पुणे अत्याचार प्रकरणी मुख्यमंत्र्यांनी घेतली गंभीर दखल, आगार व्यवस्थापक आणि स्थानक प्रमुखांवर कारवाईचे परिवहन मंत्र्यांचे निर्देश

पुण्यातील स्वारगेट एसटी बसस्थानकात तरुणीवर नराधमाकडून अत्याचार करण्यात आला. या प्रकरणी मुख्यमंत्री फडणवीस आणि परिवहन मंत्री प्रताप सरनाईक यांनी गंभीर दखल घेतली आहे.

मुंबई : पुण्यातील स्वारगेट बसस्थानकात बुधवारी तरुणीवर झालेल्या अत्याचार प्रकरणाची गंभीर दखल राज्य सरकारनं घेतली आहे. या प्रकरणी सरकार अ‍ॅलर्ट मोडवर आलं आहे. मुख्यमंत्री देवेंद्र फडणवीस यांनी या प्रकरणी पुण्याच्या पोलीस आयुक्तांशी चर्चा केली. त्यांना गंभीरपणे तपास करण्याच्या सूचना दिल्या आहेत. तसंच, परिवहन मंत्री प्रताप सरनाईक यांनी स्वारगेट स्थानकाचे स्थानक व्यवस्थापक आणि स्थानक प्रमुखाची चौकशी करुन दोषी आढळल्यास कारवाई करण्यात येणार असल्याचं जाहीर केलं. या स्थानकात तैनात असलेल्या 23 सुरक्षारक्षकांना हटवून नवीन सुरक्षा रक्षक नेमण्यात येतील, असंही त्यांनी स्पष्ट केलं. या प्रकरणी गुरुवारी दुपारी 12 वाजता महिला प्रवाशांच्या सुरक्षिततेबाबत एसटीच्या वरिष्ठ अधिकाऱ्यांची मंत्रालयात तातडीनं बैठक बोलावण्यात आल्याची माहिती प्रताप सरनाईक यांनी दिली.

विभागीय चौकशी करणार : स्वारगेट बसस्थानक परिसरात मंगळवारी पहाटे एका तरुणीवर अज्ञात व्यक्तीकडून अत्याचार करण्यात आला. या प्रकरणाची गंभीर दखल घेऊन प्रताप सरनाईक यांनी संबंधित बसस्थानकावरील कार्यरत असलेले स्थानकप्रमुख आणि आगार व्यवस्थापक यांची वरिष्ठ अधिकाऱ्यांच्या मार्फत विभागीय चौकशी करून दोषी आढळल्यास त्यांना तत्काळ निलंबित करावं, असे निर्देश उपाध्यक्ष आणि व्यवस्थापकीय संचालक (प्रभारी) विवेक भीमनराव यांना दिले आहेत.

जुन्या बस स्थानकात उभ्या करु नये : स्क्रॅप करण्यात आलेल्या जुन्या बस स्थानक परिसरात उभ्या करू नयेत. जुन्या, वापरात नसलेल्या आणि स्क्रॅप केलेल्या बस, स्थानक परिसरात उभ्या करण्यात आल्यानं त्याचा समाजकंटकांकडून गैरवापर होण्याची शक्यता वाढत आहे. या दुर्लक्षित बस अवैध कारवायांचे अड्डे बनण्याची भीती वाढत आहे. त्यामुळं असे प्रकार तातडीने रोखण्याचे निर्देश सरनाईक यांनी दिले आहेत.

राष्ट्रीय महिला आयोगाने घेतली दखल - पुण्यातील बलात्काराच्या घटनेची राष्ट्रीय महिला आयोगानंही दखल घेतली आहे. या प्रकरणाची त्वरित चौकशी करावी असे आदेश महिला आयोगानं दिले आहेत. तसंच लवकरात लवकर यासंदर्भात दोषीवर कारवाई झाली पाहिजे असं महिला आयोगानं म्हटलं आहे.

हेही वाचा -