ନୂଆଦିଲ୍ଲୀ: ସବୁବେଳେ ବିରାଟ କୋହଲିଙ୍କୁ ଟାର୍ଗେଟ କରୁଥିବା ପୂର୍ବତନ ଭାରତୀୟ ଓପନର ଗୌତମ ଗମ୍ଭୀର ପୁଣିଥରେ ତାଙ୍କୁ ନିଶାନା ବନାଇଛନ୍ତି। ଆଇପିଏଲରେ ଦଳ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)ର ପରାଜୟ ଲାଗି ଗମ୍ଭୀର ବିରାଟଙ୍କୁ ଦୋଷାରୋପ କରିଛନ୍ତି । ସେ କହିଛନ୍ତି, ଆରସିବିର ଲଗାତାର ପରାଜୟ ପାଇଁ ବୋଲରଙ୍କୁ ଦାୟୀ ନକରି କୋହଲି ନିଜେ ଦୋଷ ମୁଣ୍ଡାଇବା ଉଚିତ।
ରବିବାର ଦିଲ୍ଲୀ କ୍ୟାପିଟାଲ୍ସ ଠାରୁ ହାରି ଆରସିବି ଏଥର ଆଇପିଏଲରେ କ୍ରମାଗତ ଭାବେ 6ଟି ମ୍ୟାଚ ହାରିଛି । ବ୍ୟାଟିଂ ହେଉ ଅବା ବୋଲିଂ ସବୁଥିରେ ଦଳ ଫେଲ୍ ମାରିବା ସହ ପରାଜୟ ଭୋଗିଛି । ଏଥିପାଇଁ ଏବେ କୋହଲିଙ୍କ ଅଧିନାୟକତ୍ବ ଉପରେ ଉଠିଛି ପ୍ରଶ୍ନବାଚୀ । ଏହାକୁ ନେଇ ଦୁଇ ଭାଗ ହୋଇଛନ୍ତି କ୍ରିକେଟ୍ ସମୁଦାୟ । କେତେକ ଖେଳାଳି କୋହଲିଙ୍କୁ ଦଳର ଅଧିନାୟକ ପଦବୀ ଛାଡିବା ପାଇଁ କହୁଥିବାବେଳେ କେତେକ ତାଙ୍କୁ ବିଶ୍ରାମ ଦେବା ପାଇଁ ପରାମର୍ଶ ଦେଇଛନ୍ତି । ତେବେ ଦଳ ପରାଜୟ ପାଇଁ କୋହଲିଙ୍କୁ ଦାୟୀ କରିଛନ୍ତି ଗମ୍ଭୀର ।
ସେ କହିଛନ୍ତି ଯେ କୋହଲି ଜଣେ ମାଷ୍ଟରକ୍ଲାସ ବ୍ୟାଟ୍ସମ୍ୟାନ । ତାଙ୍କ ବ୍ୟାଟିଂ ଫର୍ମ ଉପରେ କୌଣସି ସନ୍ଦେହ ନାହିଁ । କିନ୍ତୁ ଜଣେ ଅଧିନାୟକ ହିସାବରେ ତାଙ୍କୁ ଆହୁରି ଅନେକ ଶିକ୍ଷା ଲାଭ କରିବାର ଅଛି । ଅଧିନାୟକ ଭାବେ ଏବେ ପର୍ଯ୍ୟନ୍ତ ସେ ପରିପକ୍ବତା ହାସଲ କରିନାହାଁନ୍ତି । ନିଜ ଦଳର ବୋଲରଙ୍କୁ ଦୋଷ ଦେବା ଅପେକ୍ଷା ସେ ନିଜେ ପରାଜୟର କାରଣ ମୁଣ୍ଡାଇବା ଉଚିତ । ଏହାସହ ଦଳ ଚୟନ ଉପରେ ମଧ୍ୟ ସେ ପ୍ରଶ୍ନ ଉଠାଇଛନ୍ତି ।
ଚିନ୍ନାସ୍ବାମୀ ଭଳି ଛୋଟ ଗ୍ରାଉଣ୍ଡର ଫ୍ଲାଟ୍ ପିଚରେ ଜଣେ ଅଧିକ ପେସରଙ୍କୁ ନନେଇ 2 ଜଣ ଅଲରାଉଣ୍ଡର ସହ ଖେଳିବା କେତେ ଦୂର ଯୁକ୍ତିଯୁକ୍ତ ବୋଲି ସେ ପ୍ରଶ୍ନ କରିଛନ୍ତି । ଏହାସହ ମାର୍କୋସ ଷ୍ଟୋଇନିସ୍ ଏବଂ ନାଥନ କୁଲଟର୍-ନାଇଲଙ୍କ ଭଳି ଖେଳାଳିଙ୍କୁ ସିଲେକ୍ଟ କରିବା ପୂର୍ବରୁ ସଠିକ୍ ଭାବେ ଭାବିବାର ଥିଲା ବୋଲି ସେ କହିଛନ୍ତି । କାରଣ ଏହିଭଳି ଖେଳାଳି ଆଇପିଏଲରେ ପ୍ରଥମରୁ ଦଳ ସହ ନଥିଲେ । ପରେ ଦଳ ସହ ସେମାନେ ଯୋଗ ଦେଇଥିଲେ । ଯାହା ଦଳୀୟ ଏକାଦଶର ସନ୍ତୁଳନକୁ ବିଗାଡି ଦେଇଥିଲା ବୋଲି ଗମ୍ଭୀର କହିଛନ୍ତି ।
