କୋଲକାତା: ବହୁ ଚର୍ଚ୍ଚିତ ଆରଜି କର ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା । ଅଭୟାଙ୍କ ମାଆଙ୍କ ଚିଠି ଭାଇରାଲ ହେବାରେ ଲାଗିଛି । ଏହି କାଗଜ ଖଣ୍ଡରେ ଯାହା ଲେଖା ଅଛି, ତାହାକୁ ଦେଖିବା ପରେ ଆପଣଙ୍କ ଆଖିର ଲୁହ ବୋଲ ମାନିବନି । ଝିଅକୁ ନ୍ୟାୟ ପାଇଁ ସମସ୍ତଙ୍କ ସହଯୋଗ କାମନା କରିଛନ୍ତି ପୀଡିତାଙ୍କ ମାଆ । ଯାହାକି ଗୁରୁ ଦିବସ ଦିନର ହୋଇଥିବା ଜଣାପପଡ଼ିଛି ।
ଚିଠିରେ ଏମିତି ଲେଖିଥିଲେ ଅଭୟାଙ୍କ ମା':
ଆଜି ଗୁରୁଦିବସରେ ସମସ୍ତ ଗୁରୁଙ୍କୁ ମୋ ଝିଅ ତରଫରୁ ମୁଁ ପ୍ରଣାମ ଜଣାଉଛି । ସେମାନେ ମୋ ଝିଅକୁ ତା ପାଠପଢା ସମୟରେ ଗାଇଡ୍ କରିଥିଲେ । ମୁଁ ହେଉଛି ସେହି ହତଭାଗିନୀର ମାଆ । ପିଲାଟି ଦିନରୁ ଡାକ୍ତର ହେବା ତା'ର ସ୍ବପ୍ନ ଥିଲା । ଆପଣମାନଙ୍କ ଭଳି ଉପଯୁକ୍ତ ଗୁରୁ ତା'ର ମାର୍ଗଦର୍ଶକ ସାଜିଥିଲେ । ତେଣୁ ସେ ତା' ଲକ୍ଷ୍ୟ ସ୍ଥଳରେ ପହଞ୍ଚି ପାରିଥିଲା ।"
'ନ୍ୟାୟ ପାଇଁ ସହଯୋଗ କର'
ଅଭୟାଙ୍କ ମା' ଆହୁରି କହିଛନ୍ତି, "ମୋ ଝିଅ ସବୁବେଳେ କୁହେ ଯେ ମାଆ...ମୋତେ ଟଙ୍କା ଦରକାର ନାହିଁ । ମୁଁ କେବଳ ମୋ ନା ପଛରେ ବହୁ ଡିଗ୍ରୀ ଚାହେଁ । ମୁଁ ସବୁ ରୋଗୀଙ୍କୁ ସୁସ୍ଥ କରିବାକୁ ଚାହେଁ । ଜଣେ ମାଆ ହିସାବରେ ସମସ୍ତ ଶିକ୍ଷକ, ଶିକ୍ଷୟିତ୍ରୀ, ନର୍ସିଂ ଷ୍ଟାଫଙ୍କୁ ମୋର ଅନୁରୋଧ, ନ୍ୟାୟ ପାଇଁ ସହଯୋଗ କରନ୍ତୁ । କେତେକ ଭଲ ଲୋକଙ୍କ ନୀରବତା ନ୍ୟାୟ ପ୍ରକ୍ରିୟାକୁ ବିଳମ୍ବ କରେ । ଅପରାଧୀକୁ ଖସିଯିବାକୁ ସହଜ ହୁଏ । ସବୁ ସାଧାରଣ ଲୋକଙ୍କୁ ମେଡିକାଲ ସୋସାଇଟି ସହ ଛିଡା ହେବାକୁ ମୋର ଅନୁରୋଧ ।"
ବିଦେଶରେ 'Justice For Abhaya' ନାରା !
ଅଭୟାଙ୍କ ପାଇଁ ନ୍ୟାୟ ମାଗିବ ବିଶ୍ବ । ଖାଲି ଦେଶ ନୁହେଁ, ବିଦେଶରେ ମଧ୍ୟ ଜଷ୍ଟିସ ଫର୍ ଅଭୟା ସ୍ବର ଶୁଭିବ । ଏନେଇ କୋଲକାତାର ଏକ ସଂଗଠନ ପକ୍ଷରୁ ଆହ୍ବାନ ଦିଆଯାଇଛି । ଆମେରିକା, ବ୍ରିଟେନ, ଆୟରଲ୍ୟାଣ୍ଡ, କାନାଡା, ଜର୍ମାନୀ, ନେଦରଲ୍ୟାଣ୍ଡସ, ଅଷ୍ଟ୍ରେଲିଆ ଭଳି ଦେଶରେ ବିକ୍ଷୋଭ କରାଯିବାକୁ ଆହ୍ବାନ ଦିଆଯାଇଛି । ଡାକ୍ତରଙ୍କ ସମେତ ଛାତ୍ରଛାତ୍ରୀ ଏନେଇ ସ୍ବର ଉଠାଇବାକୁ କୁହାଯାଇଛି ।
କ'ଣ ଥିଲା ସେଦିନ ରାତିର ଘଟଣା?
ସୂଚନାନୁସାରେ, ପୀଡିତା ଏବଂ ଦୁଇଜଣ ପ୍ରଥମ ବର୍ଷର ସ୍ନାତକୋତ୍ତର ଟ୍ରେନି ଡାକ୍ତର ପ୍ରାୟ ମଧ୍ୟରାତ୍ରିରେ ଏକାଠୀ ରାତ୍ରୀଭୋଜନ କରିଥିଲେ । ତା’ପରେ ସେମାନେ ସେମିନାର ରୁମକୁ ଯାଇ କିଛି ସମୟ ବିଶ୍ରାମ କରିଥିଲେ । ସେଠାରେ ସେମାନେ ଅଲିମ୍ପିକ୍ସରେ ନୀରଜ ଚୋପ୍ରାଙ୍କ ଜାଭେଲିନ୍ ଇଭେଣ୍ଟ ଦେଖିଥିଲେ । ରାତି ପ୍ରାୟ 2ଟା ସମୟରେ ଦୁଇ ସହକର୍ମୀ ସେମିନାର ହଲରୁ ଶୟନ କୋଠରୀକୁ ଯାଇଥିଲେ । ସେଠାରେ ସେମାନେ ଡ୍ୟୁଟିରେ ଥିବା ଡାକ୍ତରମାନଙ୍କ ବିଶ୍ରାମ ପାଇଁ ଥିବା ପ୍ରକୋଷ୍ଠରେ ବିଶ୍ରାମ କରିଥିଲେ । କିନ୍ତୁ ପୀଡିତା ସେମିନାର ରୁମରେ ରହିଥିଲେ । ପୂର୍ବାହ୍ନ ପ୍ରାୟ 9.30 ସମୟରେ ପୀଡିତାଙ୍କ ସହ ରାତ୍ରିଭୋଜନ କରିଥିବା ଜଣେ ଟ୍ରେନି ଡାକ୍ତର ସେମିନାର ହଲକୁ ଯାଇଥିଲେ । ସେଠାରେ ପୀଡିତାଙ୍କ କ୍ଷତାକ୍ତ ମୃତଦେହ ଦେଖିବାକୁ ପାଇଥିଲେ । ପୀଡିତାଙ୍କୁ ଅତି ନିର୍ମମ ଭାବେ ଦୁଷ୍କର୍ମ ପରେ ହତ୍ୟା କରାଯାଇଥିବା ଅଭିଯୋଗ ରହିଛି ।
