গুৱাহাটী: বাংলাদেশে নিৰ্মাণ কৰি থকা এটা মথাউৰিয়ে চিন্তিত কৰি তুলিছে ত্ৰিপুৰাক । উত্তৰ-পূবৰ ৰাজ্যখনৰ ভাৰত-বাংলাদেশ সীমান্তৰ জিৰ’ পইণ্টৰ সমীপত অৱস্থিত মথাউৰিটোৰ উচ্চতা বৃদ্ধিৰ বাবে বাংলাদেশে চলাই থকা কামক লৈ উদ্বেগ প্ৰকাশ কৰিছে ত্ৰিপুৰাৰ উনাকোটি জিলা প্ৰশাসনে । উনাকোটি জিলাৰ জিলা দণ্ডাধীশ দিলীপ কুমাৰ চাকমাই শনিবাৰে উনাকোটি জিলাৰ ৰঙাউটি গাঁও পঞ্চায়তৰ দেৱীপুৰ অঞ্চল পৰিদৰ্শন কৰি কয় যে যদি তাৎক্ষণিক ব্যৱস্থা গ্ৰহণ কৰা নহয় তেন্তে বাংলাদেশে মথাউৰিৰ উচ্চতা বৃদ্ধি কৰিলে কৈলাশহৰ চহৰত বিপৰ্যয়জনক বানপানীৰ সৃষ্টি হ’ব পাৰে আগন্তুক বাৰিষাত ।
"আন্তঃৰাষ্ট্ৰীয় সীমান্তৰ সিটো পাৰে বাংলাদেশ চৰকাৰে নিৰ্মাণ কৰি থকা মথাউৰিটো চাবলৈ আজি ৰঙাউটি গাঁও পঞ্চায়তলৈ আহিছো । আমি অনুভৱ কৰোঁ যে বাংলাদেশ চৰকাৰে বৰ্তমানৰ মথাউৰিটো ওপৰলৈ তুলিছে, যাৰ ফলত এইফালে ভয়াৱহ বানৰ সৃষ্টি হোৱাৰ আশংকা আছে । আমাৰ (ভাৰতীয়) ফালৰ মথাউৰিটো জিৰ’ পইণ্টৰ পৰা ৩৫০ মিটাৰতকৈও অধিক দূৰত থকাৰ বিপৰীতে তেওঁলোকে (বাংলাদেশ) জিৰ’ পইণ্টৰ পৰা ১০০ মিটাৰৰ ভিতৰত মথাউৰি নিৰ্মাণ কৰি আছে । এইক্ষেত্ৰত আমি প্ৰয়োজনীয় পদক্ষেপ গ্ৰহণ কৰিব লাগিব ।" শনিবাৰে অঞ্চলটো পৰিদৰ্শন কৰি সংবাদ মাধ্যমৰ আগত এইদৰে কয় চাকমাই ।
এইখিনিতে উল্লেখ কৰিব পাৰি যে ত্ৰিপুৰাত ভাৰত আৰু বাংলাদেশ সীমান্তৰ মাজেৰে বৈ গৈছে মনু নদী । ত্ৰিপুৰাৰ উনাকোটি জিলা ভাৰতৰ ফালে মনু নদীৰ পাৰত অৱস্থিত, আনহাতে নদীৰ সিটো পাৰে বাংলাদেশৰ মৌলৱী বজাৰ জিলা আছে । বান ৰোধ কৰিবলৈ সীমান্তৰ দুয়োকাষে মথাউৰি নিৰ্মাণ কৰা হৈছিল যদিও বাংলাদেশত মথাউৰিৰ উচ্চতা বৃদ্ধিত ভাৰতীয় পক্ষই উদ্বেগ প্ৰকাশ কৰিছে ৷
উনাকোটি জিলাৰ বাসিন্দাসকলেও ই আন্তঃৰাষ্ট্ৰীয় আইন উলংঘা বুলি অভিযোগ উত্থাপন কৰিছে যিহেতু বাংলাদেশ কৰ্তৃপক্ষই তেওঁলোকৰ পক্ষৰ মথাউৰিৰ উচ্চতা বৃদ্ধিৰ সন্দৰ্ভত ভাৰত কৰ্তৃপক্ষক অৱগত কৰা নাই । কংগ্ৰেছৰ বিধায়ক বীৰাজিৎ সিনহাই কয়, "এয়া গুৰুতৰ চিন্তাৰ বিষয় ৷ কাৰণ বাংলাদেশে মথাউৰিৰ উচ্চতা বৃদ্ধি কৰিলে এইফালে ভয়াৱহ বানপানীৰ সৃষ্টি হ'ব । ত্ৰিপুৰাৰ বিজেপি নেতৃত্বাধীন চৰকাৰে এই বিষয়টো কেন্দ্ৰীয় চৰকাৰৰ আগত উত্থাপন কৰিব লাগে যাতে দ্বিপাক্ষিক আলোচনা কৰি বিষয়টো সমাধান কৰিব পৰা যায় ।"
এই ঘটনা সন্দৰ্ভত গৃহ মন্ত্ৰালয়ক চোৰাংচোৱা তথ্য প্ৰদান কৰিবলগীয়া বি এছ এফ আৰু অন্যান্য নিৰাপত্তা বাহিনীৰ ভূমিকাক লৈও তেওঁ প্ৰশ্ন উত্থাপন কৰে । "মই ভাবো চোৰাংচোৱা সংস্থাসমূহে কি কৰিছিল ? এইটো এটা গুৰুতৰ চিন্তাৰ বিষয় আৰু চৰকাৰো এই বিষয়ে অৱগত নহয় । মই যদি বিষয়টো উত্থাপন নকৰিলোহেঁতেন তেন্তে ই এক দুৰ্যোগ হ'লহেঁতেন ।" সিনহাই কয় ৷
ইফালে ভাৰত-বাংলাদেশ সীমান্তৰ পহৰা দিয়া বি এছ এফে স্পষ্ট কৰি দিয়ে যে বাংলাদেশ কৰ্তৃপক্ষই যোৱা বছৰৰ নৱেম্বৰ মাহত নতুনকৈ মাটি সংযোজন কৰি নিজৰ ফালৰ পৰা মথাউৰি মেৰামতি কৰাৰ চেষ্টা কৰিছিল । যিহেতু মথাউৰিটোৰ মাটিৰে ওখ কৰা কিছু অংশ আন্তঃৰাষ্ট্ৰীয় সীমাৰ পৰা ১৫০ গজৰ ভিতৰত পৰে, সেয়েহে বি এছ এফে লগে লগে সীমান্তৰক্ষী বাংলাদেশ (বি জি বি) পোষ্টৰ সৈতে যোগাযোগ কৰি তীব্ৰ প্ৰতিবাদ সাব্যস্ত কৰে ৷ তাৰ পিছত বাংলাদেশে তৎক্ষণাত কাম বন্ধ কৰি দিয়ে ।
উল্লেখ্য যে, ১৯৭১ চনত বাংলাদেশৰ মুক্তিযুদ্ধত ভাৰতৰ ভূমিকাৰ প্ৰতি লক্ষ্য ৰাখি বাংলাদেশৰ উন্নয়নৰ ক্ষেত্ৰত বিশেষকৈ আৱামী লীগ চৰকাৰৰ শাসনকালত ভাৰত ঘনিষ্ঠ অংশীদাৰ হৈ আহিছে ৷ কিন্তু যোৱা বছৰ চুবুৰীয়া দেশখনৰ ৰাজনৈতিক উন্নয়নৰ পাছৰে পৰা দুয়োখন দেশৰ মাজত দ্বিপাক্ষিক সম্পৰ্ক তীব্ৰভাৱে অৱনতি ঘটিছিল ৷ যোৱা বছৰৰ আগষ্ট মাহত বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক পদচ্যুত কৰা হয় আৰু পৰৱৰ্তী সময়ত নোবেল বিজয়ী অধ্যাপক মহম্মদ ইউনুছৰ নেতৃত্বত অন্তৱৰ্তীকালীন চৰকাৰ গঠন কৰা হয় ।
লগতে পঢ়ক: শ্বেখ হাছিনাৰ পাছপোৰ্ট প্ৰত্যাহাৰ বাংলাদেশৰ অন্তৱৰ্তীকালীন চৰকাৰৰ
