मुंबई - जुन्या काळात मित्र मैत्रीणीबरोबर घालवलेले आनंदाचे क्षण, सवंगड्याबरोबर केलेली मजा मस्ती, किरकोळ कारणावरुन झालेली धूस-फुस, रुसवा फुगवी, भांडणं काही काळानंतर आठवलं की गंमत वाटते. शाळेचे ते जुने दिवस किती मंत्रमुग्ध करणारे धमाल होते याची आठवण कायम स्मरणात कोरलेली असते. विचार करा बऱ्याच मोठ्या काळानंतर शाळेतल्या त्या सर्व मित्र-मैत्रिणींबरोबर तुम्हाला धम्माल, मज्जा, मस्ती करण्याची संधी मिळाली तर? रियुनियनची अशीच संधी साधत सेलिब्रेशनसाठी जमलेल्या मित्रांची गोष्ट सांगणारा ‘चिकी चिकी बुबूम बुम’ हा धमाल चित्रपट २८ फेब्रुवारीला चित्रपटगृहात दाखल होत आहे.
खूप वर्षानंतरची भेटीतली गंमत आणि धमाल हे सगळं अनुभवताना येणार काही गोष्टींचं वळण या रियुनियनच्या सेलिब्रेशनमध्ये सहभागी झालेल्या मित्रांच्या आनंदाची रंगत वाढवणार की त्यांची पळता भुई थोडी होणार? हे पाहणं प्रेक्षकांसाठी रंजक असणार आहे. स्वप्नील जोशी, प्रार्थना बेहरे, प्राजक्ता माळी, प्रसाद महादेव खांडेकर, रोहित माने, प्रथमेश शिवलकर, नम्रता संभेराव, वनिता खरात, सचिन गोस्वामी, ओंकार राऊत, प्रियदर्शनी इंदलकर, अभिजीत चव्हाण, निखिल रत्नपारखी, प्रभाकर मोरे, चेतना भट, निखिल बने, श्याम राजपूत, ऐश्वर्या बडदे, श्लोक खांडेकर, प्रमोद बनसोडे या कलाकारांची फौज ‘चिकी चिकी बुबूम बुम’ चित्रपटात हास्याचे फवारे उडवत रंगत आणणार आहेत.
‘इकडे आड तिकडे विहीर’ ‘आगीतून फुफाट्यात’,‘धरलं तर चावतंय सोडलं तर पळतंय’, ‘बुडत्याचा पाय खोलात’, ‘दुष्काळात तेरावा महिना’ या म्हणींतून या बॅकबेंचर्सची मजेशीर ओळख टीझर मधून करून देण्यात आली आहे. या चित्रपटाचा टीझर आणि ‘बुम बुम बुम’ टायटल सॉंग सध्या चर्चेचा विषय ठरला आहे. याबरोबरच 'मित्रा' आणि 'कारभारी' या दोन्ही गाण्यांची मजा रसिक प्रेक्षकांना घेता येणार आहे.
नारकर फिल्म्स अँड एंटरटेनमेंट निर्मित, आयडियाज द एंटरटेनमेंट कंपनी प्रस्तुत आणि स्वर्ण पट कथा आणि प्रजाकार प्रोडक्शन्स यांच्या सहयोगानं बनलेल्या ‘चिकी चिकी बुबूम बुम’ चित्रपटाचं दिग्दर्शन प्रसाद महादेव खांडेकर यांचं आहे. चित्रपटाचे निर्माते सुनील नारकर असून सहनिर्माते सेजल दिपक पेंटर आणि प्रसाद महादेव खांडेकर आहेत. चित्रपटाचं लेखन प्रथमेश शिवलकर, प्रसाद महादेव खांडेकर यांचं आहे. प्रशांत मडपुवार, मंदार चोळकर यांनी लिहिलेल्या गाण्यांना रोहन प्रधान, रोहित राऊत, जुईली जोगळेकर, कविता राम यांचा स्वरसाज आहे. रोहन-रोहन जोडीचं जबरदस्त संगीत चित्रपटाला लाभलं आहे. राहुल ठोंबरे, सुजित कुमार यांनी नृत्यदिग्दर्शन केले आहे. छायांकन गणेश उतेकर तर संकलन निलेश गावंड यांचे आहे.
हेही वाचा -
