শ্ৰীমন্ত শংকৰদেৱ কলাক্ষেত্ৰত কথক নৃত্যানুষ্ঠান

গুৱাহাটী, ২৭ ডিচেম্বৰ : গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ মাধৱদেৱ প্ৰেক্ষাগৃহত বুধবাৰে বিয়লি ভাগত অনুষ্ঠিত হয় ‘কথক নৃত্যানুষ্ঠান’ । নৃত্যলোক অফিচিয়েল ট্ৰাষ্টৰ উদ্যোগত বিয়লি পাঁচ বজাৰ পৰা অনুষ্ঠিত হোৱা অনুষ্ঠানত নৃত্যলোক অফিচিয়েলৰ ছাত্ৰ-ছাত্ৰীৰ লগতে শ্ৰীলংকাৰ শিল্পীয়ে অপূৰ্ব কথক নৃত্যশৈলী প্ৰদৰ্শন কৰে ।

কথক নৃত্যানুস্থানৰ পূৰ্বে পদ্মশ্ৰী যতীন গোস্বামী আৰু বিপুল দাসক ২০২৩ বৰ্ষৰ ‘নৃত্যলোক অফিচিয়েল গুৰু সন্মান’ প্ৰদান কৰা হয় । একেই অনুষ্ঠানত বিশিষ্ট অভিনেত্ৰী মলয়া গোস্বামীক ‘নৃত্যলোক অফিচিয়েল মহিলা সন্মান’ প্ৰদান কৰা হয় ।

কথক নৃত্যৰ অনুষ্ঠানটোত অসমৰ সাংস্কৃতিক জগতৰ বহু গণ্যমান্য ব্যক্তি উপস্থিত থাকে । উল্লেখ্য যে, নৃত্যলোক নামৰ কথক নৃত্যৰ শিক্ষানুষ্ঠানখনে ৰূপালী জয়ন্তী বৰ্ষ অতিক্ৰম কৰা উপলক্ষে এই বিশেষ অনুষ্ঠানৰ আয়োজন কৰিছে ।

লগতে পঢ়ক : ফেব্ৰুৱাৰীত পৰিয়ালৰে সৈতে অগ্নিবীৰ চাবলৈ সাজু হওক