জোনাইৰ ডেকা নদীত উদ্ধাৰ মৃত হাতী পোৱালী

জোনাইৰ ডেকা নদীত মৃত অৱস্থাত উদ্ধাৰ এটা হাতী পোৱালী ৷ জোনাইৰ অসম-অৰুণাচল সীমান্তৰ ডেকা নদীত উদ্ধাৰ হৈছে মৃত হাতী পোৱালীটো । হাতী পোৱালীটোৰ কেনেকৈ মৃত্যু ঘটিছে ইয়াক সঠিকভাৱে জানিব পৰা নাই যদিও হাতী পোৱালীটো পানীত পৰি মৃত্যু ঘটা বুলি সন্দেহ প্ৰকাশ কৰিছে স্থানীয় ৰাইজে । জানিব পৰা মতে, জোনাইৰ অসম-অৰুণাচল সীমান্তৰ ডেকা নদীত বুধবাৰে পুৱা জোনাইৰ সীমান্তৰ ডেকা মাজগাঁৱৰ ৰাইজে প্ৰায় ৭-৮ বছৰীয়া এটা হাতী পোৱালী মৃত অৱস্থাত উদ্ধাৰ কৰে ৷ লগে লগে স্থানীয় ৰাইজে কাষতে থকা অৰুণাচল প্ৰদেশৰ নাৰীৰ বন বিভাগক খবৰ দিয়াত ঘটনাস্থলীত উপস্থিত হয় অৰুণাচলী বনকর্মী । মঙলবাৰৰ নিশা চুবুৰীয়া ৰাজ্য অৰুণাচলৰ পাহাৰত দি থকা ধাৰাসাৰ বৰষুণৰ ফলত ডেকা নদীৰ বাঢ়নী পানীত হাতী পোৱালীটো পৰি উটি অহা বুলি সন্দেহ প্ৰকাশ কৰিছে স্থানীয় ৰাইজে । যিহেতু বহুদিনৰ পৰা অসম-অৰুণাচল সীমান্তৰ আশে-পাশে এজাক হাতী বিচৰণ কৰা দেখিবলৈ পাইছিল স্থানীয় ৰাইজে ।