ಪೊಲ್ಲಾಚಿ(ತಮಿಳುನಾಡು) : ಭಾರತ ಪ್ರವಾಸದಲ್ಲಿರುವ ಯುಎಸ್ ಅಧ್ಯಕ್ಷ ಟ್ರಂಪ್ರನ್ನು ಇಂದು ಸ್ವಾಗತಿಸುವುದರಿಂದ ಹಿಡಿದು ಅವರು ತೆರಳುವವರೆಗಿನ ಸಂಪೂರ್ಣ ಕಾರ್ಯಕ್ರಮಗಳ ಪಟ್ಟಿ ತಯಾರಿದೆ. ಅವರ ಊಟ, ವಸತಿ, ಎಲ್ಲಿಗೆ ಪ್ರಯಾಣ ಹೀಗೆ ಎಲ್ಲವೂ ಅಧಿಕೃತ ಪಟ್ಟಿ ಸೇರಿಕೊಂಡಿವೆ. ಟ್ರಂಪ್ಗೆ ಉಡುಗೊರೆ ನೀಡುವ ಬಗ್ಗೆಯೂ ಸರ್ಕಾರ ನಿಗಾವಹಿಸಿದೆ. ಆದರೆ, ಇಲ್ಲೊಬ್ಬ ಅಜ್ಜ ದೊಡ್ಡಣ್ಣನಿಗಾಗಿ ಉಡುಗೊರೆಯೊಂದನ್ನು ತಯಾರಿಸಿ ಕಳಿಸಿದ್ದಾರೆ.
ಅಜ್ಜನಿಂದ ಟ್ರಂಪ್ಗಾಗಿ ವಿಶೇಷ ಖಾದಿ ಜುಬ್ಬ : ಪೊಲ್ಲಾಚಿಯ ಈ 90ರ ಅಜ್ಜನ ಹೆಸರು ವಿಶ್ವನಾಥನ್. ಟೈಲರಿಂಗ್ನಲ್ಲಿನ ಕರಕುಶಲತೆಯಿಂದಾಗಿ ಇವರನ್ನು ಮಾಸ್ಟರ್ ಟೈಲರ್ ಎಂದೇ ಜನ ಗುರುತಿಸುತ್ತಾರೆ. ವಿಭಿನ್ನ ಶೈಲಿ ಮತ್ತು ಅಚ್ಚುಕಟ್ಟಾಗಿ ಹೊಲಿಯುವುದರಲ್ಲಿ ನಿಸ್ಸೀಮರು. ವಿಶ್ವನಾಥನ್ ಅವರಿಗೆ ಯುಎಸ್ ಅಧ್ಯಕ್ಷ ಟ್ರಂಪ್ ಮತ್ತು ಪ್ರಧಾನಿ ಮೋದಿ ಅವರು ಟಿವಿಯಲ್ಲಿ ನೋಡಿ ಮಾತ್ರವೇ ಗೊತ್ತು. ಟ್ರಂಪ್ ಭಾರತ ಪ್ರವಾಸಕ್ಕೆಂದು ಬರುತ್ತಿರುವ ವಿಚಾರ ತಿಳಿದ ಅವರು ಟ್ರಂಪ್ಗಾಗಿ ವಿಶೇಷ ಖಾದಿ ಕಮೀಜ್ ಹೊಲಿದು ಈಗಾಗಲೇ ಅದನ್ನು ಪಿಎಂ ಕಚೇರಿಗೆ ಕಳುಹಿಸಿದ್ದಾರೆ.
ಇತರೆ ಗಣ್ಯರಿಗೂ ಉಡುಪಿನ ಉಡುಗೊರೆ ಸಲ್ಲಿದೆ : ಇವರು ಹೀಗೆ ತಮ್ಮಿಷ್ಟದಂತೆ ಗಣ್ಯರಿಗಾಗಿ ಉಡುಪು ಹೊಲಿದು ಕಳಿಸುತ್ತಿರುವುದು ಇದೇ ಮೊದಲೇನಲ್ಲ. ಈ ಹಿಂದೆ ಅವರು ತಮಿಳುನಾಡಿನ ಮಾಜಿ ಸಿಎಂ ಕಾಮರಾಜ್, ಅಣ್ಣಾದುರೈ ಮತ್ತು ಮಾಜಿ ರಾಷ್ಟ್ರಪತಿ ವೆಂಕಟರಾಮನ್ರಿಗೂ ಹೀಗೆಯೇ ತಮ್ಮ ಕೈಯಾರೆ ಉಡುಪು ಹೊಲಿದು ಉಡುಗೊರೆಯಾಗಿ ನೀಡಿದ್ದರು.
ಆಸಕ್ತರಿಗೆ ಉಚಿತ ಹೊಲಿಗೆ ತರಬೇತಿ ನೀಡ್ತಾರೆ : ಸದ್ಯ ಉಡುಗೊರೆಯನ್ನು ಈಗಾಗಲೇ ಪಿಎಂ ಕಚೇರಿಗೆ ಕಳಿಸಿರುವ ವಿಶ್ವನಾಥನ್ ಅದು ಅಮೆರಿಕ ಅಧ್ಯಕ್ಷರ ಪಾಲಿಗೆ ಸೇರುತ್ತದೆ ಎಂಬ ನಿರೀಕ್ಷೆಯಿಂದಿದ್ದಾರೆ. ವಿಶ್ವನಾಥನ್ ಅವರಿಗೆ ವಯಸ್ಸಾದರೂ ಅವರ ಕೆಲಸದ ಮೇಲಿನ ಪ್ರೀತಿಗೆ ವಯಸ್ಸಾಗಿಲ್ಲ. ಕುಳಿತು ವಿಶ್ರಾಂತಿ ಪಡೆಯಬೇಕಾದ ವಯಸ್ಸಿಲ್ಲೂ ಅವರು ಟೈಲರಿಂಗ್ ಕಲಿಯಲು ಬಯಸುವ ಯುವ ಜನತೆಗೆ ತರಬೇತಿ ನೀಡುತ್ತಾರೆ ಎಂದರೆ ನಿಜಕ್ಕೂ ಮೆಚ್ಚುವಂಥದ್ದು.
