ଇସ୍ପାତ ନଗରୀରେ ହୋଲି ପାଳନ: ଉଡିଲା ଫଗୁ, ନାଚଗୀତରେ ଝୁମିଲେ ରାଉରକେଲାବାସୀ - HOLI 2024

Holi Celebration: ରାଉରକେଲା: ଆଜି ରଙ୍ଗର ପର୍ବ ହୋଲି । ଗାଁ ଠାରୁ ସହର ସବୁଆଡେ ଖୁସିର ମାହୋଲ । ହୋଲିର ରଙ୍ଗରେ ରଙ୍ଗୀନ ହୋଇଯାଉଛନ୍ତି ସମସ୍ତେ । ଏନେଇ ଚଳଚଞ୍ଚଳ ହୋଇ ଉଠିଛି ରାଉରକେଲା ସହର । ସହରର ସମସ୍ତ ଅଞ୍ଚଳରେ ସାଙ୍ଗସାଥି ପରିବାର ଏକାଠି ହୋଇ ପାଳନ କରୁଛନ୍ତି ହୋଲି ଉତ୍ସବ । ଆଜିର ଦିନରେ ଜଣେ ଜଣକୁ ରଙ୍ଗ ବୋଳି ଖୁସି ମନାଇଥାନ୍ତି । ଚାରିଆଡେ ଉଡୁଛି ଫଗୁ ଅବିର । ଗୀତ ଏବଂ ବାଦ୍ୟର ତାଳେ ତାଳେ ମଉଜ ମଜଲିସ ଭରା ଆନନ୍ଦମୟ ପରିବେଶ ସହରବାସୀଙ୍କୁ ଉତ୍ସାହିତ କରିଦେଇଛି । ଲୋକମାନେ ପରସ୍ପର ମଧ୍ୟରେ ହସଖୁସି ଏବଂ ଆନନ୍ଦର ମୁହୂର୍ତ୍ତକୁ ଉପଭୋଗ କରିଛନ୍ତି ।  ସହରର ବିଭିନ୍ନ ସ୍ଥାନରେ ପିଲାଠୁ ବୟସ୍କ ସମସ୍ତେ ହୋଲି ଖେଳରେ ମସଗୁଲ ହୋଇଛନ୍ତି । କେମିକାଲ ରଙ୍ଗ ଶରୀର ଉପରେ କୁପ୍ରଭାବ ପକାଇଥାଏ ବୋଲି କେବଳ ଅବିରରେ ହୋଲି ଖେଳ ଚାଲିଛି । ସବୁଠି ଆଜି ରଙ୍ଗର ପର୍ବ ହୋଲିର ଭିନ୍ନ ଏକ ମାହୋଲ ସୃଷ୍ଟି ହୋଇଥିବା ଦେଖିବାକୁ ମିଳିଛି ।

ଇଟିଭି ଭାରତ, ରାଉରକେଲା