ନୂଆଦିଲ୍ଲୀ: ଭାରତରେ ଯେପରି ଭାବେ କୋରୋନା ସଂକ୍ରମଣ ସଂଖ୍ୟା ବୃଦ୍ଧି ପାଉଛି, ସେହିପରି ଭାବେ ସ୍ବାସ୍ଥ୍ୟମନ୍ତ୍ରାଳୟ ପକ୍ଷରୁ କୋଭିଡ ସାମ୍ପଲ ଟେଷ୍ଟର ସଂଖ୍ୟାକୁ ବଢାଇ ଦିଆଯାଇଛି । ଏନେଇ ଦେଶର ବିଭିନ୍ନ ପ୍ରାନ୍ତରେ ଟେଷ୍ଟିଂ ଲ୍ୟାବ ଗୁଡିକ ଖୋଲାଯାଉଛି । ଆଉ ଏଠି ଅହରହ ଟେଷ୍ଟ ଜାରି ରହିଛି ।
ଇଣ୍ଡିଆନ କାଉସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ରିପୋର୍ଟ ମୁତାବକ, ଗତ 24 ଘଣ୍ଟାରେ ଦେଶରେ 5 ଲକ୍ଷ 98 ହଜାର 778ଟି ସାମ୍ପଲ ଟେଷ୍ଟ ହୋଇଛି, ଯାହାକୁ ନେଇ ଅଗଷ୍ଟ 7 ଶୁକ୍ରବାର ସୁଦ୍ଧା 2 କୋଟି 33 ଲକ୍ଷ 87 ହଜାର 171 କୋଭିଡ ଟେଷ୍ଟ ସରିଛି ।
ତେବେ ବର୍ତ୍ତମାନ ଦେଶରେ 20 ଲକ୍ଷ 88 ହଜାର 612ରେ ପହଞ୍ଚିଛି ସଂକ୍ରମଣ ସଂଖ୍ୟା । ଏଥିରେ 42 ହଜାର 518 ଜଣଙ୍କର ମୃତ୍ୟୁ ହୋଇଛି । 14 ଲକ୍ଷ 27 ହଜାରରୁ ଉର୍ଦ୍ଧ୍ବ ସଂକ୍ରମିତ ସୁସ୍ଥ ହୋଇଥିବାବେଳେ, ଅଦ୍ୟାବଧି 6 ଲକ୍ଷ 19 ହଜାର 88 ଜଣ ଚିକିତ୍ସାଧୀନ ଅଛନ୍ତି ।
