ତେଲେଙ୍ଗାନା ନିର୍ବାଚନ, ଧାଡିରେ ରହି ଭୋଟ ଦେଲେ ଅଲ୍ଲୁ ଅର୍ଜୁନ-ଏନଟିଆର

ହାଇଦ୍ରାବାଦ: ଦକ୍ଷିଣ ଭାରତର ଅନ୍ୟତମ ଗୁରୁତ୍ବପୂର୍ଣ୍ଣ ରାଜ୍ୟ ତେଲେଙ୍ଗାନାରେ ନିର୍ବାଚନ ଜାରି ରହିଛି । 119 ଆସନରେ ସକାଳ 7ଟାରୁ ଭୋଟିଂ ଆରମ୍ଭ ହୋଇଛି । ସନ୍ଧ୍ୟା 5ଟା ଯାଏଁ ମତଦାନ ପ୍ରକ୍ରିୟା ଚାଲିବ । 2,290 ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି 3 କୋଟି 26 ଲକ୍ଷରୁ ଉଦ୍ଧ୍ବ ଜନତା । ଗଣତନ୍ତ୍ରର ଏହି ମହାନ ପର୍ବରେ ସାମିଲ ହୋଇଛନ୍ତି ଟଲିଉଡ ଅଭିନେତା । ବିଭିନ୍ନ ମତଦାନ କେନ୍ଦ୍ରରୁ ମତଦାନ ସାବ୍ୟସ୍ତ କରିଛନ୍ତି ତେଲୁଗୁ ଅଭିନେତା ଅଲ୍ଲୁ ଅର୍ଜୁନ, ଏନଟିଆର ଓ ଚିରଞ୍ଜୀବି । ଅଭିନେତା ଅଲ୍ଲୁ ଅର୍ଜୁନ ଓ ଏନଟିଆର ଜୁବୁଲି ହିଲ୍ସ ପୁଲିଂ ବୁଥ୍‌ରେ ଭୋଟ ଦେଇଛନ୍ତି । ପରିବାର ସହିତ ସମସ୍ତେ ଗଣତନ୍ତ୍ରର ଏହି ପର୍ବରେ ସାମିଲ ହୋଇଛନ୍ତି । ନିୟମମାନି ଧାଡ଼ିରେ ରହି ଏନଟିଆର ମତଦାନ ଦେଇଥିବା ଦେଖିବାକୁ ମିଳିଛି । ସେହିପରି ଅଭିନେତା ଚିରଞ୍ଜୀବି ତାଙ୍କ ପରିବାର ସହିତ ଜୁବୁଲି ହିଲ୍ସ ପୁଲିଂ ବୁଥରୁ ଭୋଟ ଦେଇଛନ୍ତି । ସେହିପରି ମ୍ୟୁଜିକ କମ୍ପୋଜର ତଥା ଓସ୍କାର ପୁରସ୍କାର ବିଜେତା ଏମଏମ କିରାୱାନୀ ମଧ୍ୟ ଜୁବୁଲି ହିଲ୍ସରୁ ଭୋଟ ଦେଇଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ