ডিব্ৰুগড়, ৮ ছেপ্টেম্বৰ : অনলাইন ট্ৰেডিঙৰ নামত প্ৰৱঞ্চনা কৰি বিলাসী জীৱন কটোৱা ২২ বছৰীয়া ডিব্ৰুগড়ৰ বিশাল ফুকন প্ৰৱঞ্চনাৰ কাহিনীয়ে ৰাজ্যত ব্যাপক চৰ্চা লাভ কৰিছে । কম বয়সতে আনৰ টকাৰে বিলাসী জীৱন কটোৱা প্ৰৱঞ্চক বিশাল ফুকন শনিবাৰৰ পৰা থাকিব লাগা হৈছে ডিব্ৰুগড়ৰ কেন্দ্ৰীয় কাৰাগাৰত ।
সামাজিক মাধ্যমত বিশাল ফুকনৰ অনলাইন ট্ৰেডিং প্ৰৱঞ্চনাৰ কাহিনী পোহৰলৈ অহাৰ পাছতে আৰক্ষীৰ নজৰলৈ আহিছিল বিশাল ৷ অতি কম বয়সৰ বয়সীয়া ডিব্ৰুগড়ৰ প্ৰৱাঞ্জলী এপাৰ্টমেণ্টৰ নিবাসী বিশাল ফুকনক ডিব্ৰুগড় আৰক্ষীয়ে আটক কৰাৰ পিচতে পোহৰলৈ আহিছে ন ন চাঞ্চল্যকৰ তথ্য ।
অভিনেত্ৰী চুমী বৰাই ভাতৃ পাতি লৈছিল বিশাল ফুকনক । বহু অভিনেতা-অভিনেত্ৰীক বিশাল ফুকনৰ ওচৰত অনলাইন ট্ৰেডিঙৰ বাবে ধন বিনিয়োগ কৰিবলৈ বাধ্য কৰোৱাইছিল ৷ ৰাজ্যৰ বহু সম্ভ্ৰান্ত ব্যৱসায়ী, বহু ৰাজনৈতিক নেতাক ধন বিনিয়োগ কৰোৱাইছিল বিশাল ফুকনৰ ওচৰত চুমী বৰাই ৷ জেৰাত বিশালে এই কথা আৰক্ষীক জনোৱা বুলি আৰক্ষীয়ে জানিবলৈ দিছে ৷
অভিযোগ অনুসৰি চুমী বৰাৰ ৰাজস্থানত পতা ডেষ্টিনেশ্যন ৱেডিঙত টকা খৰচ কৰিছিল বিশাল ফুকনে । ডুবাইত বিলাসী হোটেল বুক কৰি দিছিল বিশাল ফুকনেই । আনকি চুমী বৰাৰ ককায়েকৰ লগত ঔষধ কোম্পানী আৰম্ভ কৰিছিল বিশাল ফুকনে । আৰক্ষীয়ে চুমী বৰাক বিচাৰি অভিযান চলাইছে যদিও সন্ধান লাভ কৰা নাই । বিশাল ফুকনে অনলাইন ট্ৰেডিঙৰ নামত প্ৰৱঞ্চনা কৰি ক্ৰয় কৰা সম্পত্তি লৈ আৰক্ষীয়ে তদন্ত অব্যাহত ৰাখিছে ।
আৰক্ষীৰ তথ্য মতে ডিব্ৰুগড়ৰ বৈৰাগীমঠত ২ হাজাৰ বৰ্গফুটৰ অত্যাধুনিক কাৰ্যালয় নিৰ্মাণ কৰিছিল প্ৰৱঞ্চক বিশাল ফুকনে ৷ কাৰ্যালয়টোৰ ইণ্টেৰিয়’ৰ ডিজাইনত কেবা লাখ টকা খৰচ কৰাৰ তথ্য লাভ কৰিছিল আৰক্ষীয়ে । বিশাল ফুকনৰ কাৰ্যালয়ত ইণ্টেৰিয়’ৰ ডিজাইন কৰিছিল গুৱাহাটীৰ কৰিশ্মা কাকতি নামৰ ডিজাইনাৰগৰাকীয়ে । ইয়াৰ পিচতে দেওবাৰে অনলাইন ট্ৰেডিঙৰ প্ৰৱঞ্চক বিশাল ফুকনৰ অত্যাধুনিক কাৰ্যালয়ৰ ইণ্টেৰিয়’ৰ ডিজাইন কৰা কৰিশ্মা কাকতিক ডিব্ৰুগড় সদৰ থানাত জেৰা চলোৱা হৈছে ৷
দেওবাৰে বিয়লি ডিব্ৰুগড় সদৰ থানাত উপস্থিত হোৱা কৰিশ্মাক বহু সময় ধৰি ডিব্ৰুগড়ৰ সদৰ থানাত জেৰা চলায় বিশাল ফুকন গোচৰৰ তদন্তকাৰী বিষয়া স্বেজল আগৰৱালে ৷ জেৰাৰ অন্তত আৰক্ষীয়ে যাবলৈ দিয়ে কৰিশ্মা কাকতিক । আৰক্ষীয়ে কি তথ্য বিশাল ফুকনৰ সম্পৰ্কত জানিব বিচাৰিল সেই কথা সংবাদ মাধ্যমৰ আগত একো প্ৰকাশ নকৰিলে কৰিশ্মাই ৷
লগতে পঢ়ক : আৰক্ষীয়েই জনা নাছিল, মই কেনেকৈ জানিম ? : বিনিয়োগ কেলেংকাৰীত নাম সাঙোৰ খোৱা সন্দৰ্ভত জুবেইৰ আনম মজুমদাৰ
ট্ৰেডিং কেলেংকাৰী: প্ৰয়োজনত তদন্তৰ ভাৰ চি বি আইক দিয়াৰ কথা ক'লে মুখ্যমন্ত্রীয়ে
