നിയമസഭ സമ്മേളനം തത്സമയം - Kerala Assembly session

തിരുവനന്തപുരം : പതിനഞ്ചാം കേരള നിയമസഭയുടെ പതിനൊന്നാം സമ്മേളനം ആരംഭിച്ചു. രാവിലെ ഒന്‍പത് മണിക്കാണ് സമ്മേളനം ആരംഭിച്ചത്. 2024-25 സാമ്പത്തിക വര്‍ഷത്തേക്കുള്ള ബജറ്റിലെ ധനാഭ്യര്‍ഥനകള്‍ ചര്‍ച്ച ചെയ്‌ത് പാസാക്കുന്നതിനാണ് സമ്മേളനം ചേരുന്നത്. പാർലമെന്‍റ് തെരഞ്ഞെടുപ്പിൽ നേടിയ വന്‍വിജയത്തിന്‍റെ കരുത്തിലാണ് പ്രതിപക്ഷം സഭയിലേക്കെത്തുന്നത്. ബാർ കോഴ മുതൽ സിഎംആർഎൽ മാസപ്പടി വരെയുള്ള വിവാ​ദങ്ങൾ പ്രതിപക്ഷം സഭയില്‍ ഉയര്‍ത്തും. ബാർ കോഴയിൽ അടിയന്തര പ്രമേയ നോട്ടിസ് കൊണ്ട് വരാനാണ് പ്രതിപക്ഷത്തിന്‍റെ നീക്കം. സാമ്പത്തിക പ്രതിസന്ധി, മലബാറിലെ പ്ലസ് വൺ സീറ്റ് ക്ഷാമം, ക്ഷേമപെൻഷൻ മുടങ്ങിയത്, സർക്കാർ ജീവനക്കാരുടെ ആനുകൂല്യങ്ങളും മുടങ്ങിയത്, പൊതുവിതരണത്തിന്‍റെ തകർച്ച, സിപിഎം പ്രവർത്തകർ നിയമം കൈയിലെടുക്കുന്നത്, സർക്കാർ ആശുപത്രികളിലെ ശസ്‌ത്രക്രിയ പിഴവുകൾ സർക്കാരിന്‍റെ സമഗ്രാധിപത്യ പ്രവണത, സപ്ലൈകോ പ്രതിസന്ധി, കെഎസ്‌ആര്‍ടിസി പ്രശ്‌നങ്ങള്‍ തുടങ്ങിയവ പ്രതിപക്ഷം സഭയില്‍ ഉന്നയിക്കും. അതേസമയം ഭരണ നേട്ടങ്ങൾ ഉയർത്തി പ്രതിപക്ഷത്തെ പ്രതിരോധിക്കാനാണ് സര്‍ക്കാര്‍ നീക്കം. ചോദ്യോത്തര വേളയ്‌ക്ക് ശേഷം അംഗങ്ങളുടെ ഗ്രൂപ്പ് ഫോട്ടോ എടുക്കൽ ഉണ്ടായിരിക്കും. അതിന് ശേഷമാകും സീറോ അവർ.