সাধাৰণ কৰ্মীৰ পৰা প্ৰাক্তন উগ্ৰপন্থীলৈ সকলোকে লাগে বিজেপিৰ টিকট

বৃহস্পতিবাৰে ৰাজ্যিক নিৰ্বাচন আয়োগে কাৰ্বি আংলং স্বায়ত্তশাসিত পৰিষদৰ নিৰ্বাচনৰ(KAAC Election 2022) দিন ঘোষণা কৰাৰ লগে লগে বিভিন্ন দলৰ প্ৰাৰ্থী প্ৰত্যাশীসকলৰ মাজত বিশেষ তৎপৰতা পৰিলক্ষিত হৈছে ৷ বিশেষকৈ শাসকীয় ভাৰতীয় জনতা দলৰ টিকট বিচাৰি প্ৰাৰ্থীসকলে ডিফুৰ চাৰিমাইলস্থিত বিজেপি কাৰ্যালয়ত ভিৰ কৰিছে (Karbi Anglong BJP office)৷ প্ৰাৰ্থীত্ব প্ৰত্যাশীসকলৰ বহুতৰে নতুন মুখৰ লগতে বিজেপি দলৰ বহু নিষ্ঠাৱান কৰ্মীয়ে প্ৰাৰ্থীত্বৰ বাবে আবেদন দাখিল কৰা পৰিলক্ষিত হৈছে ৷ আনহাতে ইতিমধ্যে যোৱা চাৰি ছেপ্তেম্বৰত কাৰ্বি শান্তি চুক্তিৰ(Karbi peace accord) জৰিয়তে মূলসূঁতিলৈ ঘূৰি অহা কেইবাজনো প্ৰাক্তন শীৰ্ষ উগ্ৰপন্থী নেতায়ো বিজেপিৰ টিকট বিচাৰি আবেদন কৰিছে ৷ আনহাতে জিলা বিজেপিৰ সভাপতি ধনছিং টেৰণে সাংবাদিকৰ সৈতে হোৱা বাৰ্তালাপত কয় যে, বিজেপিয়ে কাৰ্বি আংলং জিলাৰ সামগ্ৰিক উন্নয়ণৰ ইচ্যুক লৈ নিৰ্বাচনত নামিব ৷