মাজুলীত ৩১ খন বিদ্যালয়ৰ শ্মশান যাত্ৰা, সৰৱ ছাত্ৰ সন্থা - 161 schools to be closed in Assam

মাজুলী,২০ আগষ্ট: ৰাজ্যত পুনৰ শতাধিক চৰকাৰী বিদ্যালয় বন্ধৰ কৰিবৰ বাবে চৰকাৰে ইতিমধ্যে কামকাজ আৰম্ভ কৰিছে । মাজুলীৰ বিভিন্ন প্ৰান্তৰ ৩১ খন বিদ্যালয় বন্ধৰ বাবে ইতিমধ্যে তালিকা প্ৰকাশ পাইছে । মাজুলীৰ ৩১ খন চৰকাৰী বিদ্যালয় বন্ধ কৰাৰ তালিকা প্ৰকাশ পোৱাৰ লগে লগেই জাঙুৰ খাই উঠিছে মাজুলী জিলা ছাত্ৰ সন্থা ।

এই সন্দৰ্ভত মাজুলী জিলা ছাত্ৰ সন্থাৰ এগৰাকী ৰাজ্যিক কাৰ্যনিবাহক সদস্যই কয়,"বিদ্যালয় একত্ৰীকৰণ বা বিলুপ্তিকৰণ প্ৰক্ৰিয়াক পূৰ্বৰে পৰা সদৌ অসম ছাত্ৰ সন্থাই বিৰোধিতা কৰি আহিছে । চৰকাৰী বিদ্যালয়সমূহ বন্ধ কৰি দিয়াৰ লগে লগে, ইয়াৰ পৰা প্ৰথম অসুবিধা হয় দৰিদ্ৰ সীমাৰেখাৰ তলৰ ছাত্ৰ-ছাত্ৰীসকলৰ । ইয়াৰ পৰা লাভান্বিত হ'ব ব্যক্তিগত খণ্ডৰ শিক্ষানুষ্ঠানসমূহ । বিদ্যালয়সমূহ বন্ধ কৰি দুখীয়া ছাত্ৰ-ছাত্ৰীসকলৰ শৈক্ষিক ভৱিষ্যতটো অন্ধকাৰৰ দিশলৈ ঠেলি পঠিয়াইছে । সমগ্ৰ বিষয়টো পৰ্যালোচনা কৰিলে দেখা যায় যে চৰকাৰী বিদ্যালয়ৰ আন্তঃগাথনিৰ অভাৱ, এজনীয়া শিক্ষকৰে পাঠদান আদি সমস্যাবোৰৰ বাবে চৰকাৰী বিদ্যালয়ত ছাত্ৰ-ছাত্ৰীৰ অভাৱ দেখা গৈছে ।"

লগতে তেওঁ কয়,"মাজুলীৰ ৩১ খন বিদ্যালয়ৰ শ্মশান যাত্ৰা আৰম্ভ কৰিছে । এই বিষয়টো মাজুলী জিলা ছাত্ৰ সন্থাই কেতিয়াও মানি নলয় । আমি ইয়াৰ সম্পূৰ্ণ বিৰোধিতা কৰিছো । ৩১ খন বিদ্যালয় কেতিয়াও বন্ধ হ'ব নোৱাৰে । এইসমূহ বিদ্যালয়লৈ কেনেকৈ ছাত্ৰ-ছাত্ৰী আহে সেই বিষয়টোতহে গুৰুত্ব দিব লাগে । আমি অসমৰ মুখ্যমন্ত্ৰীগৰাকীক স্পষ্টভাৱে আহ্বান জনাইছো যে বিদ্যালয়সমূহৰ শ্মশান যাত্ৰা নকৰি কেনেকৈ বিদ্যালয়সমূহক পুনৰুজ্জীৱিত কৰিব পাৰি সেই বিষয়তহে গুৰুত্ব আৰোপ কৰক ।"

লগতে পঢ়ক: চৰকাৰী বিদ্যালয়ত মৃত্যুঘন্টা: শিক্ষা-ক্ষেত্ৰ আঁচনিৰ অধীনত বিলুপ্ত হ’ব ৰাজ্যৰ ১৬১ খন শিক্ষানুষ্ঠান - 161 schools to be closed in Assam