মেৰাপানীৰ চিআৰপিএফ কেম্পত পালন ৰাষ্ট্ৰীয় একতা দিৱস

আজি লৌহমানৱ চৰ্দাৰ বল্লভ ভাই পেটেলৰ 146 সংখ্যক জন্ম জয়ন্তী ৷ পেটেলৰ জন্ম জয়ন্তী উপলক্ষে তেখেতক শ্ৰদ্ধাঞ্জলি জ্ঞাপন কৰে অসম-নাগালেণ্ড সীমান্তৰ মেৰাপানীত নিয়োজিত সুৰক্ষা বাহিনী CRPF য়ে ৷ CRPF ৰ 142 নং বেটালিয়নৰ জোৱানসকলে দেওবাৰে পুৱা মেৰাপানী টাউনৰ মাজেৰে বাহিৰ কৰে একতা দৌৰ ৷ CRPF ৰ জোৱানসকলে তেওঁলোকে বাস কৰা চাউনিৰ পৰা বাহিৰ কৰা একতা দৌৰে সমগ্ৰ মেৰাপানী টাউনখন সামৰি লয় ৷ দৌৰৰ অন্তত কেন্দ্ৰীয় সংৰক্ষিত আৰক্ষী বাহিনী চমুকৈ CRPF ৰ বিষয়া, জোৱানসকলে ৰাষ্ট্ৰীয় একতা অটুট ৰখাৰ শপত বাক্য পাঠ কৰে ৷ বিয়লিৰ ভাগত দিৱসটিৰ লগত সংগতি ৰাখি CRPF এ বিভিন্ন ধৰণৰ ক্ৰীড়া অনুষ্ঠানৰো আয়োজন কৰিছে ৷