ରାଉଭରଙ୍କ ଆଖି, ପୋଲରୁ କେନାଲକୁ ଖସିଲା କାର

ଡେରାଡୁନ: ଗାଡି ଚଳାଉଥିଲା ଅବସ୍ଥାରେ ଡ୍ରାଇଭରଙ୍କ ଆଖି ଲାଗିଯିବା କାରଣରୁ ପୋଲରୁ କେନାଲକୁ ଖସିଲା କାର । ଆଜି (ଶନିବାର) ସକାଳେ ଉତ୍ତରାଖଣ୍ଡ ହରିଦ୍ୱାର-ଡେରାଡୁନ ରାସ୍ତାରେ ଥିବା ଓମ୍ ବ୍ରିଜ୍ ନିକଟରେ ଏକ ସ୍ୱିଫ୍ଟ ଡିଜାୟାର କାର ଗଙ୍ଗା କେନାଲରେ ଖସିପଡିଥିଲା । ଏଥିରେ ଡ୍ରାଇଭର ସମେତ 2 ଜଣ ଫସି ରହିଥିଲେ । ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ସ୍ଥାନୀୟ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର ଅପରେସନ ଆରମ୍ଭ କରିଥିଲା । ଦଉଡି ସାହାଯ୍ୟରେ ପ୍ରଥମେ ଦୁଇ ଜଣଙ୍କୁ ଉଦ୍ଧାର କରାଯାଇଥିଲା । ପରେ କ୍ରେନ ସାହାଯ୍ୟରେ କାରକୁ ମଧ୍ୟ ଉଦ୍ଧାର କରାଯାଇଛି । ପ୍ରାଥମିକ ତଦନ୍ତ ପରେ ଏହା ଡ୍ରାଇଭରଙ୍କ ଅସାବଧାନତା କାରଣରୁ ହୋଇଥିବା ପୋଲିସ ଜାଣିବାକୁ ପାଇଛି । ହେଲେ ପୋଲିସର ତ୍ବରିତ କାର୍ଯ୍ୟାନୁଷ୍ଠାନ ଫଳରେ ଉଭୟଙ୍କୁ ସୁରକ୍ଷିତ ଉଦ୍ଧାର କରାଯାଇପାରିଛି । ପୋଲିସ ସହ ସ୍ଥାନୀୟ ଲୋକେ ମଧ୍ୟ ଉଦ୍ଧାର କାର୍ଯ୍ୟରେ ସହଯୋଗ କରିଥିଲେ । ହେଲେ ସକାଳ ହେବା ପୂର୍ବରୁ ଅନ୍ଧାରରେ ଏପରି ଅଘଟଣରେ ଉଦ୍ଧାର କାର୍ଯ୍ୟ ବେଶ ଆହ୍ବାନପୂର୍ଣ୍ଣ ଥିଲା ।