ବିପଦ ସଙ୍କେତରେ ବଂଶଧାରା ନଦୀ ଜଳସ୍ତର

ରାୟଗଡା: ବିପଦ ସଙ୍କେତରେ ବଂଶଧାରା ନଦୀ ଜଳସ୍ତର । ଲଘୁଚାପଜନିତ ତୁହାକୁ ତୁହା ବର୍ଷା ଲାଗି ରହିଥିବାବେଳେ ବଂଶଧାରା ନଦୀର ଉପର ମୁଣ୍ଡରେ ପ୍ରବଳ ବର୍ଷା ହୋଇଛି । ଫଳରେ ବଂଶଧାରା ନଦୀର ଜଳସ୍ତର ବଢିବାକୁ ଲାଗିଛି । ରାୟଗଡା ଜିଲ୍ଲା ଗୁଣୁପୁର ଠାରେ ଗୁରୁବାର ଦିନ ୧୦ ଟା ସୁଦ୍ଧା ୮୩.୭୫ ମିଟର ଦେଇ ନଦୀ ଜଳ ପ୍ରବାହିତ ହେଉଥିବା କେନ୍ଦ୍ରୀୟ ଜଳ ଆୟୋଗ ଗୁଣୁପୁର ପକ୍ଷରୁ ସୂଚନା ମିଳିଛି । ତେବେ ଉପର ମୁଣ୍ଡରେ ବର୍ଷା ଲାଗି ରହିଥିବା ଯୋଗୁଁ ଦିନ ୧୧ ଟାରୁ ୧୨ଟା ମଧ୍ୟରେ ଗୁଣୁପୁର ଠାରେ ବିପଦ ସଙ୍କେତ ଅତିକ୍ରମ କରିବା ସମ୍ଭାବନା ରହିଛି । ଏଠାରେ ବିପଦ ସଙ୍କେତ ୮୪ ମିଟର, ସତର୍କ ସଙ୍କେତ ୮୩ ମିଟର ରହିଛି । ଚଳିତ ବର୍ଷ ବଂଶଧାରାରେ ପ୍ରଥମ ବନ୍ୟାଜଳ ପ୍ରବାହିତ ହେଉଥିବାରୁ ତଳ ମୁଣ୍ଡରେ ପାଣି ପଶିବା, ବଂଶଧାରା ଅବବାହିକାରେ ଥିବା ଚାଷ ଜମିରେ ପାଣି ମାଡିଯାଇ ଫସଲ ହାନି ହେବା ଆଶଙ୍କା କରାଯାଉଛି । ଅନ୍ୟ ପକ୍ଷରେ ଆଜି (ଶୁକ୍ରବାର) ମଧ୍ୟାହ୍ନରୁ ବର୍ଷାର ପରିମାଣ ଧୀରେ ଧୀରେ କମିବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ମିଳିଛି । ପୁଣି ୧୯ ତାରିଖରୁ ବର୍ଷା ଲାଗି ରହିବ ବୋଲି ଭୁବନେଶ୍ବର ଆଞ୍ଚଳିକ ପାଣିପାଗ ବିଭାଗ ପକ୍ଷରୁ କୁହାଯାଇଛି । ବର୍ଷା ବଢିଲେ ନଦୀ ଜଳସ୍ତର ବଢିପାରେ ।

ଇଟିଭି ଭାରତ, ରାୟଗଡା