ଆଠମଲ୍ଲିକରେ ନାମାଙ୍କନ ଦାଖଲ କଲେ ବିଜେଡି ବିଧାୟକ ପ୍ରାର୍ଥୀ ନଳିନୀ ପ୍ରଧାନ - Nalini Pradhan Files Nomination

Athmallik Assembly constituency: ଅନୁଗୋଳ: ଆଜି ଆଠମଲ୍ଲିକର ବିଧାନସଭା କ୍ଷେତ୍ର ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି ବିଜେଡି ବିଧାୟକ ପ୍ରାର୍ଥୀ ନଳିନୀ ପ୍ରଧାନ। ଗତକାଲି ଗୁରୁବାର ନଳିନୀ ହଜାର ହଜାର କର୍ମୀ ଓ ସମର୍ଥକଙ୍କ ସହ ଆଠମଲ୍ଲିକ ମାହେଶ୍ୱରୀ ମନ୍ଦିରରେ ପୂଜାର୍ଚ୍ଚନା କରି ଏକ ବିରାଟ ଶୋଭାଯାତ୍ରାରେ ବାହାରି ସହର ପରିକ୍ରମା କରିବା ପରେ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ଥିଲେ । ତାଙ୍କ ଶୋଭାଯାତ୍ରା ଏଭଳି ଥିଲା ଯେ ସେ ତାଙ୍କର ପତିଆ ପଦର୍ଶନ କରୁଥିବା ଭଳି ମନେ ହେଉଥିଲା । ପୁରା ଆଠମଲ୍ଲିକ ବଜାର ଅଞ୍ଚଳ ଲୋକାରଣ୍ୟ ହୋଇଯାଇଥିଲା ।  

ପ୍ରବଳ ଖରା ସତ୍ତ୍ୱେ ଏତେ ସଂଖ୍ୟାରେ କର୍ମୀ ଓ ସମର୍ଥକଙ୍କୁ ନେଇ ନଳିନୀ ତାଙ୍କର ଶକ୍ତି ପ୍ରଦର୍ଶନ କରିଥିଲେ । ତେବେ ସେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପହଞ୍ଚିବା ପରେ ସେଠାରେ କିଛି ସମୟ ରହି ସେଠାରୁ କେଉଁଆଡ଼େ ଚାଲି ଯାଇଥିଲେ । ଘଟଣାକୁ ନେଇ ନାନା କଳ୍ପନା ଜଳ୍ପନା ଲାଗି ରହିଥିବା ବେଳେ ଆଜି ନଳିନୀ ନିଜ ସମର୍ଥକ ମାନଙ୍କ ସହ ଆସି ନାମାନଙ୍କ ଦାଖଲ କରିଛନ୍ତି । ତେବେ କାଲି କାହିଁକି ନାମାଙ୍କନ ଭରିଲେ ନାହିଁ ସେ ନେଇ କୌଣସି ନିର୍ଦ୍ଦିଷ୍ଟ ଉତ୍ତର ଦେଇ ନଥିଲେ ନଳିନୀ । ଅନ୍ୟପକ୍ଷେ ଲୋକେ ତାକୁ ଯେଉଁଭଳି ସମର୍ଥନ ଦେଇଥିଲେ ତାକୁ ନେଇ ସେ ସନ୍ତୋଷ ବ୍ୟକ୍ତ କରିବା ସହ ଅଞ୍ଚଳ ବିକାଶ ଦିଗରେ କାର୍ଯ୍ୟ କରିବେ ବୋଲି କହିଛନ୍ତି।  

ଇଟିଭି ଭାରତ, ଅନୁଗୋଳ