ବାଲେଶ୍ଵରରେ ଇଦପର୍ବରେ ସାମିଲ ଶ୍ରୀକାନ୍ତ ଜେନା, ସାଂସଦ ପ୍ରାର୍ଥୀ ନେଇ ଦେଲେ ଇସାରା - Srikant Jena Visit balasore

SRIKANT JENA VISIT BALASORE: ବାଲେଶ୍ବର: ଆଜି ପବିତ୍ର ଇଦରେ ମୁସଲମାନ ଭାଇଭଉଣୀଙ୍କ ସହ ସାମିଲ ହୋଇ ଇଦ ଶୁଭେଚ୍ଛା ଜଣାଇଛନ୍ତି ବାଲେଶ୍ବରର ପୂର୍ବତନ ସାଂସଦ ଶ୍ରୀକାନ୍ତ ଜେନା । ଗୋଟପଟେ ବାଲେଶ୍ବର ଲୋକସଭା ଆସନରୁ କଂଗ୍ରେସ ଦଳର ପ୍ରାର୍ଥୀ ହେବା ନେଇ ଶ୍ରୀକାନ୍ତଙ୍କ ନାଁ ଚର୍ଚ୍ଚା ହେଉଥିବା ବେଳେ ଆଜି ତାଙ୍କର ବାଲେଶ୍ବରରେ ଉପସ୍ଥିତିକୁ ନେଇ ଆହୁରି ଚର୍ଚ୍ଚା ଜୋର ଧରିଛି । ବାଲେଶ୍ବରର ପ୍ରସିଦ୍ଧ ଧାର୍ମିକ ସ୍ଥଳୀ ଭୁଜାଖିଆ ପୀର ବାବାଙ୍କ ପାଖରେ ସନ୍ଧ୍ୟା ସମୟରେ ଶ୍ରୀକାନ୍ତ ପହଞ୍ଚି ନିଜ ସମର୍ଥକମାନଙ୍କ ସହ ଭୁଜାଖିଆ ପୀରବାବାଙ୍କୁ ଚାଦର ଚଢାଇଥିଲେ ।

ନିଜର ସମର୍ଥକମାନଙ୍କ ସହ ବେଶ କିଛି ସମୟ ଆଲୋଚନା ମଧ୍ୟ କରିଥିଲେ । କଂଗ୍ରେସ ଦଳର ବହୁ ପୁରୁଣା ନେତାଙ୍କୁ ମଧ୍ୟ ଶ୍ରୀକାନ୍ତ ଜେନାଙ୍କ ସହ ଦେଖିବାକୁ ମିଳିଥିଲା । ଗୋଟିଏ ପଟେ ବାଲେଶ୍ଵର ଲୋକସଭା ଆସନ ପାଇଁ ବିଜେପି ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କୁ ପ୍ରାର୍ଥୀ କରିଥିବା ବେଳେ ବିଜେଡି ଆଜି ଲେଖାଶ୍ରୀ ସାମନ୍ତ ସିଂହାରଙ୍କୁ ପ୍ରାର୍ଥୀ କରିଛି । ଏହାରି ଭିତରେ ଶ୍ରୀକାନ୍ତ ଜେନାଙ୍କ ଏମିତି ଅଚାନକ ଗସ୍ତ ତାଙ୍କର ପ୍ରାର୍ଥୀ ହେବା ନେଇ ଇଙ୍ଗିତ କରୁଛି ।  

ଏହା ମଧ୍ୟ ପଢନ୍ତୁ ... ବିଜେପି ସାଂସଦ ପ୍ରାର୍ଥୀଙ୍କ ରାଲି ଅଟକାଇଲା ବିଜେପି ! - Baramba Assembly Constituency

ଅବଶ୍ୟ ଶ୍ରୀକାନ୍ତ ନିଜ ପ୍ରତିକ୍ରିୟାରେ ଏ ବାବଦରେ କିଛି କହି ନାହାଁନ୍ତି ମାତ୍ର ଦଳ ଯାହା ନିଷ୍ପତ୍ତି ନେବ ଏବଂ ଦଳୀୟ ନିର୍ଦ୍ଦେଶ ଅନୁସାରେ ଶ୍ରୀକାନ୍ତ ସମସ୍ତ କାର୍ଯ୍ୟ କରିବା ନେଇ ପ୍ରତିକ୍ରିୟା ପ୍ରକାଶ କରିଛନ୍ତି । ପୁଣିଥରେ ଶ୍ରୀକାନ୍ତ ଦୋହାରାଇଛନ୍ତି ଯେ, ଦିଲ୍ଲୀ ବାଲେଶ୍ଵର ଆସିବ, ଯଦି ତାଙ୍କ କାର୍ଯ୍ୟକାଳ ସମୟରେ ଦିଲ୍ଲୀ ବାଲେଶ୍ଵର ଆସିଥିବ ତେବେ ଏଥର ପୁଣି ସେ ପ୍ରାର୍ଥୀ ହେଲେ ଏବଂ ବିଜୟ ଲାଭ କଲେ ଦିଲ୍ଲୀ ଆଉଥରେ ବାଲେଶ୍ଵର ଆସିବ ବୋଲି କହିଛନ୍ତି । ତେବେ ଅନ୍ୟଦଳର କୌଣସି ପ୍ରାର୍ଥୀଙ୍କ ବିରୋଧରେ କିଛି କହିବାକୁ ସେ ମନା କରିଛନ୍ତି। 

ଇଟିଭି ଭାରତ, ବାଲେଶ୍ବର