ଛେଣ୍ଡିପଦା-ଅନୁଗୋଳ ପାଇଁ ପାଟପଟୁଆରରେ ଆସି ନାମାଙ୍କନ ଭରିଲେ ଦୁଇ ବିଜେପି ପ୍ରାର୍ଥୀ - Odisha Assembly Election 2024

BJP MLA Candidates file Nomination: ଅନୁଗୋଳ: ଆଜି ଜିଲ୍ଲାର ଛେଣ୍ଡିପଦା ଓ ଅନୁଗୋଳ ବିଧାନସଭା କ୍ଷେତ୍ର ପାଇଁ ବିଜେପିର ଦୁଇ ପ୍ରାର୍ଥୀ ନାମାଙ୍କନ ଭରିଛନ୍ତି । ନାମାଙ୍କନ ଦାଖଲ ପାଇଁ କରାଯାଇଥିବା ଶୋଭାଯାତ୍ରାରେ ସାମିଲ ହୋଇଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଏକ ବିରାଟ ପଟୁଆର ଅନୁଗୋଳ ଶୈଳ ଶ୍ରୀକ୍ଷେତ୍ର ଜଗନ୍ନାଥ ମନ୍ଦିର ନିକଟରୁ ବାହାରିଥିଲା ଶୋଭାଯାତ୍ରା । ପରେ ବିଜେପିର ଦୁଇ ପ୍ରାର୍ଥୀ ଅନୁଗୋଳ ପ୍ରାର୍ଥୀ ପ୍ରତାପ ଚନ୍ଦ୍ର ପ୍ରଧାନ ଏବଂ ଛେଣ୍ଡିପଦା ପ୍ରାର୍ଥୀ ଅଗସ୍ତି ବେହେରା ଅନୁଗୋଳ ଉପଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନାମାଙ୍କନ ଦାଖଲ କରିଛନ୍ତି।    

ଅନୁଗୋଳ ପ୍ରାର୍ଥୀ ପ୍ରତାପ ଚନ୍ଦ୍ର ପ୍ରଧାନ ଏବଂ ଛେଣ୍ଡିପଦା ପ୍ରାର୍ଥୀ ଅଗସ୍ତି ବେହେରା ସକାଳେ ହଜାର ହଜାର କର୍ମୀ ଓ ସମର୍ଥକଙ୍କ ସହ ଆସି ଜଗନ୍ନାଥ ମନ୍ଦିରରେ ପୂଜାର୍ଚ୍ଚନା କରିଥିଲେ । ସେଠାରୁ ବିରାଟ ଶୋଭାଯାତ୍ରାରେ ବାହାରି ଅନୁଗୋଳ ସହର ପରିକ୍ରମା କରିଥିଲେ । ବୁଢ଼ୀ ଠାକୁରାଣୀ ମନ୍ଦିର ଠାରୁ ବଜାର ଛକ ପର୍ଯ୍ୟନ୍ତ କେନ୍ଦ୍ରମନ୍ତ୍ରୀ ବିଧାୟକ ପ୍ରାର୍ଥୀଙ୍କ ସହ ଯାଇଥିଲେ। ସେ ଲୋକଙ୍କୁ ହାତ ଯୋଡ଼ି ପଦ୍ମ ଫୁଲ ଦେଖାଇ ଏହି ଚିହ୍ନରେ ଭୋଟ ଦେବାକୁ ଲୋକଙ୍କୁ ନିବେଦନ କରିଥିଲେ। ତେବେ ପ୍ରବଳ ଖରା ସତ୍ତ୍ୱେ ଉଭୟ ପ୍ରାର୍ଥୀଙ୍କ ହଜାର ହଜାର କର୍ମୀ ଓ ସମର୍ଥକ ସାମିଲ ହୋଇଥିଲେ । ଆଜି ଉଭୟ ଅନୁଗୋଳ ଓ ଛେଣ୍ଡିପଦା ବିଧାୟକ ପ୍ରାର୍ଥୀମାନେ ସେମାନଙ୍କ ଶକ୍ତି ପ୍ରଦଶନ କରିଥିଲେ।

ଇଟିଭି ଭାରତ, ଅନୁଗୋଳ