ଝାରସୁଗୁଡ଼ା ପାଇଁ ନାମାଙ୍କନ ଭରିଲେ ଦୀପାଳି ଦାସ - Dipali Das Files Nomination

Dipali Das Files Nomination: ଝାରସୁଗୁଡ଼ା: ଆଜି ଦ୍ବିତୀୟ ପର୍ଯ୍ୟାୟ ନାମାଙ୍କନ ଦାଖଲର ଶେଷ ତାରିଖ ଥିଲା। ତେବେ ଶେଷ ଦିନରେ ନାମାଙ୍କନ ପତ୍ର ଦାଖଲ କରିଛନ୍ତି ଝାରସୁଗୁଡ଼ା ବିଜୁ ଜନତା ଦଳର ବିଧାୟିକା ପ୍ରାର୍ଥିନୀ ଦୀପାଳି ଦାସ । ଏଥର ପୁଣିଥରେ ଗଡ଼ ହାତେଇବେ ବୋଲି କହିଛନ୍ତି ଦୀପାଳି । ହଜାର ହଜାର ଲୋକଙ୍କ ସହିତ ଏକ ବିରାଟ ଶୋଭାଯାତ୍ରାରେ ଆସି ଦୀପାଳି ନାମାଙ୍କନ ଦାଖଲ କରିଛନ୍ତି।  

ଉପନିର୍ବାଚନରେ ରେକର୍ଡ ସଂଖ୍ୟକ ଭୋଟ ପାଇ ବିଜୟ ହୋଇଥିବା ପୂର୍ବତନ ମନ୍ତ୍ରୀ ସ୍ଵର୍ଗତ ନବକିଶୋର ଦାସଙ୍କ ଝିଅ ଦୀପାଳି ଦାସଙ୍କୁ ବିଜେଡ଼ି ପୁଣିଥରେ ଝାରସୁଗୁଡ଼ା ନିର୍ବାଚନ ମଣ୍ଡଳୀର ବିଧାନସଭା ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଛି। ଆଜି ଦୀପାଳି ଦାସ ଉପଜିଲ୍ଲାପାଳ ତଥା ରିଟର୍ଣ୍ଣିଂ ଅଫିସରଙ୍କ ନିକଟରେ ପ୍ରାର୍ଥିପତ୍ର ଦାଖଲ କରିଛନ୍ତି। ଆଜି ସକାଳୁ ଦୀପାଳି ଦାସ ତାଙ୍କ ଭାଇ ବିଶାଳ ଦାସ ଓ ସମର୍ଥକଙ୍କ ସହ ଶ୍ୟାମଳ ମା’ଙ୍କ ଦର୍ଶନ କରି ଆଶୀର୍ବାଦ ନେଇଥିଲେ। ଏହା ପରେ ଝାରସୁଗୁଡ଼ା ମନମୋହନ ସ୍କୁଲରୁ ଏକ ବିରାଟ ଶୋଭାଯାତ୍ରାରେ ବାହାରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ଯାଇଥିଲେ। ସେଠାରେ ଦୀପାଳି ଦାସ ନାମାଙ୍କନ ଦାଖଲ କରିବା ପରେ ଏସ.ପି କାର୍ଯ୍ୟାଳୟରେ ଥିବା ନବ ଦାସଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ବାପାଙ୍କ ଆଶୀର୍ବାଦ ନେଇଥିଲେ।  ତେବେ ମୁଖ୍ୟମନ୍ତ୍ରୀଙ୍କ ଆଶୀର୍ବାଦ ଓ ଝାରସୁଗୁଡ଼ା ନିର୍ବାଚନ ମଣ୍ଡଳୀର ସମର୍ଥକ, ଭୋଟରଙ୍କ ଆଶୀର୍ବାଦ ସହିତ ଏହି ନିର୍ବାଚନକୁ ସାମ୍ନା କରିବାକୁ ସେ ପ୍ରସ୍ତୁତ ବୋଲି ଦୀପାଳି ଦାସ କହିଥିଲେ।

ଇଟିଭି ଭାରତ, ଝାରସୁଗୁଡ଼ା