Police Arrested Afghan citizen: কৰিমগঞ্জত ভাৰতীয় নথি-পত্ৰসহ আটক আফগান নাগৰিক

কৰিমগঞ্জ চহৰত বহুদিনৰ পৰা ভাৰাতীয়া হিচাপে থকা এজন আফগান ব্যক্তিৰ ঘৰত আৰক্ষীৰ অভিযান ৷ চহৰখনৰ লগতে দাঁতি কাষৰীয়া বিভিন্ন অঞ্চলত ধন সুদলৈ দিয়াৰ ব্যৱসায়ৰ লগত জড়িত মাদগাই হেমত খাইল নামৰ এই কাবুলিৱালাজনৰ ঘৰত সোমবাৰে আৰক্ষীয়ে চলাই অভিযান । কৰিমগঞ্জ আৰক্ষীয়ে চলোৱা এই অভিযানত ব্যক্তিজনৰ ঘৰৰ পৰা উদ্ধাৰ কৰিছে বহু সন্দেহজনক ভাৰতীয় নথি পত্ৰ । ইতিমধ্যে সদৰ আৰক্ষীয়ে জব্দকৃত নথি পত্ৰসহ আটক কৰিছে কাবুলৰ মূল বাসিন্দা মাদগাই হেমত খাইলক (Police Arrested Afghan citizen) । আৰক্ষী সূত্ৰই প্ৰকাশ কৰা অনুসৰি, চহৰখনৰ কানিশাইল অঞ্চলৰ এটা ঘৰত ভাৰাতীয়া হিচাপে থাকি সুদৰ ব্যৱসায় চলাই আহিছিল কাবুলৰ এই ব্যক্তিজনে । প্ৰাপ্ত তথ্য অনুসৰি মংগলদৈৰ ফাতিমা বেগম নামৰ এগৰাকী মহিলাৰ লগত বিবাহ সম্পন্ন কৰা এই ব্যক্তিজনে চিকিৎসাজনিত ভিজাৰে ভাৰতলৈ আহি নিজৰ নাম সলনি কৰি ভাৰতৰ ড্ৰাইভিং লাইচেন্স, পান কাৰ্ড, বেংক একাউন্টকে আদি কৰি বহুকেইখন গুৰুত্বপূৰ্ণ নথি বনাই লৈছিল । গোপন সূত্ৰৰ পৰা পোৱা তথ্যৰ ভিত্তিত অৱশেষত কৰিমগঞ্জ সদৰ আৰক্ষীয়ে ব্যক্তিজন বসবাস কৰি অহা ভাৰা ঘৰটোত অভিযান চলাই ব্যক্তিজনক আটক কৰে ৷ অৱশ্যে তদন্তৰ খাতিৰত আৰক্ষীয়ে এই সন্দৰ্ভত ভাষ্য দিয়াৰ পৰা বিৰত আছে ।