मागासवर्गीय कामगाराचं अपहरण करुन मारहाण केल्याप्रकरणी दोघांना अटक, मुख्य आरोपीसह 4 फरार - Latur Crime News

लातूर Latur Crime News : लिफ्टचं काम करणाऱ्या कामगाराचं अपहरण करत 2 दिवस फार्म हाऊसवर डांबून ठेवून दोरीनं बांधून वेळूच्या काठी, रॉड, चप्पल, बेल्टनं अत्यंत अमानुष मारहाण केल्याची घटना 26 मार्च 2024 रोजी लातूरात घडली होती. आनंद प्रल्हाद कोटंबे असं या कामगाराचं नाव आहे. याप्रकरणी पीडित आनंद प्रल्हाद कोटंबे यांनी दिलेल्या तक्रारीवरुन लातूरच्या एमआयडीसी पोलीस ठाण्यात विविध कलमांन्वये शनिवारी डॉ. प्रमोद घुगेंसह सहा जणांवर गुन्हा दाखल करण्यात आला होता. या प्रकरणाचे राज्यभर तीव्र प्रसाद उमटले. राज्यातील विविध मागासवर्गीय संघटनांनी याचा जाहीर निषेध केला. गुन्हा दाखल झाल्यानंतर 5 दिवसांनी पोलिसांनी यातील 2 आरोपींना अटक केली.  लातूरच्या जिल्हा न्यायालयात हजर असता दोन्ही आरोपींना न्यायालयानं एका दिवसाची पोलीस कोठडी सुनावलीय.