দেৰগাঁৱত নিশা অচিনাক্ত বাহনৰ খুন্দাত দুজন নিহত

গোলাঘাট, 22 নৱেম্বৰ : মঙলবাৰে নিশা দেৰগাঁৱত সংঘটিত হয় ভয়ংকৰ পথ দুৰ্ঘটনা ৷ অচিনাক্ত বাহনৰ খুন্দাত নিহত হয় দুজনকৈ লোক ৷ নিহত লোক দুজন বাবাতু দাস আৰু বিকি হুছেইন বুলি জানিব পৰা গৈছে ৷ বিকি হুছেইন আছিল এগৰাকী ক্ৰিকেট প্ৰশিক্ষক আৰু বাবাতু দাস আছিল ব্যক্তিগত গাড়ি চালক । নিহত দুই যুৱকৰে ঘৰ দেৰগাঁৱত।

ঘটনাৰ বিৱৰণি অনুসৰি, বাইকেৰে দাধৰা দিশৰ পৰা দেৰগাঁও চাৰিআলি অভিমুখে আহি আছিল দুয়ো ৷ তেনে সময়তে দেৰগাঁৱৰ বাছ ষ্টেণ্ড সমীপৰ চাৰিলেন যুক্ত পথত অচিনাক্ত বাহনে খুন্দা মাৰে বাইকখনক ৷ ফলত দুৰ্ঘটনাস্থলীতে দুই বাইক আৰোহী নিহত হয় ৷

পৰৱৰ্তী সময়ত ঘটনাস্থলীত দেৰগাঁও আৰক্ষীৰ এটা দল উপস্থিত হৈ মৃতদেহকেইটা উদ্ধাৰ কৰে ৷ পৰবৰ্তী সময়ত মৃতদেহকেইটা মৰোণোত্তৰ পৰীক্ষাৰ বাবে গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰা হয় ৷ 

দুৰ্ঘটনাৰ সন্দৰ্ভত স্থানীয় ৰাইজে কয়, ‘‘পথৰ দুৰৱস্থাৰ বাবে এই পথ দুৰ্ঘটনা হ’ল ৷ ৰাষ্ট্ৰীয় ঘাইপথচোৱা নিৰ্মাণ সম্পূৰ্ণ নকৰা পৰ্যন্ত এনে দুৰ্ঘটনা হৈ থাকিব ৷’’

লগতে পঢ়ক:হাতে হাতে টৰ্চ লৈ হাতী খেদিছে গঞাই