ଭୁବନନେଶ୍ବର: ସାରା ବିଶ୍ବରେ ଏବେ କୋରୋନା ଭାଇରସ ବ୍ୟାପିଥିବାବେଳେ, ଏଥିରେ ଗଲାଣି ଲକ୍ଷାଧିକ ଲୋକଙ୍କ ଜୀବନ । ଏଥିରେ ଭାରତରେ ମଧ୍ୟ ଅନେକ ଲୋକ ଆକ୍ରାନ୍ତ ହୋଇଥିବାବେଳେ ଅନେକ ଜୀବନ ହାରିଲେଣି । କୋରୋନା ମୁକାବିଲା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରକାରର ପ୍ରତିଶେଧକ କାର୍ଯ୍ୟ କରାଯାଉଥିବା ବେଳେ,ବିଭିନ୍ନ ସ୍ଵେଚ୍ଛାସେବୀ ସଂଘଠନ, ସମାଜସେବୀ ମାନେ କୋରୋନା ମହାମାରୀ ରୋକିବା ପାଇଁ ବିଭିନ୍ନ ଉପାୟରେ ସହଯୋଗର ହାତବଢାଉଛନ୍ତି ।
ହେଲେ କିଛି ଏମିତି ବ୍ୟକ୍ତି ବିଶେଷ ରହିଛନ୍ତି, ଯେଉଁମାନେ ସ୍ଵଇଚ୍ଛାରେ ଆଗେଇ ଆସିଛନ୍ତି ସହଯୋଗ କରିବା ପାଇଁ ,ଏହିଭଳି ଜଣେ ୬୧ ବର୍ଷୀୟ ମହିଳା ନିଜକୁ କୋରୋନା ଯୁଦ୍ଧରେ ସାମିଲ କରିଛନ୍ତି । ଲକଡାଉନ ସମୟରେ ନିଜ ସାହିର ଲୋକଙ୍କ ପାଇଁ ମାସ୍କ ତିଆରି କରୁଛନ୍ତି ଭୁବନେଶ୍ୱର ଲକ୍ଷ୍ମୀସାଗର ଅଞ୍ଚଳର 61 ବର୍ଷୀୟା ଜ୍ୟୋସ୍ନା ରାଣୀ ମହାନ୍ତି । ଖାଲି ତିଆରି କରୁ ନାହାନ୍ତି ପରିଣତ ବୟସରେ ଘର ଘର ବୁଲି ବାଣ୍ଟୁଛନ୍ତି ମଧ୍ୟ । ଲକ୍ଷ୍ମୀସାଗରରେ ରହୁଥୁବା ଜ୍ୟୋସ୍ନାଙ୍କୁ କାମରେ ସାହାଯ୍ୟ କରନ୍ତି ତାଙ୍କର ପୁରା ପରିବାର।
ଏହାବ୍ୟତୀତ ଜ୍ୟୋସ୍ନାରାଣୀଙ୍କ ଘରେ ଭଡାନେଇ ରହୁଥିବା ଲୋକଙ୍କ ଘରଭଡା ବି ଛାଡ କରିଛନ୍ତି । ସୂଚନା ଅନୁସାରେ ଘରଭଡା ବାବଦରେ ୨୫ ହଜାର ଟଙ୍କା ଛାଡକରିଛନ୍ତି ଜ୍ୟୋସ୍ନାରାଣୀ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ