ನವದೆಹಲಿ: ನಾಳೆ ರಾಜಧಾನಿ ನವದೆಹಲಿಯಲ್ಲಿ 6ನೇ ಹಂತದ ಲೋಕಸಭಾ ಚುನಾವಣೆಗೆ ಮತದಾನ ನಡೆಯಲಿದೆ. ದೆಹಲಿಯ 7 ಲೋಕಸಭಾ ಕ್ಷೇತ್ರದಲ್ಲಿ ಒಟ್ಟು 164 ಅಭ್ಯರ್ಥಿಗಳು ಸ್ಪರ್ಧಿಸುತ್ತಿದ್ದು, ಅದರಲ್ಲಿನ 10 ಅಭ್ಯರ್ಥಿಗಳು ತಮಗೆ ತಾವು ವೋಟು ಹಾಕಲಾಗದ ಪರಿಸ್ಥಿತಿಯಲ್ಲಿದ್ದಾರೆ.
ಹೌದು, ದೆಹಲಿಯಲ್ಲಿ ಸ್ಪರ್ಧಿಸುತ್ತಿರುವ ಲೋಕಸಭಾ ಕ್ಷೇತ್ರಗಳಲ್ಲಿ ಸುಮಾರು 10 ಅಭ್ಯರ್ಥಿಗಳು ತಾವು ನಿಂತ ಕ್ಷೇತ್ರದಲ್ಲಿ ಮತದಾನ ಮಾಡಲು ಸಾಧ್ಯವಾಗುವುದಿಲ್ಲ. ಇದರಲ್ಲಿ ಕಾಂಗ್ರಸ್, ಬಿಜೆಪಿ, ಆಮ್ ಆದ್ಮಿ ಪಕ್ಷದವರೂ ಇದ್ದಾರೆ. ಆ 21 ಅಭ್ಯರ್ಥಿಗಳಲ್ಲಿ ಒಟ್ಟು 10 ಅಭ್ಯರ್ಥಿಗಳು ತಮಗೆ ತಾವು ವೋಟ್ ಹಾಕಲು ಸಾಧ್ಯವಾಗಲ್ಲ. ಏಕೆಂದರೆ ಅವರು ಆ ಕ್ಷೇತ್ರದ ಮತದಾರರಲ್ಲ.
ಗೌತಮ್ ಗಂಭೀರ್:
ಗೌತಮ್ ಗಂಭೀರ್ ಪೂರ್ವ ದೆಹಲಿಯಿಂದ ಸ್ಪರ್ಧಿಸುತ್ತಿದ್ದಾರೆ. ಆದರೆ, ಅವರ ಮತದಾನದ ಹಕ್ಕು ಇರುವುದು ನವದೆಹಲಿ ಇನ್ನೊಂದು ಕ್ಷೇತ್ರದಲ್ಲಿ. ತಮಗೆ ತಾವು ಮತ ಹಾಕಿಕೊಳ್ಳಲು ಆಗುವುದಿಲ್ಲ. ಆದರೆ ಇವರು ನಾಳೆ ತಮ್ಮ ಹಕ್ಕು ಚಲಾವಣೆ ಮಾಡಲಿದ್ದಾರೆ.
ಆತಿಶಿ:
ಆತಿಶಿ ಆಮ್ ಆದ್ಮಿ ಪಕ್ಷದಿಂದ ಟಿಕೆಟ್ ಪಡೆದಿದ್ದು, ಪೂರ್ವ ದೆಹಲಿಯಿಂದ ಸ್ಪರ್ಧಿಸುತ್ತಿದ್ದಾರೆ. ಆದ್ರೆ ಅವರ ಮತದಾನದ ಹಕ್ಕು ಇರುವುದು ನವದೆಹಲಿಯ ಇನ್ನೊಂದು ಭಾಗದಲ್ಲಿ.
ಅಜಯ್ ಮಕೇನ್:
ಕಾಂಗ್ರಸ್ ಅಭ್ಯರ್ಥಿ ಅಜಯ್ ಮಕೇನ್ ನವದೆಹಲಿಯಿಂದ ಕಣಕ್ಕಿಳಿದಿದ್ದಾರೆ. ಅವರ ಮತದಾನದ ಹಕ್ಕು ಇರುವುದು ಪಶ್ಚಿಮ ದೆಹಲಿ ಕ್ಷೇತ್ರ ವ್ಯಾಪ್ತಿಯಲ್ಲಿ. ಹೀಗಾಗಿ ಅವರೂ ಕೂಡ ತಮಗೆ ಮತಚಲಾಯಿಸಲಾರರು.
ಬ್ರಿಜೇಶ್ ಗೋಯಲ್:
ಆಮ್ ಆದ್ಮಿ ಪಕ್ಷದಿಂದ ಟಿಕೆಟ್ ಪಡೆದಿರುವ ಬ್ರಿಜೇಶ್ ಗೋಯಲ್ ನವದೆಹಲಿಯಿಂದ ಕಣಕ್ಕಿಳಿದಿದ್ದಾರೆ. ಆದ್ರೆ ಅವರ ಮತದಾನದ ಹಕ್ಕು ಇರುವುದು ವಾಯುವ್ಯ ದೆಹಲಿಯಲ್ಲಿ.
ಹೀಗೆ, ಶೀಲಾ ದೀಕ್ಷಿತ್, ರಾಜೇಶ್ ಲಿಲೌಟಿಯಾ, ಹಂಸರಾಜ್ ಹಂಸ, ವಿಜೇಂದ್ರ ಸಿಂಹ, ರಾಘವ್ ಚಡ್ಡಾ, ಹರ್ಷವರ್ಧನ್ ಇವರಲ್ಲರದ್ದೂ ಸ್ಪರ್ಧಾಕ್ಷೇತ್ರ ಹಾಗೂ ಮತಕ್ಷೇತ್ರ ಬೇರೆ ಬೇರೆಯಾಗಿದ್ದು, ಯಾರೂ ಕೂಡ ತಮಗೆ ತಾವು ಮತ ಚಲಾಯಿಸಿಕೊಳ್ಳಲಾರರು.
