ଭୋଟ ଦେଉଛି ଖୋର୍ଦ୍ଧା: ଉତ୍ସାହିତ ଭୋଟର, ବୁଥରେ ଲମ୍ବା ଲାଇନ - KHORDHA VOTING

Khordha voting: ଖୋର୍ଦ୍ଧା: ଜିଲ୍ଲାର ବିଭିନ୍ନ ବୁଥରେ ସକାଳ 7ଟାରୁ ଆରମ୍ଭ ହୋଇଯାଇଛି ଗଣତନ୍ତ୍ରର ମହାପର୍ବ ନିର୍ବାଚନ । ମତଦାତାଙ୍କ ଠାରେ ଉତ୍ସାହ ଭରି ରହିଥିବା ଦେଖିବାକୁ ମିଳିଛି । ସେହିଭଳି ଆଜି ଖୋର୍ଦ୍ଧା ଜିଲ୍ଲାର 136 ନମ୍ବର ବୁଥରେ ମତଦାନ ଆରମ୍ଭର କିଛି ସମୟ ପରେ ଭିଭିପାଟ ମେସିନରେ ତ୍ରୁଟି ଦେଖାଯାଇଥିଲା ଓ ସଙ୍ଗେ ସଙ୍ଗେ ଅନ୍ୟ ଏକ ମେସିନ ଲଗାଯାଇ ପୁନଃ ଶୃଙ୍ଖଳାର ସହ ମତଦାନ ଆରମ୍ଭ ହୋଇଥିଲା । 

ସେହିପରି ବେଗୁନିଆ ବିଜେଡି ପ୍ରାର୍ଥୀ ପ୍ରଦୀପ ସାହୁ 136 ନମ୍ବର ବୁଥରେ ଧାଡିରେ ରହି ନିଜ ମତଦାନ କରିଛନ୍ତି । ନିର୍ବାଚନକୁ ସ୍ୱଚ୍ଛ, ଅବାଧ ନିରପେକ୍ଷ ଓ ହିଂସା ମୁକ୍ତ କରିବା ପାଇଁ ରାଜ୍ୟ ପୋଲିସ ସହ କେନ୍ଦ୍ରୀୟ ପୋଲିସ ଟିମ ମୁତୟନ କରାଯାଇଛି । ସେହିଭଳି ସୁରକ୍ଷିତ ମତଦାନ ଓ ଭୋଟରଙ୍କ ସୁବିଧା ପାଇଁ ବୁଥ ମାନଙ୍କରେ ଟେଣ୍ଟ, ଜରୁରିକାଳୀନ ମେଡ଼ିସିନ, ଓ଼ଆରଏସ ସହ ଆଶା ଦିଦି ସଜାଗ ହୋଇ ରହିଥିବା ଦେଖିବାକୁ ମିଳୁଛି । ବିଶେଷ ଭାବେ ସମ୍ବେଦନଶୀଳ ଓ ଅତି ସମ୍ବେଦନଶୀଳ ବୁଥ ମାନଙ୍କରେ ଲାଇଭ ସିସିଟିଭି ପ୍ରସାରଣ କରାଯାଉଥିବା ଦେଖିବାକୁ ମିଳିଛି । ଖୋର୍ଦ୍ଧାର ବିଭିନ୍ନ ବୁଥ ମାନଙ୍କରେ ଶାନ୍ତି ଶୃଙ୍ଖଳାର ସହ ମତଦାନ ଚାଲିଥିବା ଦେଖିବାକୁ ମିଳିଛି ।

ଇଟିଭି ଭାରତ, ଖୋର୍ଦ୍ଧା