ଯାଜପୁର ସମର, ନାମାଙ୍କନ ଭରିଲେ ବିଭିନ୍ନ ଦଳର 6 ବିଧାୟକ ପ୍ରାର୍ଥୀ - Odisha Assembly Election 2024

Odisha Assembly Election 2024: ଯାଜପୁର: ସାଧାରଣ ନିର୍ବାଚନ ପାଇଁ ଯାଜପୁର ଜିଲ୍ଲାରେ ଆଜି ନାମାଙ୍କନ ପତ୍ର ଦାଖଲ ପ୍ରକ୍ରିୟା 3ୟ ଦିନରେ ପହଞ୍ଚିଛି । ଆଜି 3ୟ ଦିନରେ ବିଜେଡିର ଦୁଇଜଣ ବିଧାୟକ ପ୍ରାର୍ଥୀ ଓ କଂଗ୍ରେସର ଦୁଇଜଣ ବିଧାୟକ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଛନ୍ତି । ସେହିପରି ଜଣେ ଏକତାରୁ ଏବଂ ସ୍ଵାଧୀନରୁ ଜଣେ ପ୍ରାର୍ଥୀଙ୍କୁ ମିଶାଇ ଆଜି ମୋଟ 6 ଜଣ ପ୍ରାର୍ଥୀ ନିଜର ନାମାଙ୍କନ ପତ୍ର ଦାଖଲ କରିଛନ୍ତି ।  

ବିଜେଡିର କୋରେଇ ବିଧାନସଭା ପ୍ରାର୍ଥୀ ସନ୍ଧ୍ୟାରାଣୀ ଦାସ ଓ ବିଞ୍ଝାରପୁର ବିଧାୟକ ପ୍ରାର୍ଥୀ ପ୍ରମିଳା ମଲ୍ଲିକ ନାମାଙ୍କନ ଦାଖଲ କରିଛନ୍ତି । ସେହିପରି କଂଗ୍ରେସରୁ ଧର୍ମଶାଳା ବିଧାୟକ ପ୍ରାର୍ଥୀ କିଶନ ପଣ୍ଡା ଓ କୋରେଇ ବିଧାୟକ ପ୍ରାର୍ଥୀ ବନ୍ଦିତା ପରିଡ଼ା ନାମାଙ୍କନ ଭରିଛନ୍ତି । ଏକତା ପାର୍ଟିରୁ କୋରେଇ ପ୍ରାର୍ଥୀ ଭାବେ ସରୋଜ କର ଏବଂ ସ୍ଵାଧୀନ ପ୍ରାର୍ଥୀ ଭାବେ କୋରେଇରୁ ମନୋଜ ପଣ୍ଡା ନିଜ ନିଜ ସମର୍ଥକଙ୍କ ସହିତ ଆସି ନାମାଙ୍କନ ଦାଖଲ କରିଛନ୍ତି । ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ଓ ବିଭିନ୍ନ ସରକାରୀ ଲୋକାଭିମୁଖୀ ଯୋଜନାକୁ ମାଧ୍ୟମ କରି ନିର୍ବାଚନରେ ବହୁ ଭୋଟରେ ବିଜୟ ହେବେ ବୋଲି ବିଜେଡ଼ି ପ୍ରାର୍ଥୀ ମାନେ ଆଶାବାଦୀ ଅଛନ୍ତି । ସେପଟେ କେନ୍ଦ୍ର ଓ ରାଜ୍ୟ ସରକାରଙ୍କ ବିରୋଧରେ ବିଭିନ୍ନ ପ୍ରସଙ୍ଗକୁ ପାଥେୟ କରି କଂଗ୍ରେସ ପ୍ରାର୍ଥୀ ନିର୍ବାଚନ ବୈତରଣୀ ପାରି ହେବେ ବୋଲି କହିଛନ୍ତି ।  

ଇଟିଭି ଭାରତ, ଯାଜପୁର