Covid positive case in Rangia: তুলসীবাৰী বহুমুখী উচ্চতৰ মাধ্যমিক বিদ্যালয়ত ক’ভিডৰ আতংক

ৰঙিয়াৰ তুলসীবাৰী বহুমুখী উচ্চতৰ মাধ্যমিক বিদ্যালয়ত ক’ভিডৰ আতংক । বিদ্যালয়খনৰ তিনিগৰাকীকৈ শিক্ষকৰ দেহত ধৰা পৰিছে ক’ভিড-১৯ৰ উপস্থিতি ( Teacher at Tulsibari Bahumukhi High School test COVID positive) । বিদ্যালয়খনৰ শিক্ষয়িত্ৰী অনিমা পাংগিঙে ব্যাক্তিগতভাৱে সম্পন্ন কৰা পৰীক্ষাত ক’ভিডৰ উপস্থিতি ধৰা পৰে । শনিবাৰে বিদ্যালয় কৰ্তৃপক্ষক এই সম্পৰ্কে অৱগত কৰাত অধ্যক্ষা গৰাকীয়ে ব্যৱস্থা গ্ৰহণৰ বাবে বিভাগীয় কৰ্তৃপক্ষক অৱগত কৰে । প্ৰশাসনৰ ফালৰ পৰাও অধিক ক্ষিপ্ৰতাৰে ছাত্ৰ-ছাত্ৰী আৰু শিক্ষক-কৰ্মচাৰীৰ ক’ভিড পৰীক্ষা সম্পন্ন কৰা হয় । এই পৰীক্ষাৰ অন্তত বিদ্যালয়ৰ ছাত্ৰ-ছাত্ৰীসকল ক’ভিড মুক্ত হোৱাৰ বিপৰীতে দুগৰাকীকৈ শিক্ষক-শিক্ষয়িত্ৰীৰ দেহত ক’ভিডৰ উপস্থিতি ধৰা পৰে । ইয়াকে লৈ সমগ্ৰ বিদ্যালয়খনতে সৃষ্টি হৈছে এক আতংকময় পৰিৱেশৰ । এই প্ৰতিবেদন যুগুত কৰা সময়লৈকে প্ৰশাসনে বিদ্যালয়খনত সাম্ভাব্য ব্যৱস্থা গ্ৰহণ সন্দৰ্ভত নিশ্চিত তথ্য লাভ কৰিব পৰা হোৱা নাই ৷