ଆରମ୍ଭ ହେଲା ଜାତୀୟସ୍ତରୀୟ ପଲ୍ଲିଶ୍ରୀ ମେଳା, ଝଲସୁଛି ମହିଳାଙ୍କ ହାତତିଆରି ସାମଗ୍ରୀ

PALLISHREE MELA: ବାଲେଶ୍ବର: ପାରମ୍ପରିକ ନାଚ,ଗୀତରେ ଦୁଲୁକିଲା ବାଲେଶ୍ବର । ଆରମ୍ଭ ହେଲା ଜାତୀୟସ୍ତରୀୟ ପଲ୍ଲିଶ୍ରୀ ମେଳା 'କୋଶମ୍ୱ -୨୦୨୫' । ଗତକାଲି (ସୋମବାର) ସନ୍ଧ୍ୟାରେ ପୋଲିସ ଲାଇନ୍‌ ରିଜର୍ଭ ପଡ଼ିଆରେ ବାଲେଶ୍ବର ଜିଲ୍ଲା ମହୋତ୍ସବ ତଥା ପଲ୍ଲିଶ୍ରୀ ମେଳା ‘କୋଶମ୍ୱ -୨୦୨୫’ ଉଦଘାଟିତ ହୋଇଛି । ଏହାକୁ ସରକାରୀ ଦଳର ଉପମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଏହି ମେଳାରେ ଦେଶର ୧୦ଟି ରାଜ୍ୟ ଭାଗ ନେଇଥିବା ବେଳେ ଓଡ଼ିଶାର ୩୦ଟି ଜିଲ୍ଲା ନିଜର ବିବିଧ ସଂସ୍କୃତିର ପ୍ରଦର୍ଶନ କରିଛନ୍ତି । ଏହା ଆସନ୍ତା 19 ତାରିଖ ଯାଏଁ ଚାଲିବ ।

ଏହି ଅବସରରେ ସରକାରୀ ଦଳର ଉପମୁଖ୍ୟ ସଚେତକ ଗୋବିନ୍ଦ ଚନ୍ଦ୍ର ଦାସ କହିଛନ୍ତି,"ଭଲ ଆୟୋଜନ ହୋଇଛି । ବିଗତ ଦିନମାନଙ୍କରେ ଲୋକମାନେ ବୁଲିବା ବେଳେ ଧୂଳି ଉଡ଼ିଥାଏ । ଏଥର କିନ୍ତୁ ମ୍ୟାଟ୍ ପକାଯାଇଛି । ନିଶ୍ଚିତ ପ୍ରଶାସନକୁ ଧନ୍ୟବାଦ ଦେବି । ଲୋକମାନେ ଏହି ମେଳାରେ ମଜା ନେବା ସହ ଜିନିଷ କିଣିବେ । ଏହି ମେଳାରେ ଯେଉଁମାନେ ଅନ୍ୟ ସ୍ଥାନରୁ ଆସି ସାମିଲ ହୋଇଛନ୍ତି । ସେମାନଙ୍କୁ ଆମେ ସ୍ୱାଗତ କରୁଛୁ ।"

ଅନ୍ୟପଟେ ବାଲେଶ୍ୱର ଜିଲ୍ଲାପାଳ ସୂର୍ଯ୍ୟବଂଶୀ ମୟୁର ବିକାଶ କହିଛନ୍ତି," ମେଳାକୁ 305ଟି ଷ୍ଟଲ ଆସିଛି । ଓଡ଼ିଶାର ସବୁ ଜିଲ୍ଲା ସମେତ 10ଟି ରାଜ୍ୟରୁ ବ୍ୟବସାୟୀମାନେ ଆସିଛନ୍ତି ।ଏଥର ସମ୍ପୂର୍ଣ୍ଣ ଭାବେ ପ୍ଲାଷ୍ଟିକ ମୁକ୍ତ ପରିବେଶ କରାଯାଇଛି । ବହୁତ ମହିଳାମାନଙ୍କର ଷ୍ଟଲ ଲାଗିଛି । " ତେବେ ସବୁଠୁ ବଡ଼କଥା ହେଲା ଏହି ମେଳାରେ ମହିଳାମାନଙ୍କ ଦ୍ୱାରା ବିଭିନ୍ନ ପ୍ରକାର ହାତ ତିଆରି ସାମଗ୍ରୀ ମିଳୁଛି । ହସ୍ତକଳା ବିଭାଗ ପକ୍ଷରୁ ମେଳାରେ 35ଟି ଷ୍ଟଲ ଖୋଲାଯାଇଛି । ଯେଉଁଥିରେ ବିଭିନ୍ନ ହସ୍ତଶିଳ୍ପ କାରିଗରମାନେ ଯୋଗଦେଇଛନ୍ତି। ଟେରାକୋଟା, ଚାନ୍ଦୁଆ, ଝୋଟ, ସବାଇ ଘାସ, କେନ, ବାଉଁଶ, ଲାଖ ହସ୍ତଶିଳ୍ପ, ପଥର, କନା କଣ୍ଢେଇ ଭଳି ବିଭିନ୍ନ ପ୍ରକାର ହସ୍ତଶିଳ୍ପ ମେଳାରେ ଶୋଭା ପାଇଛି।

 ଇଟିଭି ଭାରତ, ବାଲେଶ୍ବର