Military Trick Sleep in Two Minutes: ಬದಲಾಗುತ್ತಿರುವ ಆಧುನಿಕ ಜೀವನಶೈಲಿಯಿಂದಾಗಿ ಅನೇಕ ಜನರು ತಮ್ಮ ಹಲವು ಪ್ರಯತ್ನಗಳ ಹೊರತಾಗಿಯೂ ರಾತ್ರಿಯ ನಿದ್ರೆ ಮಾಡಲು ತುಂಬಾ ತೊಂದರೆ ಅನುಭವಿಸುತ್ತಿದ್ದಾರೆ. ನಾಲ್ಕು ಗೋಡೆಗಳ ಮಧ್ಯೆ ನಮಗೇ ಇಂತಹ ಸಮಸ್ಯೆ ಎದುರಾದರೆ ದೇಶದ ಗಡಿಯಲ್ಲಿ ಸದಾ ಜಾಗೃತರಾಗಿರುವ ಸೈನಿಕರ ಪರಿಸ್ಥಿತಿ ಹೇಗೆ? ಅದಕ್ಕಾಗಿಯೇ ಸೈನಿಕರು ಕೆಲವೇ ಕ್ಷಣಗಳಲ್ಲಿ ನಿದ್ದೆಗೆ ಜಾರಲು ಸಂಶೋಧಕರು ಸಂಶೋಧನೆಯೊಂದನ್ನು ಕೈಗೊಂಡಿದ್ದಾರೆ. ಇದರ ಪರಿಣಾಮವಾಗಿ ಮಿಲಿಟರಿ ನಿದ್ರೆ ಎಂಬ ಈ ವಿಧಾನವನ್ನು ಅನ್ವೇಷಣೆ ಮಾಡಲಾಯಿತು. ಇದನ್ನು ಅನುಸರಿಸಿದರೆ ಸಾಕು ಎರಡೇ ನಿಮಿಷದಲ್ಲಿ ಸುಲಭವಾಗಿ ಗಾಢ ನಿದ್ದೆಗೆ ಜಾರಬಹುದು ಎನ್ನುತ್ತಾರೆ ಸಂಶೋಧಕರು.
ನಿದ್ರಾಹೀನತೆ ಸಮಸ್ಯೆಯನ್ನು ಸಂಶೋಧನೆ ನಡೆಸಿ ಹಾಗೂ ಚಿಕಿತ್ಸೆ ನೀಡುವ ಡಾ. ಬ್ರಿಯಾನ್ ಅವರು, ''ಈ ಮಿಲಿಟರಿ ನಿದ್ರೆ ವಿಧಾನವು ಉತ್ತಮ ಫಲಿತಾಂಶಗಳನ್ನು ನೀಡುತ್ತದೆ'' ಎಂದು ವಿವರಿಸುತ್ತಾರೆ. 2017ರಲ್ಲಿ ನ್ಯಾಷನಲ್ ಸೆಂಟರ್ ಫಾರ್ ಕಾಂಪ್ಲಿಮೆಂಟರಿ ಅಂಡ್ ಇಂಟಿಗ್ರೇಟಿವ್ ಹೆಲ್ತ್ (National Center for Complementary and Integrative Health) ಪ್ರಕಟಿಸಿದ ಅಧ್ಯಯನದಿಂದ ಮಿಲಿಟರಿ ಸಿಬ್ಬಂದಿಗಾಗಿ ನಿದ್ರೆ ಹಾಗೂ ವಿಶ್ರಾಂತಿ ತಂತ್ರಗಳನ್ನು (Sleep and Relaxation Techniques for Military Personnel) ಕಂಡುಕೊಳ್ಳಲಾಗಿದೆ. ಹಲವು ಪ್ರಯೋಗಗಳ ಫಲವಾಗಿರುವ ಈ ಟೆಕ್ನಿಕ್ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲೂ ಭಾರೀ ವೈರಲ್ ಆಗಿದೆ. ಹಾಗಾದ್ರೆ ಮತ್ತೇಕೆ ವಿಳಂಬ 'ಮಿಲಿಟರಿ ಟ್ರಿಕ್' ಬಗ್ಗೆ ಸಂಪೂರ್ಣವಾಗಿ ತಿಳಿಯೋಣ.
ಮಿಲಿಟರಿ ಟ್ರಿಕ್ ಪ್ರಕಾರ ನಿದ್ರೆಗೆ ಜಾರುವುದು ಹೇಗೆ?
ಈ ಮಿಲಿಟರಿ ನಿದ್ರೆಯ ಟ್ರಿಕ್ ಪ್ರಕಾರ, ಮೊದಲು ನಿಮ್ಮ ಕಣ್ಣುಗಳನ್ನು ಮುಚ್ಚಿ, ಎರಡೂ ಕೈಗಳನ್ನು ನಿಮ್ಮ ಪಕ್ಕದಲ್ಲಿ ಇರಿಸಿ ಮತ್ತು ನಿಮ್ಮ ಹೃದಯದಿಂದ ನಿಧಾನವಾಗಿ ಉಸಿರಾಡಬೇಕು. ಅದಾದ ನಂತರ ಭುಜ ಹಾಗೂ ಕೈಗಳನ್ನು ಸಡಿಲಗೊಳಿಸಬೇಕು. ಅದರ ನಂತರ ವಿಶ್ರಾಂತಿ ಮೋಡ್‌ಗೆ ಹೋಗಿ ಇದರಿಂದ ದೇಹದ ಎಲ್ಲಾ ಸ್ನಾಯುಗಳು ವಿಶ್ರಾಂತಿ ಪಡೆಯಲು ಸಾಧ್ಯವಾಗುತ್ತದೆ. ಇದರ ಪರಿಣಾಮವಾಗಿ ಒತ್ತಡವು ಕ್ರಮೇಣವಾಗಿ ಕಡಿಮೆಯಾಗಲು ಸಾಧ್ಯವಾಗುತ್ತದೆ. ಅದಾದ ನಂತರ, ನಿಮ್ಮ ಮನಸ್ಸನ್ನು ಕಾಲ್ಪನಿಕ ಜಗತ್ತಿನಲ್ಲಿ ತೆಗೆದುಕೊಂಡು ಹೋಗಬೇಕಾಗುತ್ತದೆ ಎಂದು ತಜ್ಞರು ಸಲಹೆ ನೀಡುತ್ತಾರೆ.
ಶಾಂತ ವಾತಾವರಣದಲ್ಲಿ ನೀಲಿ ಆಕಾಶದ ಕೆಳಗೆ ಹುಲ್ಲುಗಾವಲಿನಲ್ಲಿ ಏಕಾಂಗಿಯಾಗಿ ಮಲಗುವುದನ್ನು ಅಥವಾ ಕತ್ತಲೆಯ ಕೋಣೆಯಲ್ಲಿ ಆರಾಮದಾಕವಾಗಿ ತೂಗಾಡುವುದನ್ನು ಕಲ್ಪಿಸಿಕೊಳ್ಳಬೇಕಾಗುತ್ತದೆ. ಇದು ವಿಶ್ರಾಂತಿ ತಂತ್ರವೆಂದು ಹೇಳಲಾಗುತ್ತದೆ ಹಾಗೂ ಮನಸ್ಸಿನಿಂದ ನಕಾರಾತ್ಮಕ ಆಲೋಚನೆಗಳನ್ನು ತೆರವುಗೊಳಿಸಲು ಸಹಾಯ ಮಾಡುತ್ತದೆ. ಇದರಿಂದ ನೆಮ್ಮದಿಯ ನಿದ್ರೆ ಬರುತ್ತದೆ ಎನ್ನುತ್ತಾರೆ ಸಂಶೋಧಕರು.
ಈ ಕುರಿತು ಒಲಿಂಪಿಕ್ ಸ್ಪ್ರಿಂಟ್ ತರಬೇತುದಾರ ಬಡ್ವಿಂಟರ್ ಮಾತನಾಡಿ, ''ಈ ಮಿಲಿಟರಿ ನಿದ್ರೆಯ ಟ್ರಿಕ್ ನಮ್ಮನ್ನು ಕೆಲವೇ ಸೆಕೆಂಡುಗಳಲ್ಲಿ ನಿದ್ರಿಸುವಂತೆ ಮಾಡುತ್ತದೆ. ಇದಲ್ಲದೆ, ಈ ತಂತ್ರವನ್ನು ನೇವಿ ಪ್ರಿ-ಫ್ಲೈಟ್ ಶಾಲೆಯಲ್ಲಿ ಪಠ್ಯಕ್ರಮವಾಗಿ ಸೇರಿಸಲಾಯಿತು'' ಎಂದು ಅವರು ಹೇಳುತ್ತಾರೆ.
ವಿಶೇಷವಾಗಿ ಆಳವಾದ ಉಸಿರಾಟವು ನರಮಂಡಲವನ್ನು ಶಾಂತಗೊಳಿಸುತ್ತದೆ. ಜೊತೆಗೆ ಹೃದಯ ಬಡಿತವನ್ನು ನಿಯಂತ್ರಿಸುತ್ತದೆ. ಇದು ನಿದ್ರೆಗೆ ಕಾರಣವಾದ ನೈಸರ್ಗಿಕ ಹಾರ್ಮೋನ್ ಮೆಲಟೋನಿನ್ ಉತ್ಪಾದನೆಯನ್ನು ಹೆಚ್ಚಿಸುತ್ತದೆ ಎಂದು ತಜ್ಞರು ತಿಳಿಸುತ್ತಾರೆ. ಮತ್ತೇಕೆ ತಡ, ಇವತ್ತು ರಾತ್ರಿಯಿಂದಲೇ ಈ ಮಿಲಿಟರಿ ಟ್ರಿಕ್ನ್ನು ಅನುಸರಿಸಿ ಆರಾಮವಾಗಿ ಮಲಗಲು ಪ್ರಯತ್ನಿಸಿ.
ಹೆಚ್ಚಿನ ಮಾಹಿತಿಗಾಗಿ ಈ ವೆಬ್ಸೈಟ್ನ್ನು ವೀಕ್ಷಿಸಬಹುದು: https://med.umn.edu/news/top-story-practice-military-sleep-method-fall-asleep-mere-minutes-naturally
ಪ್ರಮುಖ ಸೂಚನೆ: ಈ ಲೇಖನದಲ್ಲಿ ನಿಮಗೆ ನೀಡಿರುವ ಎಲ್ಲ ಆರೋಗ್ಯ ಮಾಹಿತಿ, ಸಲಹೆಗಳು ನಿಮ್ಮ ತಿಳಿವಳಿಕೆಗಾಗಿ ಮಾತ್ರ. ವೈಜ್ಞಾನಿಕ ಸಂಶೋಧನೆ, ಅಧ್ಯಯನಗಳು, ವೈದ್ಯಕೀಯ ಮತ್ತು ಆರೋಗ್ಯ ವೃತ್ತಿಪರ ಸಲಹೆಯನ್ನು ಆಧರಿಸಿ ನಾವು ಈ ಮಾಹಿತಿಯನ್ನು ಒದಗಿಸುತ್ತಿದ್ದೇವೆ. ಆದರೆ, ಇವುಗಳನ್ನು ಅನುಸರಿಸುವ ಮೊದಲು ಪರಿಣತ ವೈದ್ಯರ ಸಲಹೆಗಳನ್ನು ತೆಗೆದುಕೊಳ್ಳುವುದು ಉತ್ತಮ.
