યૂપીઃ સંભલમાં ગમખ્વાર માર્ગ અકસ્માત, બસ અને ટેન્કરની ટક્કરમાં આઠ લોકોના મોત

ઉત્તર પ્રદેશના સંભલ જિલ્લામાં ગમખ્વાર માર્ગ અકસ્માત સર્જાયો હતો. જેમાં આઠ લોકોના ઘટનાસ્થળે મોત થયા છે. જ્યારે 18 લોકો ઇજાગ્રસ્ત થયા છે. આ તમામ ઇજાગ્રસ્તોને સારવાર માટે હોસ્પિટલમાં દાખલ કરવામાં આવ્યા છે. મુરાદાબાદ- આગરા હાઇવે પર ચંદૌસીના ધનારી વિસ્તારમાં આ દુર્ઘટના બની હતી. મળતી માહિતી અનુસાર ગાઢ ધુમ્મસને કારણે ટ્રેક્ટર ટ્રોલીને ઓવરટેક કરતા સમયે બસ અને ટેન્કર વચ્ચે જોરદાર ટક્કર થઇ હતી. આ બસમાં 40 થી 42 લોકો સવાર હતા. પોલીસે સ્થાનિક લોકોની મદદથી રાહત અને બચાવ કાર્ય શરૂ કર્યું હતું.