Rangghar theatre festival 2022: বৰপেটাৰ নাট মহোৎসৱত অংশ ল’ব উৰুগুৱেৰ নাট্যদলে

১ ডিচেম্বৰৰ পৰা ৪ ডিচেম্বৰলৈকে বৰপেটাত অনুষ্ঠিত হ‘ব ৰংঘৰ ৰাষ্ট্ৰীয় নাট মহোৎসৱ 2022 (Rangghar theatre festival 2022) ৷ ৰংঘৰ বৰপেটাৰ উদ্যোগত অনুষ্ঠিত নাট মহোৎসৱক লৈ সোমবাৰে এখন সংবাদমেল সম্বোধন কৰে আয়োজক সমিতিয়ে (Rangghar nat mahotsav press meet) ৷ নাটকৰ ভিন্ন সম্পৰীক্ষাৰে প্ৰায় ৪ দশক ধৰি অপেছাদাৰী নাট্য আন্দোলনৰ সৈতে জড়িত হৈ থকা ৰংঘৰ বৰপেটাৰ ৩০ সংখ্যক ৰাষ্ট্ৰীয় নাট মহোৎসৱত এইবেলি প্ৰথমবাৰৰ বাবে ভাগ ল’ব বিদেশী নাট্যদলে (Rangghar nat mahotsav press meet in Barpeta) ৷ মহোৎসৱত উৰুগুৱেৰ এমাৰেছ ট্ৰিটো'ৰ এণ্ড্ৰেছ ফেজিঅ'লিনো'ৰ দ্বাৰা পৰিচালিত 'ৰিঅ' নাটখন পৰিৱেশন কৰা হ’ব ৷ বিগত ২৯ টা বছৰে ৰংঘৰ ৰাষ্ট্ৰীয় নাট মহোৎসৱে মুম্বাই, দিল্লী, পশ্চিমবংগ আদিকে ধৰি দেশৰ বিভিন্ন ৰাজ্যৰ নাট্যবোদ্ধাৰ নাটক অনুষ্ঠিত কৰি আহিছে ৷ এইবেলি এই নাট মহোৎসৱত বিদেশী নাট্য দলটোৰ উপৰিও খ্যাতিসম্পন্ন নাট্যকাৰ পৰিচালক ৰতন থিয়াম, কলকাতাৰ যশস্বী নাট্যকাৰ পৰিচালক মনিষ মিত্ৰ, মুম্বাইৰ মাকৰাণ্ড দেশপাণ্ডেৰ লগতে গুৱাহাটীৰ ঋতুপৰ্ণ দাসৰ নাট্যদলে নাট পৰিৱেশন কৰিব ৷