'ପୁଣି ଥରେ ନବୀନ' କାର୍ଯ୍ୟକ୍ରମ ମାଧ୍ୟମରେ ଦାମଙ୍କୁ ଧରି ସମ୍ବିତଙ୍କ ଶକ୍ତି ପ୍ରଦର୍ଶନ

Paradip Assembly Constituency: ଜଗତସିଂହପୁର: ନିର୍ବାଚନ ପାଖେଇ ଆସୁଥିବା ବେଳେ ପାରାଦ୍ୱୀପ ନିର୍ବାଚନ ମଣ୍ଡଳୀରେ ନିଜର ଶକ୍ତି ପ୍ରଦର୍ଶନ କରିଛନ୍ତି ବିଧାୟକ ସମ୍ବିତ ରାଉତରାୟ । ସମ୍ବିତ ରାହମା ବଜାର ନିକଟରୁ ଏକ ଶୋଭାଯାତ୍ରାରେ ବାହାରି କୁଜଙ୍ଗ ବଜାର ପଡ଼ିଆରେ ଏକ ବନ୍ଧୁ ମିଳନ ଓ ପୁଣି ଥରେ ନବୀନ କାର୍ଯ୍ୟକ୍ରମରେ ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ ବରିଷ୍ଠ ନେତା ତଥା ସମ୍ବିତଙ୍କ ବାପା ଦାମୋଦର ରାଉତ ମଧ୍ୟ ଉପସ୍ଥିତ ଥିଲେ । ନିଜ ଅଭିଭାଷଣରେ ଦାମ କହିଛନ୍ତି ଯେ, ରାଜ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ଵାରା ବହୁତ ଲୋକାଭିମୁଖୀ କାର୍ଯ୍ୟ କରାଯାଉଛି । ସେ ଯେତେବେଳେ ସରକାରୀ ଚାକିରି କରୁଥିଲେ ସେ ସମୟରେ ତାଙ୍କୁ ବିଜୁ ପଟ୍ଟନାୟକ ରାଜନୀତିରେ ଯୋଗ ଦେବାକୁ କହିଥିଲେ । ସେ ବିଜୁ ପଟ୍ଟନାୟକଙ୍କ କଥାରେ ସରକାରୀ ଚାକିରି ଛାଡି ରାଜନୀତିରେ ଯୋଗ ଦେଇଥିଲେ । ପରେ ଅନେକ ଥର ବିଧାନସଭାକୁ ନିର୍ବାଚିତ ହୋଇଥିଲେ ।  

ସେ ଏହା ମଧ୍ୟ କହିଛନ୍ତି ଯେ, ସେ ଏହି କାର୍ଯ୍ୟକ୍ରମକୁ  କୌଣସି ରାଜନୈତିକ କଥା କହିବାକୁ ଆସିନାହାନ୍ତି । ତାଙ୍କ ପ୍ରତି ପାରାଦ୍ୱୀପ କୁଜଙ୍ଗର ଜନ ସାଧାରଣ ଯେଉଁ ଭଲ ପାଇବା ରହିଛି ସେଥିପାଇଁ ସେ ରୋଗଗ୍ରସ୍ତ ଥିଲେ ମଧ୍ୟ ଆଜି ଭେଟିବାକୁ ଆସିଛନ୍ତି । ଏହି କାର୍ଯ୍ୟକ୍ରମରେ ବାଙ୍କୀର ପୂର୍ବତନ ବିଧାୟକ ପ୍ରଭାତ ତ୍ରିପାଠୀ ଯୋଗଦେଇ ରାଜ୍ୟରେ ନବୀନ ପଟ୍ଟନାୟକଙ୍କ ଶାସନ ସମୟରେ ବହୁତ କିଛି ଉନ୍ନତି ହୋଇଥିବା ସେ କହଛନ୍ତି । ଏହିସହ କାର୍ଯ୍ୟକ୍ରମରେ ପୂର୍ବତନ ସାଂସଦ କୁଳମଣି ସାମଲ ଯୋଗ ଦେଇ ପାରାଦ୍ୱୀପ ବିଜେଡିରେ ଯେଉଁ ମନୋମାଳିନ୍ୟ ରହିଛି ତାହାକୁ ସମସ୍ତେ ଭୁଲି ଆଗକୁ ଦଳପାଇଁ କାମ କରିବାକୁ ନିବେଦନ କରିଥିଲେ । ଆଗକୁ ନିର୍ବାଚନ ଆସୁଥିବାରୁ ହାତଟା ସମ୍ବିତ କଣ ପାଇଁ ନିଜ ବାପା ଦାମ ରାଉତଙ୍କୁ ଆଣି ଶକ୍ତି ପଦର୍ଶନ କଲେ ତାକୁ ନେଇ ରାଜନୈତିକ ମହଲରେ ଆଲୋଚନା ହେଉଛି ।

ଇଟିଭି ଭାରତ, ଜଗତସିଂହପୁର