ନ୍ୟୁଜିଲାଣ୍ଡ: ନ୍ୟୁଜିଲାଣ୍ଡରେ ବାତ୍ୟା ଗ୍ରାବିଏଲର ତାଣ୍ଡବ ପରେ ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଛି । ନ୍ୟୁଜଲାଣ୍ଡର ଉତ୍ତର ପଶ୍ଚିମରେ ଥିବା ୱେଲିଙ୍ଗଟନରେ ଏହି ଭୂକମ୍ପ ଅନୁଭୂତ ହୋଇଛି । ଏହାର ତୀବ୍ରତା ରିକ୍ଟର ସ୍କେଲରେ ୬.୧ ରେକର୍ଡ କରାଯାଇଛି ।
ପ୍ରାଥମିକ ତଥ୍ୟ ଅନୁୟାୟୀ, ଆଜି (ବୁଧବାର) ସ୍ଥାନୀୟ ସମୟ ରାତି ୭.୩୮ରେ ଭୂକମ୍ପ ଝଟକା ଅନୁଭୂତ ହୋଇଛି । ଏହାର କେନ୍ଦ୍ରସ୍ଥଳ ଉତ୍ତର-ପଶ୍ଚିମର ପାରାପାରମୁ ଠାରୁ ୫୦ କିମି ଦୂରରେ ରହିଥିବାବେଳେ ଗଭୀରତା ୭୬ କିଲୋମିଟର ରେକର୍ଡ କରାଯାଇଛି । ଭୂକମ୍ପର ଏତେ ଭୟଙ୍କର ଥିଲା ଯେ, ୧୫ ମିନିଟ ମଧ୍ୟରେ ୩୧ ହଜାରରୁ ଅଧିକ ଲୋକ ଏହାକୁ ଅନୁଭବ କରିଥିଲେ ।
ଏହା ଏକ ବଡ଼ ଧରଣର ଭୂକମ୍ପ ବୋଲି ନ୍ୟୁଜଲାଣ୍ଡର ସିଭିଲ ଡିଫେନ୍ସ ଏଜେନ୍ସି ସୂଚନା ଦେଇଛି । ତେବେ ଭୂକମ୍ପ ଜନିତ କ୍ଷୟକ୍ଷତି ନେଇ କୌଣସି ସୂଚନା ହସ୍ତଗତ ହୋଇନାହିଁ । କେହି ମୃତାହତ ହୋଇଥିବା ନେଇ ମଧ୍ୟ ସୂଚନା ମିଳିନାହିଁ । ନ୍ୟୁଜିଲାଣ୍ଡରେ ବାତ୍ୟା ଗ୍ରାବିଏଲର ଭୟଙ୍କର ତାଣ୍ଡବ ପରେ ଭୂକମ୍ପକୁ ନେଇ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି ।
ଏହା ମଧ୍ୟ ପଡ଼ନ୍ତୁ: Twitter New CEO: ମସ୍କ ପାଇଗଲେ ନୂଆ ସିଇଓ, କହିଥିଲେ 'ବୋକାକୁ ଦାୟିତ୍ବ ଦେଇ ପଦ ଛାଡିବି'
ସୂଚନା ଥାଉକି, ବାତ୍ୟା ଗ୍ରାବିଏଲ ଯୋଗୁଁ ନ୍ୟୁଜିଲାଣ୍ଡରେ ବ୍ୟାପକ କ୍ଷୟକ୍ଷତି ହୋଇଛି । ବାତ୍ୟା ପ୍ରଭାବରେ ବିଭିନ୍ନ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଅନେକ ସ୍ଥାନରେ ଭୂସ୍ଖଳନ ଘଟି ତିନି ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ତେବେ ଏହାକୁ ଦୃଷ୍ଟିରେ ରଖି ସରକାର ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି । ଦେଶର ୬ଟି ଅଞ୍ଚଳରେ ଜରୁରୀ ପରିସ୍ଥିତି ଲାଗୁ ହୋଇଛି । ଅଞ୍ଚଳ ଗୁଡ଼ିକ ହେଲେ ନର୍ଥଲ୍ୟାଣ୍ଡ, ଅକଲ୍ୟାଣ୍ଡ,ତାଇରାହ୍ବିଟି, ବେ ଅଫ୍ ପ୍ଲେଣ୍ଟି, ୱାଇକାଟୋ, ହୱକେସ ୱେ ।
ଏହା ମଧ୍ୟ ପଢ଼ନ୍ତୁ: ନ୍ୟୁଜିଲାଣ୍ଡରେ ବାତ୍ୟା ତାଣ୍ଡବ, ଜାତୀୟ ଜରୁରୀ ପରିସ୍ଥିତି ଘୋଷଣା କଲେ ସରକାର
ବାତ୍ୟା ଯୋଗୁଁ ବିଭିନ୍ନ ଅଞ୍ଚଳରେ ବିଦ୍ୟୁତ ସଂଯୋଗ ବିଚ୍ଛିନ୍ନ ହୋଇଯାଇଛି । ପ୍ରାୟ ୨ ଲକ୍ଷ ୨୫ ହଜାର ଲୋକ ଅନ୍ଧାରରେ ରହିଛନ୍ତି । ଭୂସ୍ଖଳନ ଓ ବନ୍ୟା ଯୋଗୁଁ ବ୍ୟାପକ ଘର ନଷ୍ଟ ହୋଇଛି । ଏପରିକି କିଛି ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ରହିଛି । ଏହାକୁ ନେଇ କେତେକ ସ୍ଥାନରେ ଟ୍ରେନ ଓ ବିମାନ ଚଳାଚଳ ବନ୍ଦ ରହିଥିଲା । ତେବେ ନ୍ୟୁଜିଲାଣ୍ଡରେ ବାତ୍ୟା ଭୟ ଜାରି ରହିଥିବାବେଳେ ଶକ୍ତିଶାଳୀ ଭୂକମ୍ପ ଲୋକଙ୍କୁ ଆହୁରି ଆତଙ୍କିତ କରିଛି ।
