ହଜାର ହଜାର ସମର୍ଥକଙ୍କ ସହ ଅପରାଜିତାଙ୍କ ରୋଡ ସୋ' - Aparajita Sarangi road show

 Aparajita Sarangi road show: ନିଆଳି: ହାତରେ ଆଉ ଏକ ସପ୍ତାହରୁ କମ ସମୟ । କମ ସମୟ ମଧ୍ୟରେ ଭୋଟର ମାନଙ୍କୁ ମନାଇବା ପାଇଁ ପ୍ରାର୍ଥୀ ମାନଙ୍କ ଆଖିରେ ଆଉ ନିଦ ନାହିଁ ।  ବୈଠକ, ଶୋଭାଯାତ୍ରା ସହ ବିଶାଳ ବାଇକ ରୋଡ ସୋ ' ମାଧ୍ୟମରେ ନିଜର ଶକ୍ତି ପ୍ରଦର୍ଶନ କରୁଛନ୍ତି ପ୍ରାର୍ଥୀ । ଭୁବନେଶ୍ୱର ଲୋକସଭା ଆସନ ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଦ୍ବିତୀୟ ଥର ସାଂସଦ ପଦ ହାତେଇବା ପାଇଁ ପ୍ରୟାସ ଜାରି ରଖିଛନ୍ତି । ଗୁରୁବାର ଦିନ ଅପରାହ୍ନ ସମୟରେ ଜୟଦେବ ବିଧାନସଭା ଆସନ ଅନ୍ତର୍ଗତ ବାଲିଅନ୍ତା ବ୍ଲକ ନିକୁଞ୍ଜବିହାରୀ ମନ୍ଦିରଠାରୁ ଏକ ବିରାଟ ଶୋଭାଯାତ୍ରାରେ ହଜାର ହଜାର ସମର୍ଥକଙ୍କ ସହିତ ରୋଡ ସୋ ମାଧ୍ୟମରେ ନିଜର ଶକ୍ତି ପ୍ରଦର୍ଶନ କରିଥିବା ଦେଖିବାକୁ ମିଳିଛି । 
 

ଏହି ଅବସରରେ ଖୋର୍ଦ୍ଧା ଜିଲ୍ଲା ଏ.ସି ସେଲ ସଭାପତି ଶିବ ପ୍ରସାଦ ମଲ୍ଲିକ କହିଛନ୍ତି, "ନିର୍ବାଚନ ପରିପ୍ରେକ୍ଷୀରେ ଏକ ବିରାଟ ଭବ୍ଯ ମଟର ସାଇକେଲ ରାଲି ପ୍ରମାଣିତ କରୁଛି ଜୟଦେବରେ ଡବଲ ଫୁଲ ଫୁଟିବ । ଜୟଦେବରେ ଦୁଇଟି ପଦ୍ମକୁ ଲୋକେ ଭୋଟ ଦେବେ, ଗୋଟିଏ ବିଧାୟକ ଏବଂ ଆଉ ଗୋଟିଏ ଲୋକସଭା ସାଂସଦ ପ୍ରାର୍ଥୀ ।" ସାଂସଦ ଭାବରେ ଅପରାଜିତା ଷଡ଼ଙ୍ଗୀ ଆଉ ଥରେ ସାଂସଦ ହେବେ ଏବଂ ଜୟଦେବରୁ ଅରବିନ୍ଦ ଢ଼ାଲି ବିଧାୟକ ହେବେ ବୋଲି କହିଛନ୍ତି ଶିବ ପ୍ରସାଦ ମଲ୍ଲିକ । ଦୁର୍ନୀତି ଓ ଭ୍ରଷ୍ଟାଚାର ସରକାରଙ୍କୁ ହଟାଇବା ପାଇଁ ଶିବ ପ୍ରସାଦ ମଲ୍ଲିକ କହିଛନ୍ତି । 

ଭୁବନେଶ୍ୱର ଲୋକସଭା ଆସନରେ ଆସନ୍ତା ୨୫ ତାରିଖରେ ଭୋଟ ଗ୍ରହଣ ହେବ  । ଏହି ଆସନରେ କଂଗ୍ରେସ ସାଂସଦ ପ୍ରାର୍ଥୀ ସୟଦ ୟାସିର ନଓ୍ବାଜ, ବିଜେଡି ମନ୍ମଥ ରାଉତରାୟ ଏବଂ ବିଜେପି ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀଙ୍କ ମଧ୍ୟରେ କଡା ଟକ୍କର ହେବ ।

ଇଟିଭି ଭାରତ, ନିଆଳି