ಜೈಪುರ: ಆನ್ಲೈನ್ ಮೂಲಕ ಕ್ರಿಕೆಟ್ ಬೆಟ್ಟಿಂಗ್ ನಡೆಸುತ್ತಿದ್ದ ನಾಲ್ವರು ಖದೀಮರನ್ನು ಕೊಟ್ವಾಲಿ ಪೊಲೀಸ್ ಠಾಣೆ ಮತ್ತು ಕಮಿಷನರೇಟ್ ವಿಶೇಷ ತಂಡ ಜಂಟಿ ಕಾರ್ಯಾಚರಣೆ ನಡೆಸಿ ಕಿಶನ್‌ಪೋಲ್ ಮಾರುಕಟ್ಟೆ ಬಳಿ ಬಂಧಿಸಿದೆ. ಆರೋಪಿಗಳಿಂದ 4 ಕೋಟಿ 19 ಲಕ್ಷ ರೂ. ವಶಪಡಿಸಿಕೊಳ್ಳಲಾಗಿದೆ.
ವಾಟ್ಸ್ಆ್ಯಪ್ ಮೂಲಕ ಕ್ರಿಕೆಟ್ ಬೆಟ್ಟಿಂಗ್ ನಡೆಸುತ್ತಿದ್ದು, ಐಡಿ ಪಾಸ್ವರ್ಡ್ಗಳನ್ನು ಒಬ್ಬರಿಗೊಬ್ಬರು ಶೇರ್ ಮಾಡುತ್ತಿದ್ದರಂತೆ. ಇನ್ನು ಆನ್ಲೈನ್ ಬೆಟ್ಟಿಂಗ್‌ನ ಸಂಪೂರ್ಣ ವ್ಯವಹಾರವನ್ನು ದುಬೈನಿಂದಲೇ ನಡೆಸಲಾಗುತ್ತಿದೆ ಎಂದು ತಿಳಿದು ಬಂದಿದೆ.
ರಣಬೀರ್ ಸಿಂಗ್, ಕೃಪಾಲ್ ಸಿಂಗ್, ತೋಡರ್ಮಲ್ ರಾಥೋಡ್ ಮತ್ತು ಈಶ್ವರ್ ಸಿಂಗ್ ಬಂಧಿತರು. ಬೆಟ್ಟಿಂಗ್ ಆಡಲು ಬಯಸುವವರನ್ನು ವಾಟ್ಸ್ಆ್ಯಪ್ ಮೂಲಕ ಸೇರಿಸಿಕೊಳ್ಳುತ್ತಿದ್ದರಂತೆ. ನಂತರ ಆನ್ಲೈನ್ ವೆಬ್‌ಸೈಟ್ ಮೂಲಕ ಐಡಿ ಮತ್ತು ಪಾಸ್‌ವರ್ಡ್ ರಚಿಸಿ ಅವರಿಗೆ ನೀಡಲಾಗುತ್ತಿತ್ತಂತೆ. ಇನ್ನು ಈ ಚಟುವಟಿಕೆಗಳನ್ನು ಪೊಲೀಸ್ ನಿಯಂತ್ರಣದಿಂದ ಕಾಪಾಡಿಕೊಳ್ಳಲು ಹಣದ ವಹಿವಾಟನ್ನು ಕೋಡ್ ವರ್ಡ್‌ನಲ್ಲಿ ತೋರಿಸುತ್ತಿದ್ದರಂತೆ. ಈ ಕ್ರಿಕೆಟ್ ಬೆಟ್ಟಿಂಗ್ಅನ್ನು ದುಬೈನಲ್ಲಿ ಕುಳಿತುಕೊಂಡು ರಾಕೇಶ್ ಎಂಬ ವ್ಯಕ್ತಿ ನಡೆಸುತ್ತಿದ್ದಾನೆ ಎಂದು ತನಿಖೆ ವೇಳೆ ತಿಳಿದು ಬಂದಿದೆ.
ಈ ಬುಕ್ಕಿಗಳು ದೇವಾಲಯಗಳ ಹೆಸರಿನಲ್ಲಿ ವಾಟ್ಸ್ಆ್ಯಪ್ ಗ್ರೂಪ್ ನಡೆಸುತ್ತಿದ್ದರು ಎಂದು ತಿಳಿದು ಬಂದಿದೆ.
