ಕೋಲಾರ : ಕೊರೊನಾ ಮಹಾಮಾರಿ ಅದ್ಯಾವ ರೀತಿ ಜನರನ್ನು ಚಿತ್ರ ವಿಚಿತ್ರವಾಗಿ ಹಿಂಸಿಸುತ್ತಿದೆ ಅಂದ್ರೆ ಹೇಳೋದಕ್ಕೆ ಅಸಾಧ್ಯ. ಕೋಲಾರದಲ್ಲಿ ಕೊರೊನಾ ಸೋಂಕಿತರು ಕೆಲವೇ ಮಂದಿಯಾದ್ರೂ ಈ ವೈರಸ್‌ ಸೋಂಕಿತರ ಮನೆ ಹಾಗೂ ಕುಟುಂಬಗಳ ಮೇಲೆ ದಾಳಿ ಮಾಡ್ತಿದೆ. ಇದರಿಂದ ಸೋಂಕಿತರು ಕುಟುಂಬ ಸಮೇತರಾಗಿ ಕೋವಿಡ್-19 ಆಸ್ಪತ್ರೆಗೆ ಹೋಗಿ ದಾಖಲಾಗುವ ಪರಿಸ್ಥಿತಿ ಎದುರಾಗಿದೆ.
ಕೊರೊನಾ ಸೋಂಕಿತರು ಒಂದೊಂದು ಕಡೆ ಒಂದೊಂದು ರೀತಿ ಸಿಗುತ್ತಿದ್ದಾರೆ. ಸೋಂಕು ತಗುಲಿದೆ ರೀತಿಯೂ ಕೂಡಾ ವಿಭಿನ್ನವಾಗಿರುತ್ತದೆ. ಸದ್ಯ ಜಿಲ್ಲೆಯಲ್ಲಿ ಈವರೆಗೆ 28 ಮಂದಿ ಸೋಂಕು ದೃಢಪಟ್ಟಿದೆ. ಕೋಲಾರ ನಗರ, ಬಂಗಾರಪೇಟೆ ಮತ್ತು ಮುಳಬಾಗಿಲಿನ 4 ಸೋಂಕಿತ ಪ್ರಕರಣ ಗಮನಿಸಿದಾಗ ಸೋಂಕಿತರ ಪ್ರಾಥಮಿಕ ಸಂಪರ್ಕ ಹೊಂದಿರುವ ತಮ್ಮ ಪತ್ನಿಯರಿಗೆ ಸೋಂಕು ಕಾಣಿಸಿದೆ. ಇದರಿಂದಾಗಿ ಸೋಂಕಿತರು ಕುಟುಂಬ ಸಮೇತರಾಗಿ ಮನೆ, ಮಕ್ಕಳನ್ನು ಬಿಟ್ಟು ಕೋವಿಡ್-19 ಆಸ್ಪತ್ರೆಗೆ ಹೋಗಿ ದಾಖಲಾಗುವ ಪರಿಸ್ಥಿತಿ ಎದುರಾಗಿದೆ.
ದುರಂತ ಅಂದ್ರೆ ಈ ನಾಲ್ವರು ಸೋಂಕಿತರ ಪೈಕಿ ಯಾರಲ್ಲೂ ಕೂಡಾ ಕೊರೊನಾ ರೋಗ ಲಕ್ಷಣಗಳು ಕಂಡು ಬಂದಿರಲಿಲ್ಲ. ಹೀಗಿದ್ರೂ ಕೊರೊನಾ ಸೋಂಕು ಮಾತ್ರ ಇವರನ್ನು ಬಿಟ್ಟು ಬಿಡದೆ ಕಾಡಿಸುತ್ತಿದೆ. ಇದರಲ್ಲಿ ಮೂರು ಪ್ರಕರಣ ಚೆನ್ನೈನಿಂದ ಬಂದವರಾಗಿದ್ದಾರೆ. ಪ್ರಾಥಮಿಕ ಸಂಪರ್ಕ ಹೊಂದಿದ್ದವರಲ್ಲಿ ಬಹುಬೇಗ ಸೋಂಕು ಹರಡಿದೆ ಅನ್ನೋದು ತಿಳಿದು ಬಂದಿದೆ.
ಪಿ-1128 ಸೋಂಕಿತನ ಪತ್ನಿ, ಪಿ-1588ಗೆ ಸೋಂಕು ತಗುಲಿದೆ. ಅಷ್ಟೇ ಅಲ್ಲ, ಅವರ ಸಂಬಂಧಿಕರು ಇಬ್ಬರಿಗೂ ಹರಡಿದೆ. ಪಿ-1946 ಸೋಂಕಿತ ಹಾಗೂ ಆತನ ಪತ್ನಿ ಪಿ-2184ಗೂ ಸೋಂಕು ತಗುಲಿದೆ. ಪಿ-1812 ಸೋಂಕಿತನಿಂದ ಆತನ ಅತ್ತೆ ಪಿ-1812 ಹಾಗೂ ಅವರ ಪುತ್ರಿಗೆ ಸೋಂಕು ತಗುಲಿದೆ. ಪಿ-3007 ಸೋಂಕಿತನಿಂದ ಆತನ ಪತ್ನಿ ಪಿ-3927 ಹಾಗೂ ಆತನ ಸ್ನೇಹಿತನಿಗೆ ಸೋಂಕು ತಗುಲುವ ಮೂಲಕ ಕೊರೊನಾ ಸೋಂಕಿತರನ್ನು ಬಾಧಿಸುತ್ತಿದೆ.
ಈ ಮೇಲಿನ ಪ್ರಕರಣ ಗಮನಿಸಿದಾಗ ಕೊರೊನಾ ವೈರಸ್‌ ಸೋಂಕಿತರಿಂದ ದಾಟಿ ಸಮುದಾಯಕ್ಕೆ ಹರಡುವತ್ತ ದಾಪುಗಾಲು ಇಡುವ ಆತಂಕ ಎದುರಾಗಿದೆ. ಯಾಕಂದ್ರೆ, ಕೊರೊನಾ ಸೋಂಕು ಪತ್ತೆಯಾದ ತಕ್ಷಣ ಆತನನ್ನು ಕುಟುಂಬದಿಂದ ಪ್ರತ್ಯೇಕಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಹಾಗಾಗಿ ಇಷ್ಟು ಬೇಗನೆ ಆರೋಗ್ಯ ಇಲಾಖೆ ಎಚ್ಚೆತ್ತು ಕೂಡಾ ಸೋಂಕು ಇಷ್ಟು ಬೇಗನೆ ಹರಡುತ್ತಿರುವುದು ಆರೋಗ್ಯ ಇಲಾಖೆಗೆ ಅಧಿಕಾರಿಗಳಿಗೆ ತಲೆನೋವು ತಂದಿಟ್ಟಿದೆ.
ಒಂದೆರಡು ಪ್ರಕರಣಗಳಿಂದಲ್ಲೇ ಆರೋಗ್ಯ ಇಲಾಖೆ ಅಧಿಕಾರಿಗಳು ಎಚ್ಚೆತ್ತುಕೊಂಡಿದ್ದಾರೆ. ಕೇವಲ ಪ್ರಾಥಮಿಕ ಸಂಪರ್ಕ ಹೊಂದಿದವರನ್ನು ಕೂಡಲೇ ಪ್ರತ್ಯೇಕವಾಗಿ ಕ್ವಾರಂಟೈನ್‌ ಮಾಡುವ ಮೂಲಕ ಸೋಂಕಿನ ನಾಗಲೋಟಕ್ಕೆ ಕಡಿವಾಣ ಹಾಕಿರುವುದು ಕೊಂಚ ನಿರಾಳವಾಗುವಂತೆ ಮಾಡಿದೆ.
