ଘରେ ପଶିଲା ବାଘ, ଧରିପାରିଲାନି ବନବିଭାଗ

Leopard In Rohtas: ପାଟନା: ଜନବସତି ଅଞ୍ଚଳରେ ଆତଙ୍କ ରଚିଛି ବାଘ । ଘର ଭିତରକୁ ବାଘଟି ପଶି ଆସିଥିବାରୁ ଅଞ୍ଚଳରେ ଭୟର ବାତାବରଣ ଖେଳିଯାଇଛି । ବିହାରର ରୋହତାସରେ ଏଭଳି ଘଟଣା ଦେଖିବାକୁ ମିଳିଛି । ଖବର ପାଇ ବନବିଭାଗ ଘଟଣାସ୍ଥଳରେ ପହଞ୍ଚିଥିଲା । ପାଖାପାଖି ୫ ଘଣ୍ଟାର ଅପରେସନ ଚାଲିଥିଲା । ତଥାପି ବାଘଟିକୁ କାବୁ କରିବାରେ ଅସଫଳ ହେଲା ବନବିଭାଗ । ସମସ୍ତଙ୍କୁ ଚକମା ଦେଇ ବାଘଟି ସେଠାରୁ ଖସି ପଳାଇଯାଇଛି । 

ତେବେ ବାଘକୁ କାବୁ କରିବାକୁ ଚେଷ୍ଟା କରାଯାଇଥିବା ସମୟରେ ବାଘଟି ସାମାନ୍ୟ ଆହତ ହୋଇଥିବା କୁହାଯାଉଛି । ଅଞ୍ଚଳରେ ଭୟର ବାତାବରଣ ଖେଳିଯାଇଥିବାବେଳେ ବନବିଭାଗର ବିଫଳତା ଆହୁରି ଚିନ୍ତା ବଢାଇ ଦେଇଛି । ଅପରପକ୍ଷେ ସାବଧାନ ତଥା ସତର୍କ ରହିବାକୁ ଅଞ୍ଚଳବାସୀଙ୍କୁ ପରାମର୍ଶ ଦେଇଛି ବନବିଭାଗ । ଛୋଟ ପିଲାଙ୍କୁ ବାହାରକୁ ନଛାଡିବା ପାଇଁ ବିଭାଗ ପକ୍ଷରୁ ସଚେତନ କରାଯାଇଛି ।